Кәсіби клубтар арасында жарыстар өткізу дирекциясы футболдан Қазақстан Бірінші лигасының 2025 жылғы сәуір айындағы үздіктерін анықтады.
Жаңа маусымның алғашқы айында үздік футболшысы болып «Тараз» шабуылшысы Әлішер Сүлей танылса, «үздік бапкер» номинациясына жақында клубтан кеткен, Ertis командасының экс-бас жаттықтырушысы Қайрат Нұрдәулет лайық болып шықты.
«Үздік ойыншы» номинациясының иегері турнирге қатысушы командалардың капитандары мен бапкерлерінің дауыс беруі арқылы анықталды. Ал «Үздік бапкерді» командалардың бас бапкерлері өзара дауыс беру арқылы таңдады.
Сәуір айында «Тараз» футболының түлегі, шабуылшы Әлішер Сүлей үш матч өткізіп, екі гол соқты. Алдымен «Жетісай» қақпасынан саңылау тапса, одан кейін Өскеменнің «Алтай» клубына да мергендік танытты.
Ал Ertis командасы сәуір айында үш матч өткізіп, үш ойында да жеңіске жетті. Қайрат Нұрдәулеттің жетекшілігімен команда «Екібастұз», «Ақтөбе Ж», «Қайрат-Жастар» командасынан басым түсті.