ҚПЛ-дың сегізінші турында «Тобыл» сырт алаңда «Астананы» ірі есеппен жеңіп (1:3), кішігірім сенсация жасады. Кездесудің басты қаһармандарының біріне айналған «сары-жасылдардың» беларусиялық шабуылшысы Николай Сигневич KFF League тілшісіне сұхбат беріп, ойын туралы пікірін білдірді. Сондай-ақ жарақаттан кейін алаңға қайта оралуы мен Беларусь пен Қазақстан құрамалары арасындағы алдағы кездесуден не күтетінін айтып өтті.
– Николай, жеңіс құтты болсын! Ойын туралы не айтасыз?
– Рақмет. Өздеріңіз көргендей, өте жақсы ойын болды. Әсіресе бірінші таймдағы ойынымыз көңілімізден шықты. Екінші таймның соңғы 10–15 минуты сәл уайыммен өтті. Дегенмен, жеңіске жеткенімізге қуаныштымын. «Астана Аренада» гол соққаныма да ерекше қуанып тұрмын.
– Қатарынан екінші турда мергендігіңізбен көзге түсіп отырсыз. Бұл бабыңызға қайта келе бастағаныңызды білдіре ме?
– «Оқжетпеспен» өткен ойында жарақат алып, тек бір тайм ғана ойнадым. Одан кейінгі кездесулерге қатыса алмадым. Кейін «Қайратпен» болған матчта алаңға қосалқы құрамнан шығып, бір тайм ойнадым. Сондықтан жарақаттан кейін толық ойнағаным – осы екі матч қана. Өткен ойында да, бұл жолы да гол соққаныма қуаныштымын.
– ҚПЛ-дың былтырғы маусымында үздік сұрмерген атандыңыз. Биыл бұл жетістікті қайталау жоспарыңызда бар ма?
– Әрине, әрдайым өзіме жоғары мақсат қоямын. Биыл да үздік сұрмерген болғым келеді. Ондай ниет бар. Қасымда жақсы серіктестерім барда, бұл мақсатқа жетуге болады. Қалғаны – уақыттың еншісінде.
– Алда Қазақстан мен Беларусь ұлттық құрамалары Минскіде жолдастық матч өткізеді. Бұл кездесуден не күтесіз?
– Қызықты ойын болады деп ойлаймын. Екі команданың да деңгейі шамалас. Мүмкін, Беларуське өз алаңында ойнағанының көмегі тиіп қалар. Нақты болжам жасау қиын, бірақ матч тартысты болатыны анық.
– Ұлттық құрамалар деңгейі өзінен бір саты жоғары командалармен ойнауы керек деген пікірге қалай қарайсыз?
– Меніңше, барлық қарсыласпен ойнау керек. Мысалы, Франциямен ойнасаң, жеңілесің. Бірақ ондай кездесулерден мол тәжірибе аласың. Әрине, тек ТОП құрамалармен ғана емес, өз деңгейіңдегі командалармен де ойнау керек. Даму тек мықтылармен емес, осындай тепе-тең қарсыластармен ойнаудан да келеді.
– Сізді ұлттық құрамаға көптен бері шақырмай жүр. Алдағы ойындарға шақырту күтесіз бе?
– Бұл – бапкерлер штабының шешімі. Менің қолымнан келетіні – жаттығу жасап, өз үстімде жұмыс істеу. Шақырса – қуанамын, шақырмаса – жұмысымды әрі қарай жалғастыра беремін.
– Биылғы маусымдағы жеке мақсаттарыңыз қандай?
– Мақсатым – командаға көмектесу. Көбірек гол соғып, нәтижелі пас беру арқылы пайдамды тигізгім келеді. Арнайы жеке мақсаттар қойған жоқпын.