3-турға шолу: Қай клуб жеке-дара көш бастайды?

Биылғы ішкі біріншілікке легионерлерден бас тартып, тек отандық ойыншылармен қатысып жатқан Қызылорданың «Қайсары» бұл турда бір жыл салып Премьер-лигаға оралған Көкшетаудың «Оқжетпесін» қабылдайды. Өткен турда қызылордалықтар сырт алаңда «Елімайға» 2:0 есебімен жол берсе, «Оқжетпес» Көкшетауда «Атырауды» 2:1 есебімен жеңіп, алғашқы үш ұпайын еншіледі. Сөйтіп, турнир кестесіндегі жағдайын жақсартты. Ал «Қайсар» бірінші турдағы жалғыз ұпайымен соңғы орындарда тұр. Сондықтан осы турда қызылордалықтар үш ұпай алу үшін барын салады.

Қос ұжым ең соңғы рет Премьер-лига аясында 2023 жылдың 1 шілдесінде кездесіп, «Оқжетпес» Қызылордада алаң иелерін 1:0 есебімен жеңген. Жалпы, бүгінге дейін «Қайсар» мен «Оқжетпес» 32 мәрте кездесіп, соның 13-інде қызылордалықтардың мерейі үстем болған. Ал 11 ойын көкшетаулық клубтың жеңісімен аяқталса, 8 ойында қарсыластар тең тарқасқан.

 

Чемпионатты екі клуб та табысты бастады деп айтуға болады. Тек екінші турда «Тұран» «Ақтөбеге» қарсы өткен аса тартысты ойында қарсыластарына есе жіберіп қойды. Алғашқы турда «Оқжетпестің» қақпасына екі гол соғып, сенімді жеңіске жетті. Ал Алматының «Қайраты» алғашқы турда «Астанамен» тең ойнаса, екінші турда өз алаңында 2023 жылғы ел чемпионын 4:0 есебімен жеңді. Алғашқы турларда мұндай ірі нәтиже ел біріншілігінде сирек кездеседі.

Мәселен, былтырғы чемпионаттың басында қос ұжым арасында Түркістанда өткен кездесу 0:0 есебімен тең аяқталды, ал біріншілік соңындағы турда «Қайрат» өз алаңында «Тұранды» 5:1 есебімен жеңген. Жалпы, «Тұран» мен «Қайрат» осы күнге дейін 9 мәрте кездесіп, соның 5-інде алматылық ұжым басым түскен. 3 ойында «Тұранның» жеңісі тіркелсе, бір ойында тең нәтиже болған.

 

 

30 наурыз


«Астана» (Астана) – «Жетісу» (Талдықорған)

«Жетісу» елордалық клуб үшін Премьер-лигада ең ыңғайлы қарсыластардың бірі саналады. Өйткені соңғы алты жылда «Астана» «Жетісудан» жеңілмеген, тіпті бірде-бір ойында тең нәтиже тіркелмеген. Тек 2019 жылдың қыркүйек айындағы 27-тур аясындағы матчта астаналықтар 1:2 есебімен жол берген. Одан бергі ойындарда «Жетісу» «Астананың» жеңіс кілтін таба алмай келеді.

Десе де «Жетісу» клубының тізгінін ұстаған Самат Смақов «Астанаға» қарсы бір айла ойлап табатыны анық. Қазіргі таңда «Жетісу» екі турда бір-бір ұпайдан алған. Егер «Астана Аренада» өтетін матчта жетісулықтар жеңіске жетсе, турнир кестесінде көш басшылардың біріне айналады.

Отандық футбол жанкүйерлері чемпионаттың үшінші турында батыс дербиіне куә болмақ. «Атырау» мен «Ақтөбе» арасындағы матчтар әрдайым тартысты өтіп, командалар үнемі жанкүйерлерге ұнайтын әдемі ойын өрнегін көрсетеді. Бірақ командалар бір-бірінің қақпасына гол соға бермейді.

Мәселен, былтырғы маусымда қос ұжым арасындағы екі ойын да тең аяқталды. Ақтөбедегі бірінші матч 1:1 есебімен, Атыраудағы екінші ойында да командалар бір-бір голдан соғып, тең нәтижеге жетті. Биылғы матчтан жанкүйерлердің үміті көп. Өйткені екі клуб та биылғы матчтарда әр ойында гол соғып жүр.

 

Премьер-лига ойындарының дебютанты «Ұлытау» ел чемпионатына алғаш рет қатысып жатса да, мамандар мен жанкүйерлерге жақсы әсер қалдыруда. Алғашқы турда чемпиондыққа үміткер «Тобылдан» 2:0 есебімен жеңілгенімен, кейінгі турда тәжірибелі «Жетісу» клубымен тең ойнады. Осылайша, ұлытаулықтар біріншілікке қарсыластарға ұпай таратуға емес, керісінше олардан ұпай алуға, жоғары орындарға ұмтылуға ниетті екенін көрсетті.

Ал «Жеңіс» клубы қатарынан екі ойында тең ойнады. Бірінші турда «Қайсармен», екінші турда «Тобылмен» ұпай бөлісті. Алғашқы екі тур үшін бұл жақсы нәтиже болғанымен, елордалықтар екі ойында да қарсыластар қақпасына гол соға алмады. Қазіргі таңда клуб жанкүйерлері шабуыл мәселесіне алаңдаушылық білдіруде. «Жеңіс» футболшылары бәлкім осы турда гол соғып, жанкүйерлерін қуантып қалар. Сіз қалай ойлайсыз?

 

Өткен маусыммен салыстырғанда құрамын толық жаңартқан «Ордабасы» клубының ойыны жанкүйерлерінің көңілінен шықпай тұр. Бірінші турда өз алаңында (Қ.Мұңайтпасов атындағы Орталық стадионында жөндеу жұмыстарына байланысты «Ордабасы» өз алаңындағы бірнеше тур ойындарын Түркістанда өткізеді) «Ақтөбемен» тең түскенімен, екінші турда Алматыда «Қайраттан» ірі есеппен жеңілді – 4:0. Енді осы турда шымкенттіктер қарсыластарын ірі есеппен жеңіп, жанкүйерлерінің көңілін аулауы тиіс.

«Қызылжар» клубының да жағдайы «Ордабасы» сияқты. Бірінші турда «Жетісумен» тең ойнағанымен, екінші турда «Астанадан» 0:2 есебімен жеңілді. Сондықтан бұл ойында да «Қызылжар» үшін үш ұпай ауадай маңызды. Жағдайы ұқсас клубтар арасындағы матчта қай клубтың бағы жанары белгісіз. Статистикаға сүйенер болсақ, соңғы 5 матчтың үшеуінде «Ордабасы» футболшылары жеңіске жеткен, бір ойында «Қызылжар» жеңіске жеткен. Бір матч тең аяқталған.

 

Үшінші турдың шымылдығы Қостанайда «Тобыл» мен «Елімай» арасындағы ойынмен түріледі. Екі турдан кейін 4 ұпай жинаған «Тобыл» «Астана», «Қайрат», «Ақтөбе» клубтарымен бірге турнир кестесінде көш бастап тұр. Егер осы ойында да үш ұпай алса, олар жеке дара көш бастауы мүмкін.

Алайда «Елімай» футболшылары қарсыластарына мұндай мүмкіндік оп-оңай бермейді. Екі турда үш ұпай жинаған семейліктердің де турнир кестесіндегі жоғары орындардан үміті бар. Былтырғы маусымда екі ұжым екі рет кездесіп, әрқайсысы бір-бір ойында жеңіске жеткен. Сондықтан бұл ойында нақты бір команданы басым деп айту қиын.

Фото: «Ақтөбе» клубының баспасөз қызметі