20-21 мамыр күндері футболдан Бірінші лига клубтары арасындағы ел чемпионатының жетінші тур ойындары өтеді. Бұл турда «Қайрат-Жастар» – «Шахтер» және SD Family – «Каспий» командалары кездеседі.
22 мамыр
«Қайрат-Жастар» – «Шахтер»
Басталуы: 16:30
Өтетін орны: Тимур Сегізбаев атындағы академия стадионы (Алматы)
Жетінші турдың шымылдығы бірден турдың басты ойындарының бірімен ашылады. Алматыда «Қайрат-Жастар» Қарағандының «Шахтерін» қабылдайды. Екі команда да шабуылға басымдық бергенімен, қорғаныста жиі қателікке бой алдырады. «Қайраттың» жастары «Екібастұзды» 7:0 есебімен тас-талқан етіп жеңгеннен кейін жеңіске жете алмай жүр. Ал «кеншілер» өткен турда «Ақтөбе-Ж» командасынан әрең дегенде басым түсті. Премьер-лига жолдамасына үміткер ұжым бұл жолы қандай ойын көрсетеді екен?
SD Family – «Каспий»
Басталуы: 17:00
Өтетін орны: «Жас Қыран» стадионы (Алматы)
Алматыда жанкүйерлерді тағы бір тартысты кездесу күтіп тұр. Елорданың SD Family командасы Ақтаудың «Каспийін» қабылдайды. Өткен турдан кейін ақтаулықтар турнир кестесінде жеке-дара көш бастаған еді, сондықтан олар бұл ойынның фавориті саналады. Бұған қоса, өткен маусымда «Каспий» SD Family-ді екі рет жеңген болатын.
Ertis – «Оңтүстік»
Басталуы: 19:00
Өтетін орны: «Орталық» стадион (Павлодар)
Өткен турда сырт алаңда «Жетісаймен» 1:1 есебімен тең түскен павлодарлықтар сол ойында биылғы маусымда алғаш рет өз қақпаларына гол өткізіп алған болатын. Осы нәтижеден кейін олар турнир кестесінде үшінші орынға сырғыды. Бұл жолы бес дүркін Қазақстан чемпионы өз алаңында «Оңтүстікпен» кездесіп, жанкүйерлерін қуантуға тырысады. Алайда қатарынан үш матчта жеңіске жеткен шымкенттіктер төртінші мәрте жеңіске жетуді көздейді.
23 мамыр
«Ақтөбе-Ж» – AKAS
Басталуы: 16:00
Өтетін орны: ОСДЮСШОР стадионы (Ақтөбе)
«Ақтөбе-Ж» биылғы маусымда әлі жеңіске жете алмай келеді. Дегенмен бірқатар мықты қарсыластардан ұпай алып үлгерді. «Қайрат-Жастар» және «Алтаймен» тең ойнаса, «Шахтер» мен Ertis командаларына лайықты қарсылық көрсетті. Енді ақтөбеліктер алғашқы жеңіске қол жеткізуді көздеп отыр. Қарсылас – Бірінші лиганың дебютанты AKAS. Бұл команда да жаңа деңгейге бейімделіп, өз ойынын қалыптастырып келеді. Көрермендерді қызықты ойын күтіп тұр.
«Екібастұз» – «Жетісай»
Басталуы: 16:30
Өтетін орны: «Шахтер» стадионы (Екібастұз)
Бұл екі команда да маусымды тұрақсыз өткізіп келеді. Әсіресе тәжірибелі «Екібастұз» клубы турнир кестесінің соңғы сатысында тұр. Дегенмен командалар әлеуетін көрсетіп үлгерді. «Екібастұз» «Шахтерге» лайықты қарсылық танытса, «Жетісай» Ertis қақпасына гол соққан алғашқы команда атанды. Бұл жолы кім басым түседі екен?
«Хан-Тәңірі» – «Тараз»
Басталуы: 16:30
Өтетін орны: «Хан-Тәңірі» стадионы (Алматы)
Бұл екі команда бірде жақсы, бірде сәтсіз ойын көрсетіп жүр. Қазіргі таңда олар турнир кестесінде қатар орналасқан. Ұпай саны бірдей болғанымен, алматылықтар доп айырмасына байланысты төмен тұр. Алайда бұл ойыннан кейін жағдай өзгеруі мүмкін. «Хан-Тәңірі» өз алаңында жақсы ойнап жүр.
«Түркістан» – «Алтай»
Басталуы: 17:00
Өтетін орны: Октябрь Жарылқапов атындағы стадион (Түркістан)
Жетінші тур Түркістанда аяқталады. Жергілікті команда маусым жаңалығы атанған «Алтайды» қабылдайды. Шығысқазақстандықтар турнир кестесінде үздік үштікке жақын орналасқан. Вахид Масудовтың шәкірттері қорғаныста сенімді ойнап жүр: алты матчтың тек екеуінде ғана гол жіберген. Ал түркістандықтар керісінше, өз қақпасына 13 гол өткізіп алып, аз ғана гол соққан. Бұл кездесуде «Алтай» көшбасшыларға ілесуін жалғастыра ала ма?