24–25 мамыр күндері футболдан Қазақстан чемпионатының 10-тур ойындары өтеді. Турдың басты кездесуі – «Астана Аренада» өтетін «Астана» мен «Жеңіс» арасындағы елорда дербиі болмақ.
24 мамыр
«Қайрат» – «Оқжетпес»
Матч басталуы: 18:00
Өтетін орны: «Орталық» стадион (Алматы қ.)
Қарсыластар тарихы:
– Матчтар саны: 51
– «Қайраттың» жеңісі – 36
– «Оқжетпестің» жеңісі – 5
– Тең ойындар – 10
Алматының «Қайраты» Шымкент пен Семейдегі сәтсіздіктен кейін өз алаңына оралып отыр. Егер «сары-қаралар» осы турда «Оқжетпестен» басым түсетін болса, уақытша болса да бірінші орынға көтеріледі. Дегенмен Рафаэль Уразбахтиннің шәкірттеріне көкшетаулық ұжымнан үш ұпай алу оңайға соқпайды. Өйткені Андрей Ферапонтов баптайтын команда соңғы кездесулерде жақсы нәтиже көрсетіп, кез келген қарсыласқа қиындық тудырып жүр.
«Ордабасы» – «Ұлытау»
Матч басталуы: 19:30
Өтетін орны: Қажымұқан Мұңайтпасов атындағы стадион (Шымкент қ.)
Қарсыластар бұған дейін кездеспеген.
Өткен турда «Ордабасы» форс-мажор жағдайға байланысты Қостанайда «Тобылмен» ойнай алмады. Бұл үзіліс командаға қалай әсер еткені белгісіз. Ал премьер-лига дебютанты «Ұлытау» әзірге бірде-бір ойында жеңіске жете алмай келеді. Тоғыз матчта бар болғаны үш гол соққан. Иван Азовскийдің шәкірттері «Ордабасының» мықты қорғанысын бұза ала ма – бұл да үлкен сұрақ.
«Астана» – «Жеңіс»
Матч басталуы: 19:30
Өтетін орны: «Астана Арена» (Астана қ.)
Қарсыластар тарихы:
– Матчтар саны: 5
– «Астананың» жеңісі – 2
– «Жеңістің» жеңісі – 0
– Тең ойындар – 3
Бұл – елордалық екі ұжымның биылғы маусымдағы екінші кездесуі. Бұған дейін командалар 14 мамырда Қазақстан кубогының ширек финалында кездесіп, «Жеңіс» пенальти сериясында жеңіске жеткен болатын. Алайда Премьер-лигада «Астананың» жағдайы әлдеқайда жақсы. Турнир кестесінде олар «Жеңістен» 15 ұпай алда тұр. «Жеңіс» әлі күнге дейін чемпионатта жеңіске жете алмай келеді. Сонымен қатар олар лигада ең көп тең ойнаған команда (6 матч). Алайда дербиде тең нәтиже екі клубты да қанағаттандырмайтыны анық.
25 мамыр
«Жетісу» – «Ақтөбе»
Матч басталуы: 16:00
Өтетін орны: «Жетісу» стадионы (Талдықорған қ.)
Қарсыластар тарихы:
– Матчтар саны: 52
– «Жетісудың» жеңісі – 12
– «Ақтөбенің» жеңісі – 24
– Тең ойындар – 16
9-турдан кейін «Ақтөбе» турнир кестесінде жеке-дара көш бастап тұр. Вячеслав Левчуктың командасы енді сырт алаңда «Жетісуды» жеңіп, көшбасшылығын сақтап қалуға тырысады. «Жетісулықтар» өткен аптада сырт алаңда «Атыраумен» тең ойнаған. Қазіргі статистика «Ақтөбенің» пайдасына жұмыс істеп тұр. Дегенмен, былтыр Талдықорғанда өткен соңғы кездесуде «Жетісу» 2:1 есебімен жеңіске жеткен. Оның үстіне бас бапкер Самат Смақовтың төрт матчтық дисквалификациясының аяқталуы командаға қосымша күш беруі мүмкін.
«Қызылжар» – «Елімай»
Матч басталуы: 18:00
Өтетін орны: «Қарасай» стадионы (Петропавл қ.)
Қарсыластар тарихы:
– Матчтар саны: 4
– «Қызылжардың» жеңісі – 0
– «Елімайдың» жеңісі – 2
– Тең ойындар – 2
Соңғы кездері бұл екі команданың кездесулері – Қазақстан футболындағы ең тартысты матчтардың біріне айналды. Себебі «Елімайдың» бас бапкері Андрей Карпович бұған дейін «Қызылжарды» жаттықтырған. Петропавлдықтар ресми түрде «Елімайды» жеңбегенімен, жуырда өткен кубок ойынында басым түскен болатын. Сонымен қатар өз алаңында олар әзірге «Елімайдан» ұтылған емес. Ал семейлік команда соңғы турда «Қайратты» жеңіп, сәтсіз сериясын тоқтатты.
«Атырау» – «Қайсар»
Матч басталуы: 18:00
Өтетін орны: «Мұнайшы» стадионы (Атырау қ.)
Қарсыластар тарихы:
– Матчтар саны: 47
– «Атыраудың» жеңісі – 19
– «Қайсардың» жеңісі – 13
– Тең ойындар – 15
Бұл турда «Қайсар» сырт алаңда «Атыраумен» кездеседі. Қонақтар өткен турда маусымдағы алғашқы жеңісіне қол жеткізіп, турнир кестесіндегі жағдайын жақсарта түсті. Ал «Атырау» тоғыз ойын қатарынан жеңіліп, тек соңғы турда «Жетісумен» тең түсті. Қос команда да соңғы кезде жиі тең ойнап жүр. Соңғы алты кездесудің төртеуінде жеңімпаз анықталмаған.
«Тұран» – «Тобыл»
Матч басталуы: 20:00
Өтетін орны: «Түркістан Арена» (Түркістан қ.)
Қарсыластар тарихы:
– Матчтар саны: 7
– «Тобылдың» жеңісі – 6
– «Тұранның» жеңісі – 0
– Тең ойындар – 1
«Тұран» командасы үшін Қостанайдың «Тобылы» ең ыңғайсыз қарсылас саналады. Екі клуб арасындағы жеті матчта түркістандықтар тек бір рет тең ойнап, қалған ойындардың бәрінде жеңілген. Жақында өткен Қазақстан кубогының ширек финалында да «сары-жасылдар» басым түскен болатын.