19 мамыр күні футболдан әйелдер арасындағы ел чемпионатының алтыншы тур ойындары өтті. Бұл турда турнир кестесінің көшбасшысы үш рет ауысты.
Ойын нәтижелері:
«Қайрат» – «Қайсар» – 4:1
«Ұлытау» – «Елімай» – 1:2
«Астана» – «Тобыл» – 0:0
«Қызылжар» – «Жетісу» – 1:0
«Ақтөбе» – «Атырау» – 19:0
«БИІК-Шымкент» – «Оқжетпес» – 16:0
«Томирис-Тұран» – «Жеңіс» – 4:0
Әйелдер арасындағы ел біріншілігінің алтыншы туры «Қайраттың» ірі жеңісімен басталды. Алматылық ұжым өз алаңында Қызылорданың «Қайсарын» қабылдап, 4:1 есебімен басым түсті. Бұл жеңіс алматылықтарды бірнеше сағатқа болса да турнир кестесінің бірінші орнына шығарды.
Кейін «Елімай» сырт алаңда «Ұлытауды» ұтып, көшбасшылар қатарына жақындады.
Ал «Астана» мен «Тобыл» бір-бірінің қақпасына гол соға алмай, тең тарқасты. Турнир кестесінде қос ұжым бірдей ұпай жинап, қатарласып келеді.
«Қызылжар» мен «Жетісу» арасындағы матчта жалғыз дәл соққы ойын тағдырын шешіп кетті. Петропавлдық команда екінші таймның басында жеңіс голын соқты.
Ал кейінгі ойындар голға тапшылық болған жоқ. «Ақтөбе» өз алаңында «Атырауды» тас-талқанын шығарды. Бірінші таймда-ақ шабуылшы Алина Литвиненко төрт гол соғып (покер), әріптестері де одан қалыспады. Үзіліске дейін таблода 8:0 есебі тіркелді. Ал қорытынды есеп – 19:0. Екінші таймда Литвиненконың орнына Карина Жұмабайқызы шығып, ол да бір таймда төрт гол соқты. Осылайша «Ақтөбе» ірі жеңістен соң көш басына көтеріліп, «Қайратты» ығыстырды.
Алайда «қызыл-ақтар» бір сағаттан кейін турнир кестесіндегі орынын Шымкенттің БИІК командасына босатып берді. Шымкенттіктер өз алаңында «Оқжетпесті» 16:0 есебімен жеңіп, топ басын қайта өз қолына алды. Бұл ойында БИІК сапынан Гүлнара Габелия алты рет мергендік танытып, гекса-трик жасады.
Турдың соңғы кездесуінде «Томирис-Тұран» «Жеңісті» 4:0 есебімен жеңіп, ұпай саны бойынша «БИІК-Шымкент» пен «Ақтөбені» қуып жетті. Бірақ гол айырмашылығы бойынша олардан кейін тұр.
Жетінші тур ойындары:
22 мамыр
«Атырау» – «Томирис-Тұран»
«Елімай» – «Ақтөбе»
«Жеңіс» – «Қайрат»
«Тобыл» – «БИІК-Шымкент»
23 мамыр
«Жетісу» – «Астана»
«Қайсар» – «Қызылжар»
«Оқжетпес» – «Ұлытау»