17–18 мамыр күндері Қазақстан Премьер-лигасының тоғызыншы тур ойындары өтеді. Белгілі спорт журналисі Всеволод Хван KFF League порталына алдағы турға қатысты өз болжамын ұсынды.
«Оқжетпес» – «Ақтөбе»
Бұл – турдағы ең қызықты кездесулердің бірі. Екі команда да бабында, қатарынан бірнеше ойында жеңілмей келеді. Көкшетаулық клуб маусым басынан бері жақсы ойын өрнегімен көзге түсіп жүр. Сонымен қатар турнир кестесінде көшбасшыларға жақын орналасқан. Оның үстіне, алаң иелері өз алаңында өте сенімді ойнайды. «Ақтөбе» үшін бұл оңай сапар болмайды. Болжамым – «Оқжетпес» жеңілмейді, ойын тең нәтижемен аяқталады.
«Атырау» – «Жетісу»
9-турда әзірге сәтсіз өнер көрсетіп жатқан екі команданың ойынын тамашалаймыз. Қызығы сол, маусым басталғалы бірде-бір жеңіске жетпеген «Жетісу» бір мәрте жеңіске жеткен «Атыраудан» бір ұпай көп жинаған. «Атыраудың» қазіргі жағдайы алаңдатарлық – командаға Бірінші лигаға түсіп қалу қаупі төніп тұр. Бұл матч «Жетісу» үшін де аса маңызды, әсіресе бас бапкер Самат Смақов үшін. Егер бұл жолы да жеңіске жете алмаса, қызметінен кетуі әбден мүмкін. Осыны ескере отырып, «Жетісу» аздап фаворит саналады. Жетісулықтар аз ғана басымдықпен жеңіске жетуі мүмкін.
«Ұлытау» – «Астана»
Елорда командасы төңірегіндегі соңғы аптадағы жағымсыз жаңалықтар клуб ойынына әсер етуі мүмкін. Алаң иелері әрі чемпионаттың басты аутсайдері бұл мүмкіндікті тиімді пайдаланып, сенсация жасауға тырысады. Дегенмен, «Астананың» бұл матчқа немқұрайлы қарауы немесе бойкот жариялауы екіталай. Қиын жағдайға қарамастан, елордалықтар жеңіліс сериясын тоқтатуы тиіс. Бұл ойында Григорий Бабаянның командасы жеңіске жетеді деп ойлаймын.
«Жеңіс» – «Қызылжар»
Апта ортасында Қазақстан кубогында сенсация жасаған екі команда жексенбі күні өзара кездеседі. Жаңа бапкерлерге қарамастан, қос ұжым да жақсы формада. Алайда үш күн ішінде қатарынан екі матч өткізу оңай емес. Бұл кездесуде ойыншылардың физикалық дайындығы шешуші рөл атқарады. Осыны ескере отырып, матч тең есеппен аяқталады деп болжаймын.
«Қайсар» – «Тұран»
Қызылордалықтар бұл маусымда әлі жеңіске жеткен жоқ. Соған қарамастан, легионерсіз өнер көрсетіп жүрген команда өз алаңында «Қайрат» пен «Астанадан» ұпай ала білді. «Қайсар» өз алаңында кез келген қарсыласқа лайықты ойын көрсете алады, сондықтан «Тұранға» бұл матч оңайға соқпайды. Жуковскийдің командасына жабық қорғаныс стиліндегі қарсыластармен ойнау қиынға соғатыны байқалады. Сондықтан бұл ойында не тең нәтиже тіркеледі, не «Тұран» аз ғана басымдықпен жеңіске жетеді.
«Тобыл» – «Ордабасы»
Турдың тағы бір қызықты кездесуі Қостанайда өтеді. Жанкүйерлерді турнир кестесінің жоғарғы бөлігінде орналасқан екі команда арасындағы тартысты матч күтіп тұр. Бұл ойынды чемпиондардың теке-тіресі деуге болады: бірі – 2021 жылғы, екіншісі – 2023 жылғы ел чемпионы. «Ордабасының» маусымды сәтсіз бастауы бастапқы турлардағы ойын кестесіне байланысты болды деп ойлаймын. Қазір шымкенттіктер жағдайды түзеп, жақсы қарқынға ие. «Тобыл» да осал емес. Бұл ойында бір ғана гол ойын тағдырын шешіп кетуі мүмкін немесе матч тең нәтижемен аяқталады.
«Елімай» – «Қайрат»
«Елімай» мен «Қайрат» арасындағы матчты турдың басты кездесуі деуге болады. Семейлік команда қатарынан үш матчта жеңіліп, апта ортасында Қазақстан кубогынан шығып қалды. Клуб басшылығын бұл жолы тек жеңіс қанағаттанады. Әйтпесе, команда бас бапкері Андрей Карповичпен қоштасуға мәжбүр болуы мүмкін. Оның үстіне дәл қазіргі чемпионмен өтетін матчта өз әлеуетін көрсетуге зор мүмкіндік туып тұр. Ал «Қайрат» та апта ішінде Қазақстан кубогынан шығып қалды: «Ордабасыға» есе жіберіп, маусымдағы алғашқы жеңілісіне ұшырады. Соған қарамастан, чемпионатта олар әлі жеңілмей, көш бастап келеді. Бұл матчтың нәтижесін болжау қиын. Дегенмен, «Елімайдың» аз ғана басымдықпен жеңіске жетуі мүмкін деп ойлаймын.