4-6 шілдеде футболдан Қазақстан Премьер-лигасының 15-тур ойындары өтеді. Турдың негізгі ойыны Семейде – «Елімай» мен «Тобыл» командалары арасында өтпек.
4 шілде
«Қайрат» (Алматы) – «Тұран» (Түркістан)
Басталуы: 20:00
Орталық стадион (Алматы)
Ойындар тарихы:
– Матчтар: 10
– «Қайраттың» жеңістері: 6
– «Тұранның» жеңістері: 3
– Тең ойындар: 1
Турдың шымылдығы Алматыда түріледі. Жергілікті «Қайрат» өз алаңында Түркістанның «Тұран» клубын қабылдайды. Қонақтардың турнир кестесіндегі жағдайы мен команданың ішкі ахуалын ескерсек, «Қайрат» бұл ойында айқын фаворит екені анық.
Кейінгі үш кездесуде алматылықтар 10:3 есебімен жеңіске жеткен. Сонымен қатар бірінші айналымдағы матч та «Қайраттың» пайдасына шешілген. Чемпионатта көш бастау үшін алматылықтар бұл ойында жеңіске жетуге тиіс.
5 шілде
«Қызылжар» (Петропавл) – «Ордабасы» (Шымкент)
Басталуы: 18:00
Қарасай стадионы (Петропавл)
Ойындар тарихы:
– Матчтар: 45
– «Қызылжардың» жеңістері: 18
– «Ордабасының» жеңістері: 18
– Тең ойындар: 9
25 маусымда екі ұжым Петропавлда Қазақстан Кубогының жартылай финалында кездесіп, 0:0 есебімен тең түскен. Жалпы екі команда арасындағы текетіресте күштер тең: екеуі де 18 ойында жеңіске жеткен. Солтүстік пен оңтүстік командаларының бұл жолғы текетіресінде қайсысының мерейі үстем болар екен?
«Жеңіс» (Астана) – «Ұлытау» (Жезқазған)
Басталуы: 18:00
Астана Арена (Астана)
Ойындар тарихы:
– Матчтар: 1
– Жеңістер: 0–0
– Тең ойын: 1
Бұл екі команда арасындағы екінші кездесу. Алғашқысы 30 наурызда Жезқазғанда өтіп, 1:1 есебімен аяқталған. Қазір турнир кестесінде екі команданы небәрі 2 ұпай бөліп тұр. Алайда кейінгі үш матчта жеті ұпай жинаған «Жеңістің» көңіл-күйі әлдеқайда жақсы. Ал «Ұлытауға» жақында жаңа бапкер келді.
«Ақтөбе» (Ақтөбе) – «Атырау» (Атырау)
Басталуы: 20:00
Қобыланды батыр стадионы (Ақтөбе)
Ойындар тарихы:
– Матчтар: 67
– «Ақтөбенің» жеңістері: 39
– «Атыраудың» жеңістері: 11
– Тең ойындар: 17
Статистика мен турнир кестесіндегі жағдай «Ақтөбенің» айқын басымдығын көрсетіп тұр. Дегенмен футболда қарсыласты менсінуге болмайды. «Атырау» соңғы турда «Оқжетпеспен» тең ойнап, алғаш рет қақпасына гол өткізбеді. Сондай-ақ соңғы екі маусымда ақтөбеліктер өз алаңында атыраулықтарды жеңе алмай жүр.
«Елімай» (Семей) – «Тобыл» (Қостанай)
Басталуы: 20:00
«Спартак» стадионы (Семей)
Ойындар тарихы:
– Матчтар: 3
– «Елімайдың» жеңістері: 1
– «Тобылдың» жеңістері: 1
– Тең ойын: 1
«Елімай» мен «Тобыл» арасындағы кездесу — турдың басты ойыны. Көрермендер тағатсыздана күткен кездесудің бірі. Турнир кестесінде «Тобыл» төртінші, ал «Елімай» бесінші орында келеді. Бірақ семейліктер бір ойын артық өткізіп, қарсыластарынан 4 ұпайға қалып тұр.
Командалар бірінші айналымдағы кездесуде 1:1 есебімен тең түскен. Өткен маусымда да әрқайсысы өз алаңында сенімді жеңіске жеткен. Ұлттық құраманың бұрынғы ойыншылары – Андрей Карпович пен Нұрбол Жұмасқалиев баптайтын қос команда арасындағы бәсекеде қай ұжым жеңіске жетеді екен?
6 шілде
«Жетісу» (Талдықорған) – «Астана» (Астана)
Басталуы: 19:00
«Жетісу» стадионы (Талдықорған)
Ойындар тарихы:
– Матчтар: 39
– «Жетісудің» жеңістері: 8
– «Астананың» жеңістері: 25
– Тең ойындар: 6
«Жетісу» өткен турда «Ұлытауды» жеңіп, турнир кестесіндегі қауіпті аймақтан шығып үлгерді. Енді оларды чемпионат көшбасшысы – «Астана» командасы күтіп тұр. Талдықорғандықтардың «Астанаға» қарсы нәтижесі көңіл көншітпейді – кейінгі бес ойында 1:14 есебімен жеңілген. Енді Самат Смақовтың шәкірттері бұл статистиканы өзгерте ала ма?
«Оқжетпес» (Көкшетау) – «Қайсар» (Қызылорда)
Басталуы: 20:30
Қажымұқан Мұңайтпасов атындағы стадион (Шымкент)
Ойындар тарихы:
– Матчтар: 50
– «Оқжетпестің» жеңістері: 15
– «Қайсардың» жеңістері: 25
– Тең ойындар: 10
Көкшетаудағы стадионда жөндеу жұмыстары жүріп жатқандықтан, «Оқжетпес» қызылордалықтарды Шымкентте қабылдайды. Бұл фактор «Оқжетпеске» алаң иесі ретіндегі басымдығын азайтатыны сөзсіз. Айта кету керек, дәл осы стадионда өткен соңғы ойында «Қайсар» «Ордабасыдан» 0:5 есебімен жеңілген еді.