12 мамырда футболдан әйелдер арасындағы ел чемпионатының бесінші тур ойындары өтті. Осы турдан кейін Шымкенттің «БИИК-Шымкент» командасы турнир кестесінде көш бастады.
Матч нәтижелері:
«Ұлытау» – «Ақтөбе» – 0:9
«Тобыл» – «Қызылжар» – 0:4
«Оқжетпес» – «Астана» – 0:2
«Жеңіс» – «Атырау» – 4:0
«Жетісу» – «Қайрат» – 1:4
«БИИК-Шымкент» – «Елімай» – 9:0
«Қайсар» – «Томирис-Тұран» – 0:1
Бесінші тур ойындары Жезқазғанда «Ұлытау» мен «Ақтөбе» арасындағы матчпен басталды. Ақтөбелік қонақтар сырт алаңда еш қиындықсыз «Ұлытауды» ірі есеппен жеңіп кетті. «Ақтөбе» футболшылары бірінші таймда-ақ басымдықты өз қолына алып, алаң иелері қақпасына жауапсыз төрт гол соқты. Екінші таймда да басымдықтарын үдете түсіп, қарсыластарын 9:0 есебімен ойсырата жеңді. Кездесуде Алина Литвиненко төрт голдың авторы атанды.
Сондай-ақ Қостанайға қонаққа барған Петропавлдың «Қызылжары» да қарсыластарын ірі есеппен қапы қалдырды. Жергілікті «Тобыл» командасымен кездескен «Қызылжар» футболшы қыздары 4:0 есебімен жеңіске жетіп, чемпионаттағы қатарынан төртінші жеңісіне қол жеткізді.
Елорданың «Астана» клубы мен Көкшетаудың «Оқжетпесі» төртінші тур қорытындысынан кейін турнир кестесінің соңғы екі сатысында орналасқан болатын. Екі команда да бірде-бір жеңіске жете алмаған еді. Бесінші турда астаналық ұжым жеңіліссіз серияны тоқтатып, маусымдағы алғашқы үш ұпайын олжалады. Ал «Оқжетпес» әлі де ұпай жинай алмай отырған жалғыз команда болып қалды.
Бесінші турда елордадан тағы бір клуб – «Жеңіс» те жеңіске жетті. Олар өз алаңында «Атырауды» қабылдап, қонақтардың қақпасына жауапсыз төрт гол соқты. Бұл – «Жеңіс» командасының чемпионаттағы алғашқы ірі жеңісі екенін айта кеткен жөн.
«Жетісу» мен «Қайрат» арасындағы ойында алматылықтар тоғызыншы минутта-ақ екі гол айырмасымен алға шықты. Тайм соңында талдықорғандықтар өз қақпасына автогол соғып алды. Бұл сәттен кейін матчтың тағдыры шешілгендей болды. Екінші таймда командалар бір-бір голдан соқты. Нәтижесінде қонақтар 4:1 есебімен сенімді жеңіске жетті.
Шымкенттің «БИИК-Шымкент» клубы бесінші турда өз алаңында «Елімайды» қабылдап, кезекті ірі жеңісіне қол жеткізді. Шымкенттіктер бірінші таймда қонақтар қақпасынан төрт мәрте саңлау тапса, екінші таймда бес гол соғып, таблодағы есепті 9:0-ге жеткізді. «БИИК-Шымкент» шабуылшысы Гүлнара Габелия бұл ойында тағы бір мәрте хет-трик авторы атанды.
Турнир кестесінде үздіктер қатарында келе жатқан Түркістанның «Томирис-Тұран» клубы да сырт алаңда «Қайсарды» жеңіп, кезекті жеңісіне қол жеткізді. Дегенмен алаң иелері үш ұпайды оңайлықпен бергісі келмеді. Түркістандық ұжым бұл кездесуде небәрі бір ғана гол соға алды. Сондықтан олар доп айырмашылығы бойынша «БИИК-Шымкентке» жол беріп, турнир кестесінде екінші орынға түсіп қалды.
Алтыншы тур ойындары 19 мамырда өтеді:
«Қайрат» – «Қайсар»
«Ұлытау» – «Елімай»
«Астана» – «Тобыл»
«Қызылжар» – «Жетісу»
«Ақтөбе» – «Атырау»
«БИИК-Шымкент» – «Оқжетпес»
«Томирис-Тұран» – «Жеңіс»