Өткен демалыс күндері футболдан Қазақстан Премьер-лигасының 7-тур матчтары өтті. Аталған турда елордалық «Жеңіс» клубы «Астана Арена» стадионында «Ақтөбе» командасын қабылдап, 0:1 есебімен жеңіліп қалды. Матчтан кейін «Жеңіс» командасының жартылай қорғаушысы Кристиан Новак KFF League тілшісіне сұхбат беріп, «Ақтөбемен» өткен ойынды қорытындылады. Сондай-ақ кубоктың қазіргі жағдайына баға беріп, маусымдағы жеке және командалық мақсаттары жайлы айтып берді.
– Кристиан, ойын туралы бір-екі ауыз пікір білдірсеңіз.
– Бізде гол соғатын бірнеше мүмкіндік болды, бірақ оларды пайдалана алмадық. Ал матч басында өз қақпамызға гол өткізіп алдық. Негізі сол сәтте жақсырақ ойнауға болар еді, мүмкін, гол соқтырмауға да болар ма еді. Кейіннен есепті теңестіру үшін шабуылдап, гол соққымыз келгенімен, бәрібір гол соғуға шамамыз жетпеді.
– Матч бойы команда шабуылда белсенді болғанымен, өз мүмкіндіктеріңізді пайдалана алмадыңыздар. Мұның себебі неде деп ойлайсыз?
– Кейбір соққыларымыз қорғаушылардан кері қайтып жатты, кей сәттерде допты сәл ертерек тебу керек еді, бірақ біз соққы жасауға ыңғайлы сәт күтіп жүрдік. Бұл бағытта әлі де жұмыс істеуіміз керек – біз жеткілікті деңгейде гол соғып жүрген жоқпыз. Бірінші таймда Димаш баспен гол соғатын тамаша мүмкіндікке ие еді. Егер сол сәтте гол соқсақ, ойын әлдеқайда жеңіл болар еді. Бізге жиірек соққы жасап, ұрымтал сәттерді өз пайдамызға асыру керек.
– «Жеңіс» әзірге бірде-бір ойында жеңіске жете алмай келеді. Сіздің ойыңызша, осы сәтсіздік сериясы қашан аяқталады?
– Біз әр ойынға жеңіске жету мақсатымен шығамыз. Әр матчта 2-4 тамаша мүмкіндігіміз болады, бірақ оларды жүзеге асыра алмай жүрміз. Басты мәселе – осында. Біз әр ойында бір ғана гол соғамыз. Кубокта «Ақтөбені» жеңдік, бірақ ол ойын да 1:0 есебімен аяқталды. Бізге көбірек соққы жасап, гол соғу керек. Мүмкіндіктер бар – бұл ең бастысы.
– Лига туралы айтсақ. ҚПЛ-ді сіз ойнаған Польша, Хорватия немесе Ирландия чемпионаттарымен салыстыра аласыз ба?
– Мұндағы деңгей жаман емес. Кейбір командалар еурокубоктарда ойнайды. Чемпионат физикалық тұрғыда қиын, кей матчтарда футболдан гөрі күрес басым. Бірақ жалпы алғанда, Қазақстанда жақсы футболшылар көп және лига деңгейі өсіп келеді.
– Неліктен карьераңызды Қазақстанда жалғастыруды қаладыңыз?
– Өткен маусымда бас бапкер Леван болды. Ол маған қоңырау шалып, команданың ойынын қалай құратынын түсіндірді. Мен клубтың құрылымына, жанкүйерлеріне, жалпы жұмыс істеу жүйесіне назар аудардым. Келіп көрейін деп шештім – ұнады. «Жеңісте» өзімді жақсы сезінемін. «Астана Арена» – тамаша стадион. Биыл барлық үй ойындарын елордада өткізіп жатырмыз, бұрынғыдай Қарағандыға барып жүрген жоқпыз. Қала, клуб – бәрі көңілімнен шығады. Клуб та менің ойыныма риза деп ойлаймын.
– «Жеңістің» маусымдағы мақсаттары қандай?
– Біз әр матчқа жеке қараймыз. Басты мақсат – ұпай еншілеп, турнир кестесінде қауіпсіз аймақтан шығу. Сосын әрі қарай үлкен мақсаттарға ұмтыламыз. Біз кубок жолындағы жорығымызды жалғастырамыз. Алда «Астанаға» қарсы матч бар. Бірақ қазір ең маңыздысы – жұма күні «Қайратпен» өтетін ойын. Бізге жеңіске жетіп, көбірек ұпай жинауды бастау керек.