Футболдан Қазақстан Премьер-лигасының тоғызыншы тур ойындары 17-18 мамыр күндері өтеді. Бұл турда жанкүйерлерді «Тобыл» мен «Ордабасы», «Елімай» мен «Қайрат» арасындағы тартысты ойындар күтіп тұр.
17 мамыр
«Оқжетпес» – «Ақтөбе»
Басталуы – 16:00
Өтетін орны: «Оқжетпес» стадионы (Көкшетау қаласы)
Премьер-лиганың турнир кестесінде екінші орында тұрған «Ақтөбені» Көкшетауда қиын ойын күтіп тұр деуге толық негіз бар. Көкшетаулықтар Семей мен Талдықорғанда өткен сырт алаңдағы тартысты матчта жеңіске жетіп, турнирлік кестеде 5-орынға көтеріліп алды. Қазір «Оқжетпес» бабында. Ал «Ақтөбе» сәрсенбі күні сырт алаңда «Қайсармен» ойнап, көп күш жұмсап жеңіске жетті. Вячеслав Левчук шәкірттері Көкшетаудағы ойынға дейін қалпына келе ала ма? Тоғызыншы турдың шымылдық ашар матчындағы нәтижеге осы жағдай көп әсер етуі мүмкін.
«Атырау» – «Жетісу»
Басталуы – 17:00
Өтетін орны: «Мұнайшы» стадионы (Атырау қаласы)
«Жетісу» – осы уақытқа дейін бірде-бір мәрте жеңіске жетпеген ҚПЛ-дағы төрт команданың бірі. «Атырау» маусымды сәтті бастағанымен, кейін қатарынан тоғыз ойында жеңіліп, турнир кестесінің соңғы сатысына сырғыды. Екі команда да осы турда жағдайын түзетуге тырысады. «Жетісудың» бас бапкері Самат Смақовтың дисквалификациясына байланысты бұл ойында да командасына көмектесе алмайтыны маңызды фактор. Тағы бір қызық дерек – «Атырау» бұл қарсыласын өз алаңында ең соңғы рет 2019 жылдың шілдесінде жеңген. Былтырғы маусымда екі команда да бір-бірін тек қонақта жеңген еді.
18 мамыр
«Ұлытау» – «Астана»
Басталуы – 16:00
Өтетін орны: «Металлург» стадионы (Жезқазған қаласы)
Премьер-лиганың жаңа қатысушысы сегіз турдан кейін небәрі екі ұпай жинап, турнир кестесінің соңында тұр. Бұл турда олар ел чемпионы атағын жеті рет жеңіп алған «Астанаға» қарсы ойнайды. Астаналықтар жақында ғана Қазақстан кубогынан шығып қалды, сондықтан Жезқазғанда жеңіске жетуге тырысады. Бірақ «Ұлытау» өз алаңында, жанкүйерлерінің қолдауы арқасында барын салып ойнайтыны анық.
«Тобыл» – «Ордабасы»
Басталуы – 18:00
Өтетін орны: «Тобыл Арена» (Қостанай қаласы)
Қазіргі таңда екі команда үздік үштікке енбесе де, олардың арасындағы ойын тоғызыншы турдың басты кездесулерінің бірі болмақ. Екі команда да жуырда Қазақстан кубогының жартылай финалына шықты. Бұған қоса, «Тобыл» соңғы турда сырт алаңда «Астананы» жеңді. Ал «Ордабасы» Премьер-лигада қатарынан бес ойын, ал барлық турнирде алты ойын бойы жеңілген жоқ. Бұл матчта қай команда жеңісті сериясын жалғастыра алады екен?
«Қайсар» – «Тұран»
Басталуы – 18:00
Өтетін орны: Ғани Мұратбаев атындағы стадион (Қызылорда қаласы)
Бұл командалар да сәрсенбі күні ойын өткізіп, екеуі де жеңіліп қалды. «Қайсар» 16-турдың кейінге шегерілген ойынында «Ақтөбеден» 1:2 есебімен жеңілді. «Тұран» болса, Қазақстан кубогының ширек финалында «Тобылдан» ұтылып, жарыс жолынан шығып қалды. Бұл жолы қай ұжым жеңетінін болжау қиын. Қызылордалықтар бұл турда өз алаңы мен жанкүйерлерінің қолдауы аясында ойнайды. Сондай-ақ «Қайсар» әлі күнге дейін жеңіске жетпегенімен, өз алаңында «Қайрат» пен «Астанадан» ұпай ала білді.
«Жеңіс» – «Қызылжар»
Басталуы – 19:30
Өтетін орны: «Астана Арена» (Астана қаласы)
Тоғызыншы турда Қазақстан кубогының ширек финалында сенсация жасаған «Жеңіс» пен «Қызылжар» командалары кездеседі. Екі ұжым да турнир фавориттері – «Астана» мен «Елімайды» жеңіп кетті. Бірақ чемпионатта «Жеңіс» әлі күнге дейін жеңіс тойын тойлаған жоқ. Ал петропавлдықтар жаңа бас бапкер Милич Чурчичтің келуімен турнир кестесіндегі жағдайын біршама жақсартып алды. Екі команда турнир кестесінде қатар тұр, бірақ арада 6 ұпай айырмашылығы бар. Бұл айырма «Астана Аренада» қысқара ма, әлде ұзара ма екен?
«Елімай» – «Қайрат»
Басталуы – 20:00
Өтетін орны: «Спартак» стадионы (Семей қаласы)
Турдың соңғы матчында кубок бәсекесін аяқтаған екі команда кездеседі. Екеуіне де өз әлеуетін дәлелдеу маңызды. «Елімай» Премьер-лигада екі ойында қатарынан жеңіліп, бірде-бір гол соққан жоқ. Ал көш бастап тұрған «Қайрат» екінші орындағы «Ақтөбеден» бір ғана ұпайға озып тұр. Егер «Қайрат» Семейдегі матчта жеңілсе, бірінші орынды «Ақтөбеге» беріп қоюы мүмкін. Өткен маусымда да «Елімай» өз алаңында болашақ чемпиондарды соңғы минутта тең нәтижеге мәжбүр еткен еді. Бұл жолы да алматылықтар үшін сырт алаңдағы ойын оңай болмайтыны анық.