28-29 мамыр күндері Бірінші лига командалары арасындағы футбол ел чемпионатының сегізінші тур ойындары өтті. Тур қорытындысы бойынша Ақтаудың «Каспий» клубы турнир кестесіндегі орнын нығайтып алды.
Ойын нәтижелері:
«Каспий» – «Хан-Тәңірі» – 1:0
AKAS – «Қайрат-Жастар» – 3:0
«Түркістан» – SD Family – 0:1
«Оңтүстік» – «Екібастұз» – 0:1
«Алтай» – «Шахтер» – 2:1
«Тараз» – Ertis – 0:1
«Жетісай» – «Ақтөбе-Ж» – 3:0
28 мамыр
«Каспий» (Ақтау) – «Хан-Тәңірі» (Алматы) – 1:0 (0:0)
Гол: Бөрібаев, 74 (1:0)
Бас төреші: Попов (Астана)
Ескерту: Шәмші, Қожамберді – Литош, Бекмырза, Құсайынов
Әзірге турнир кестесінде көш бастап тұрған «Каспий» клубы турдың шымылдығын ашып берді. Ақтаулықтар өз алаңында Алматының «Хан-Тәңірі» командасын қабылдап, қарсыластарынан бір доп айырмасымен басым түсті. Қонақтар екінші таймның ортасына дейін алаң иелеріне қарсылық танытқанымен, 74-минутта «Каспий» сапынан Нұрғайни Бөрібаев мергендігімен көзге түсіп, командасына маңызды жеңіс сыйлады. Сөйтіп ақтаулықтар турнир кестесіндегі бірінші орнын сақтап қалды.
AKAS (Алматы) – «Қайрат-Жастар» (Алматы) – 3:0 (1:0)
Голдар: Васильченко, 17 (1:0); Гридин, 58 (2:0); Павинич, 90+4 (3:0)
Бас төреші: Сержанұлы (Алматы)
Ескерту: Пірімбердиев – Әбідрахманов
Қызыл қағаз: Меңдіғалиев, 90 («Қайрат-Жастар»)
«Қайрат-Жастар» командасы биылғы маусымда сәтсіз өнер көрсетіп келеді. Нәтижесінде алматылық ұжым турнир кестенің соңғы жағына түсіп қалды. Соған қарамастан, «жастардың» Бірінші лига дебютанты AKAS клубынан ойсырай ұтылады деп ешкім күткен жоқ еді. Ойын барысында «Қайрат» көп уақыт допты бақылауда ұстағанымен, онысынан түк пайда болмады. Ал AKAS алғашқы таймда жылдам гол соғып, үзіліске басымдықпен шықты. Екінші таймда тәжірибелі Сергей Гридин есепті еселей түсті. Ойын тағдыры «Қайрат» қақпашысы Ильдар Меңдіғалиевтің тікелей қызыл қағаз алғаннан кейін шешілді. Бір ойыншы басымдыққа ие болған AKAS қосымша уақытта үшінші голын соғып, маусымдағы алғашқы ірі жеңісіне қол жеткізді. Гридиннің еншісінде үш гол бар.
«Түркістан» – SD Family – 0:1 (0:0)
Гол: Шәріпжан, 73 (0:1)
Бас төреші: Ыдрысов (Ақтау)
Ескерту: Исаев, Дадаханов
Қызыл қағаз Исаев, 24 («Түркістан»)
Кездесудің төртінші минутында алғашқы ескертуін алған «Түркістан» ойыншысы Шарафутдин Исаев 24-минутта алаңнан қуылды. Сан басымдығына ие болған астаналықтар 73-минутта жеңіс голын соқты. Гол авторы – Шәріпхан Шәріпжан. Осылайша SD Family үш матчтық жеңіссіз сериясына нүкте қойса, «Түркістан» қатарынан үшінші ойында жеңілді.
«Оңтүстік» (Шымкент) – «Екібастұз» – 0:1 (0:1)
Гол: Абаев, 28 (0:1)
Бас төреші: Вишняков (Семей)
Ескерту: Амангелді – Варданян, Зинадин, Сотник
Осыған дейін бірде-бір турда жеңіске жетпеген «Екібастұзда» бұл турда алғашқы жеңісіне қол жеткізді. Шымкентке қонаққа барған павлодарлықтар бірінші таймда Фархат Абаевтың соққан голының арқасында алғашқы үшін ұпайын еншіледі.
29 мамыр
«Алтай» (Өскемен) – «Шахтер» (Қарағанды) – 2:1 (1:1)
Голдар: Хижниченко, 15 (1:0); Нұрмұғамет, 28 (1:1); Дадаев, 64 (пенальтиден – 2:1)
Бас төреші: Ахметов (Астана)
Ескерту: Көкеев, Жанұзақов – Нүсіп, Галкин, Саидов
«Шахтер» маусым басталмай тұрып-ақ Премьер-лигаға шығу мақсатын ашық жариялады. Бірақ әзірге команданың ойыны кедір-бұдыр. Ал «Алтай» үндемей жүріп үлкен іс тындырып жатыр. Қазіргі таңда команда үздік үштіктен үміткер. Бұл ойында өскемендіктер тәжірибелі Сергей Хижниченконың голымен алға шықты. Бірақ көп ұзамай Рифат Нұрмұғамет есепті теңестіріп үлгерді. Екінші таймда Ибрагим Дадаев пенальтиден есепті қайта өзгертіп, кезекті жеңістеріне қол жеткізді. Қарағандылықтар қанша тырысқанымен, таразы басын теңестіре алмады. Осылайша, «Алтай» 2:1 есебімен жеңіске жетіп, турнир кестесінде «Шахтерге» жақындады.
«Тараз» – Ertis – 0:1 (0:0)
Гол: Есімов, 75 (0:1)
Бас төреші: Бильдинов (Шымкент)
Ескерту: жоқ – Попов
Бұрын Премьер-лигада жиі кездескен қос клуб қазір Бірінші лигада өнер көрсетіп жүр. Дегенмен, Ertis жоғары лигаға оралу мүмкіндігі жоғары клубтардың бірі саналады. «Таразға» қарсы өткен ойында павлодарлықтар жоғары топқа қосылуға ниетті екендіктерін тағы бір мәрте дәлелдеді. Екі ұжым арасында өткен тартысты кездесуде қонақтар аздаған басымдығын көрсетіп, 0:1 есебімен жеңіске жетті. Бұл жеңіс Ertis-ті турнир кестесінде екінші сатыға көтерді.
«Жетісай» – «Ақтөбе-Ж» – 3:0 (1:0)
Голдар: Мұстафин, 45+2 (1:0); Мұстафин, 58 (2:0); Рысқұл, 79 (3:0)
Бас төреші: Сейдахметов (Талдықорған)
Ескерту: Мұстафин, Бастар, Күлмағанбетов – Мұратов
«Жетісай» кезекті рет жеңіске жетті. Бірінші таймының соңына қарай «Жетісай» ойыншысы Батыржан Мұстафин есепті ашса, екінші таймда дубль авторы атанды. Ал 79-минутта Рысқұл есепті еселеп, командасына маңызды үш ұпай сыйлады.
9-тур ойындары:
12 маусым:
«Екібастұз» – «Тараз»
«Ақтөбе-М» – «Оңтүстік»
«Хан-Тәңірі» – «Түркістан»
SD Family – «Алтай»
13 маусым:
«Шахтер» – AKAS
«Қайрат-Жастар» – «Жетісай»
Ertis – «Каспий»