8–9 мамыр күндері футболдан Бірінші лига біріншілігінің бесінші тур ойындары өтеді.
8 мамыр
«Ақтөбе-Ж» – «Қайрат-Жастар»
Басталуы: 14:00
Стадион: ООРМБЖМ (Ақтөбе қаласы)
Ақтөбелік жастар биылғы маусымда әзірге жеңіске жете алмай келеді. Десе де бұған дейінгі екі ойында олар сырт алаңда «Екібастұз» бен «Алтайдан» ұпай ала білді. Бұл турда «Ақтөбе-Ж» өз алаңында Алматының «Қайрат-Жастар» командасын қабылдайды.
«Түркістан» – «Тараз»
Басталуы: 14:00
Стадион: О. Жарылқапов атындағы стадион (Түркістан қаласы)
Түркістанның «Түркістан» клубы да биылғы маусымда әзірге ұпай еншілей алмай, турнир кестесінің соңғы сатысында тұр. Ғалымжан Төлегенов жаттықтыратын команда осы турда жеңіске жетіп, үш ұпай алуға тырысады. Алайда жоғары топқа ұмтылып жүрген «Тараз» ұжымы да оңай қарсылас емес. Өткен турда Нұркен Мәзбаевтың шәкірттері «Каспийге» есе жіберген болатын.
Ertis – AKAS
Басталуы: 19:00
Стадион: Орталық стадион (Павлодар қаласы)
Бұл екі команда өткен маусымда Екінші лигада ойнаған. Алайда олар әртүрлі конференцияда болғандықтан, өзара кездеспеген. Сондықтан бұл – олардың тарихтағы алғашқы кездесуі. Ertis бұл матчта айқын фаворит саналады. Өткен турда алғашқы ұпайларын жоғалтқанымен, павлодарлықтар әлі өз қақпасына гол жібермеген жалғыз команда. Ал AKAS қорғаныста сенімсіз, шабуылда да Ertis-пен салыстырғанда әлсіздеу көрінеді.
SD Family – «Оңтүстік»
Басталуы: 16:30
Стадион: «Жас Қыран» (Алматы қаласы)
SD Family клубы турнир кестесінде төртінші орында келеді. Матчтарын Алматыда өткізіп жүрген астаналық командаға оңтүстік астанада ойнау қиындық туғызып жатқан жоқ. Бұл жолы олар өткен турда алғашқы ұпайларын еншілеген «Оңтүстікпен» кездеседі.
9 мамыр
«Екібастұз» – «Шахтер»
Басталуы: 14:00
Стадион: «Шахтер» стадионы (Екібастұз қаласы)
Қарағандының «Шахтері» бұл турда сырт алаңда «Екібастұзбен» ойнайды. Алайда «кеншілер» дербиінде алаң иелерін фаворит деуге келмейді. Андрей Шумара баптайтын команда маусым басталғалы жеңіске жете алмай, турнир кестесінің соңында тұр. Ал «Шахтер» өткен турда алғаш рет ұпай жоғалтып, басты бәсекелестерінің бірі – павлодарлық Ertis-пен тең ойнаған еді.
«Хан-Тәңірі» – «Жетісай»
Басталуы: 16:30
Стадион: «Хан-Тәңірі» (Алматы қаласы)
Кездесу алдында «Жетісай» турнир кестесінде «Хан-Тәңірінен» екі саты жоғары тұр және ұпай саны да соған сәйкес артық. Алматылықтар шабуылда нәтижелі өнер көрсетсе, оңтүстіктік ұжым қорғаныста сенімдірек ойнайды. Бұл кездесуде жанкүйерлер деңгейі шамалас командалар арасындағы тартысты бәсекенің куәсі болады. Матчта алаң иесі ретінде «Хан-Тәңірі» сәл басымдыққа ие болуы мүмкін.
«Каспий» – «Алтай»
Басталуы: 16:30
Стадион: BS Arena (Ақтау қаласы)
Ақтаудың «Каспий» клубы – маусым басынан бері барлық ойында жеңіске жетіп келе жатқан Бірінші лигадағы жалғыз команда. Дегенмен қатарынан бесінші рет жеңіске жету үшін олар біраз тер төгуі тиіс. «Алтай» осы маусымдағы төрт матчтың үшеуінде өз қақпасына гол өткізбеген. Дегенмен, бір ойында – «Тараздан» ірі есеппен жеңілген. Бұл әзірге олардың жалғыз жеңілісі. Ал «Каспий» өткен турда дәл сол «Тараздан» басым түсті. Айта кетейік, былтыр Ақтауда өткен кездесуде «Каспий» «Алтайды» 4:1 есебімен ойсырата жеңген болатын.