3-4 мамыр күндері футболдан Қазақстан Премьер-лигасының жетінші тур ойындары өтті. Бұл турда Қызылордада күтпеген нәтиже және Семейде сенсация тіркелді. Сондай-ақ тек бір ғана команда өз алаңында жеңіске жетті.
Ойын нәтижелері:
«Ұлытау» – «Қайрат» – 1:4
«Жеңіс» – «Ақтөбе» – 0:1
«Атырау» – «Ордабасы» – 1:2
«Тұран» – «Жетісу» – 0:0
«Қайсар» – «Астана» – 1:1
«Елімай» – «Оқжетпес» – 0:2
«Тобыл» – «Қызылжар» – 2:1
3 мамыр
«Ұлытау» – «Қайрат» – 1:4
Жетінші турдың алғашқы ойындары Жезқазған мен Астанада өткен екі матчпен басталды. Жезқазғанда «Ұлытау» Алматының «Қайратын» қабылдап, ірі есеппен жеңіліп қалды. Жергілікті команда ел чемпионына бірінші таймда ғана қарсы тұра алды. Тек бір ғана гол өткізіп алғаны болмаса. Ал екінші таймда қонақтар ойынды толық өз бақылауына алып, «Ұлытау» қақпасына тағы үш гол соқты. Осылайша таблодағы есеп 4:0-ге жеткенде, алматылық ұжым сәл босаңсып, алаң иелері жұбаныш голын соқты. Алайда бұл гол матч тағдырына әсер ете алған жоқ. «Ұлытау» жеті турдың ішінде бесінші рет жеңіліп отыр, ал «Қайрат» әлі жеңіліссіз келе жатыр. Айта кетейік, бұл матчта 16 жастағы Дастан Сәтпаев дубльмен көзге түсті.
«Жеңіс» – «Ақтөбе» – 0:1
«Астана Аренада» өткен «Жеңіс» пен «Ақтөбе» арасындағы матч тең жағдайда өрбіді. Кездесудің тағдырын ойынның 9-минутында «қызыл-ақтардың» шабуылшысы Оралхан Өміртаевтың соққан жалғыз голы шешті. Бұдан кейін командалар бір-бірінің қақпасына гол соға алмады. Айта кетейік, аталған ойын бас төреші қызметін атқарған Эльвира Нұрмұстафинаның кәсіби мансабындағы соңғы матчы болды. Ол қоштасу кездесуінде жеті сары қағаз көрсетті.
«Атырау» – «Ордабасы» – 1:2
Шымкенттің «Ордабасы» клубы жетінші турда Атырауға қонаққа барып, қатарынан үшінші жеңісіне қол жеткізді. Ал дағдарыстан әлі шыға қоймаған алаң иелері сегізінші матчта қарсыласына жол берді. Кездесуде шымкенттіктер үзіліске санаулы минут қалғанда есеп ашып, екінші таймның басында басымдықты еселей түсті. Ойын тағдыры шешілді деп тұрған сәтте алаң иелері есеп айырмасын қысқартып, жергілікті жанкүйерлерге үміт отын жаққандай болды. Алайда көп ұзамай «Атырау» сапынан Максим Чирков қызыл қағаз алып, командасын он ойыншымен қалдырды. Сөйтіп «Ордабасы» жеңісін сақтап қалды.
«Тұран» – «Жетісу» – 0:0
Турдың алғашқы тең нәтижесі Түркістанда тіркелді. Талдықорғанның «Жетісу» клубын қабылдаған «Тұран» командасы қарсыласымен 0:0 есебімен тең түсті. Дегенмен, Түркістан командасы жеңіске анағұрлым жақын болды. Алаң иелері қақпаға көбірек соққы жасап, бұрыштамалар да жиі орындады. Сондай-ақ 59-минуттан бастап бір ойыншыға көп болып ойнады. 59-минутта «Жетісу» ойыншысы Диас Орынбасар қызыл қағаз алып, алаңнан қуылған еді.
4 мамыр
«Қайсар» – «Астана» – 1:1
Қызылорданың «Қайсары» осы турда Премьер-лигадағы алғашқы жеңісіне бір табан жақын болды. Екінші таймның орта тұсында Айбар Жақсылықов пенальтиден гол соғып, қызылордалықтарды есепте алға шығарды. 90-минутқа дейін «Қайсар» 1:0 есебімен жеңіп тұрған. Алайда негізгі уақыттың соңғы минутында «Астана» да пенальтиден гол соғып, таразы басын теңестіріп кетті — 1:1.
«Елімай» – «Оқжетпес» – 0:2
Семейдің «Елімай» клубы өз алаңында өткізген алғашқы матчында сәтсіздікке ұшырады. Көкшетаудың «Оқжетпесін» қабылдаған команда 0:2 есебімен жеңіліп қалды. Осылайша қонақтар маңызды үш ұпайға қол жеткізіп, турнир кестесінде ұпай саны бойынша «Елімайды» қуып жетті.
«Тобыл» – «Қызылжар» – 2:1
Жетінші турдың соңғы матчында «Тобыл» мен «Қызылжар» командалары кездесті. Қостанайдағы стадион биыл петропавлдық клуб үшін де «үй» аренасы саналады. Соған қарамастан, «сары-жасылдар» матчтың басынан-ақ ойын тізгінін өз қолына алып, есепті бірінші болып ашты. Алайда үзіліске дейін «Қызылжар» таразы басын теңестіруге мүмкіндік алды. Дегенмен шешуші сәтте «Тобыл» футболшылары екінші голын соғып, жеңісті жұлып алды. Осылайша «Тобыл» осы турда өз алаңында жеңіске жеткен жалғыз команда болды.
Келесі тур ойындары (8-тур):
10 мамыр
«Қызылжар» – «Ұлытау»
«Қайрат» – «Жеңіс»
«Тұран» – «Атырау»
«Астана» – «Тобыл»
11 мамыр
«Жетісу» – «Оқжетпес»
«Ордабасы» – «Қайсар»
«Ақтөбе» – «Елімай»