17-18 мамыр күндері футболдан ел біріншілігінің тоғызыншы турының ойындары өтті. Тур қорытындысы бойынша турнир кестесінде көшбасшы өзгерді.
Ойын нәтижелері:
«Оқжетпес» – «Ақтөбе» – 1:3
«Атырау» – «Жетісу» – 1:1
«Ұлытау» – «Астана» – 0:2
«Жеңіс» – «Қызылжар» – 0:0
«Қайсар» – «Тұран» – 1:0
«Елімай» – «Қайрат» – 1:0
«Тобыл» – «Ордабасы» – кейінге шегерілді
17 мамыр
«Оқжетпес» – «Ақтөбе» – 1:3
Кейінгі екі турда сырт алаңда жеңіске жеткен көкшетаулықтар өз алаңында жеңісті жолын жалғастыра алмады. Ойынның 14-минутында Тимур Досмағамбетов есепті ашып, жергілікті жанкүйерлерді қуантқанымен, үзіліске санаулы минуттар қалғанда Оралхан Өміртаев таразы басын теңестіріп кетті. Екінші таймда қонақтар шабуылда қарқынын үдетіп, Жайро Жан екі мәрте мергендігімен көзге түсті. Сырт алаңда маңызды жеңісіне қол жеткізген Вячеслав Левчук шәкірттері турнир кестесінде көш бастады.
«Атырау» – «Жетісу» – 1:1
Турнир кестесінде көршілес орналасқан қос команданың жолы 9-турда тоғысып, бір-бірімен тең түсті. Бұл – «Атыраудың» чемпионаттағы алғашқы тең ойыны болса, қонақтар бесінші мәрте ұпай бөлісуге мәжбүр болды. Бұған дейін «Атырау» қатарынан тоғыз ойында жеңілсе, «Жетісу» маусым басталғалы 4 мәрте қарсыласына жол берген. Кездесудің екінші таймында қонақтар сапынан Руслан Болов пенальтиден есеп ашып, «Жетісу» алғашқы жеңісіне жақын болған еді. Алайда матчтың қосымша минутында мұнайшылар таразы басын теңестіріп кетті – 1:1.
18 мамыр
«Ұлытау» – «Астана» – 0:2
Жеті дүркін ел чемпионы соңғы турда «Тобылдан» жеңіліп, артынша Қазақстан кубогынан шығып қалған болатын. Дегенмен чемпионат дебютантымен өткен ойында «Астана» футболшылары шеберлігін көрсетті. «Ұлытау» барын салғанымен, Назми Грипши мен Станислав Басманов соққан екі гол елордалықтарға жеңіс сыйлады. Жезқазғандықтар әлі күнге дейін бірде-бір ойында жеңіске жете алмай, турнир кестесінің соңғы сатысына сырғыды.
«Жеңіс» – «Қызылжар» – 0:0
Елорданың «Жеңіс» клубы да әлі күнге дейін чемпионатта жеңістің дәмін татып көрген жоқ. Ел кубогының жартылай финалына жеткен командаға Премьер-лигада әр ұпай оңайлықпен келіп жатқан жоқ. Бұл жолы астаналықтар өз алаңында «Қызылжармен» тең ойнап, чемпионаттағы алтыншы тең ойынын тіркеді. Петропавлдықтар бір ұпайдың арқасында сегізінші орынға көтерілді.
«Қайсар» – «Тұран» – 1:0
Тоғызыншы турдан кейін чемпионатта жеңіске жетпеген командалар саны біреуге азайды. Бес ойында жеңіліп, төрт матчта тең ойнаған Қызылорданың «Қайсары» алғаш рет жеңіске жетті. Өз алаңында Түркістанның «Тұранын» қабылдап, Айбар Жақсылықовтың 78-минутта пенальтиден соққан жалғыз голы командаға ұзақ күттірген жеңісті сыйлады.
«Елімай» – «Қайрат» – 1:0
Кейінгі екі турда қатарынан жеңілген Семейдің «Елімай» клубы бұл турда турнир кестесінде көш бастап тұрған Алматының «Қайратын» қабылдады. Екі команда да Қазақстан кубогынан шығып қалған болатын. Бұл ойында екі ұжымға да жеңіс ауадай қажет еді. «Елімай» жеңіссіз сериясын тоқтатқысы келсе, «Қайрат» көшбасшылықты сақтап қалғысы келді. Матчтың 90-минутына дейін қарсыластар бір-бірінің қақпасына гол соға алмай, тең нәтиже келіскендей еді. Алайда ойынның соңғы минуттарында Иван Свиридов гол соғып, командасына маңызды жеңіс сыйлады. Чемпионатта алғаш рет жеңілген «Қайрат» турнир кестесінде екінші орынға түсті.
«Тобыл» – «Ордабасы»
Шымкент командасы ауа райының қолайсыздығына байланысты Қостанайға ұша алмай, матч кейінге шегерілді.
10-тур ойындары:
24 мамыр
«Қайрат» – «Оқжетпес»
«Астана» – «Жеңіс»
«Ордабасы» – «Ұлытау»
25 мамыр
«Жетісу» – «Ақтөбе»
«Қызылжар» – «Елімай»
«Атырау» – «Қайсар»
«Тұран» – «Тобыл»