3–4 мамыр күндері Қазақстан Премьер-лигасының 7-тур ойындары өтеді. Бұл жолы белгілі спорт комментаторы, журналист Ермұхамед Мәулен kffleague.kz тілшісіне алдағы ойындардан не күтетінін және өз болжамын айтты.
«Ұлытау» – «Қайрат»
Бұл матч тартысты болады деп күтемін. «Қайрат» соңғы кездері шаршап жүр. Өте мықты командаларға қарсы ойнады. Күнтізбесі қиындау. Соңғы рет Алматыда «Тобылды» қабылдады. Одан бері демалып үлгерді деп ойлаймын. Сондықтан Жезқазғанда үш ұпай алатынына сенемін. «Ұлытаудың» өз алаңында бір доп соғуы да жаман емес. «Қайрат» – фаворит. Қонақтар қазір турнир кестесінде бірінші орында келе жатыр, ал «Ұлытау» – соңғы орында. Ешқандай сенсация күтпеймін, «Қайрат» жеңіске жетеді.
«Атырау» – «Ордабасы»
Аталған ойынға қатысты нақты пікір білдіру қиын. Алаң иелері бұған дейін «Қайраттан» және «Астанадан» екі рет жеңілді. Команда жаңадан жасақталып жатқандай көрінеді. Қуаныш Қабдоловқа сенім артамыз – өте мықты бапкер. Бірақ үш ұпай ала алмай жүр. «Ер кезегі үшке дейін» деген бар, осы жолы соның реті келіп қалуы мүмкін. Дегенмен, мен командалар тең түседі деп ойлаймын. «Атырау» өз жерінде «Ордабасыға» қарсы сәтті ойнайды. 2022 жылдан бері «мұнайшылар» Шымкент командасына өз алаңында есе жібермеген.
«Жеңіс» – «Ақтөбе»
«Жеңіс» бапкері Акис Вавалиске тағы бір сынақ болғалы тұр. Бұған дейін екі команда Кубокта кездескен. Сол кезде «Жеңіс» 1:0 есебімен басым түскен. Енді сол ерлікті чемпионатта неге қайталамасқа? Бірақ мен бұл ойында да тең нәтиже тіркеледі деп санаймын. «Жеңіс» бұған дейін 5 рет қарсыластарымен тең тарқасқан. Енді алтыншысының кезегі келген сияқты.
«Тұран» – «Жетісу»
«Тұранның» бапкері Виталий Жуковский – өте білікті маман. Ешқандай қорықпай ойнайтын жаттықтырушы. Сондықтан «Тұран» алғашқы минуттан шабуылға лап қояды. Заманауи футбол көрсетеді. Алаң иелерінің үш ұпай алатынына күмәнім жоқ. Аса қатты мәселе болмауы тиіс.
«Қайсар» – «Астана»
«Қайсар» Қызылордада әлі ешкімнен жеңілген жоқ. Барлығы сәтімен болып жатса, өз алаңында тең ойнауға қауқары жетеді.
«Елімай» – «Оқжетпес»
«Елімай» осы маусымда алғаш рет Семейде ойнайды. Андрей Карповичтің шәкірттері жергілікті жанкүйерлер алдында жеңіске жетуді көздейтіні анық. Фессу Плакка, Фейсал Мулич сияқты шабуылшылары бар.
«Елімай» осы маусымда алғаш рет Семейде ойнайды. Андрей Карповичтің шәкірттері жергілікті жанкүйерлер алдында жеңіске жетуді көздейтіні анық. Фессу Плакка, Фейсал Мулич сияқты шабуылшылары бар.
«Тобыл» – «Қызылжар»
Қостанай командасының деңгейі жоғары. Өткен турда Алматыда «Қайраттан» жеңілді. Сондықтан олар ашулы. Осы жолы «Қызылжардан» оңай үш ұпай алуы тиіс. Екеуі де бір стадионда ойнап жүрген командалар. Айтпақшы, «Қызылжардың» жаңа бапкері Милич Чурчич үшін де бұл – қызық матч. Ол бұған дейін «Тобылды» жаттықтырғанын жақсы білесіздер.