3-4 мамыр күндері Премьер-лиганың жетінші тур ойындары өтеді. Бұл турда турнир кестесінде көш бастап тұрған «Қайрат» пен «Астана» клубтары сырт алаңда турнир кестесінің төменгі сатысындағы командалармен кездеседі.
3 мамыр
«Ұлытау» – «Қайрат»
Басталуы: 15:00
Өтетін орны: «Металлург» стадионы (Жезқазған қаласы)
Жетінші турдың шымылдығы Жезқазғанда жергілікті «Ұлытау» мен «Қайрат» клубтары арасындағы кездесумен ашылады. ҚПЛ дебютанты алғашқы 6 турда небәрі 2 ұпай жинап, бір ғана гол соққан. Ал былтырғы ел чемпионының қоржынында 17 ұпай және 17 гол бар. Дегенмен, бұл басымдық алматылықтарға қосымша сенімділік бергенімен, алаң иелері үш ұпайды оңай бере салмас. «Ұлытау» ойыншылары «Қайратқа» қарсы матчта жанкүйерлерін қуанту үшін бар күшін салары сөзсіз. Сонымен қатар «Металлург» стадионындағы жасанды алаң да «Қайратқа» қолайсыздық тудыруы ықтимал.
«Атырау» – «Ордабасы»
Басталуы: 16:00
Өтетін орны: «Мұнайшы» стадионы (Атырау қаласы)
Биылғы маусым басталғалы Премьер-лигада ең көп матч өткізген «Атырау» өз алаңында «Ордабасыны» қабылдайды. «Мұнайшылар» чемпионат аясында «Қайрат» және «Астанаға» қарсы кейінге шегерілген ойындарды қоса алғанда 8 матч өткізген. Соның жетеуінде жеңіліп, тек бірінде ғана жеңіске жеткен. Атыраулықтардың бас бапкерінің міндетін атқарушы Қуаныш Қабдолов шәкірттері жағдайды осы ойында түзетуге тырысады. Алайда, маусым басындағы сәтсіздіктен кейін қатарынан екі матчта жеңіске жетіп, бірде-бір гол жібермеген шымкенттіктер де оңайлықпен ұпай бермесі анық.
«Жеңіс» – «Ақтөбе»
Басталуы: 17:00
Өтетін орны: «Астана Арена» стадионы (Астана қаласы)
Аталған командалар 6 турда тек бір мәрте ғана жеңілген. Дегенмен, «Ақтөбе» жеңіске жеткен ойындар саны бойынша «Жеңістен» басым түсіп, турнир кестесінде 8 ұпай айырмасымен алда келеді. Астаналықтар әзірге бірде-бір ойында жеңіске жете алмай, 6 кездесудің бесеуінде тең түскен. Алайда, олар Қазақстан кубогының 1/8 финалында «Ақтөбені» жарыс жолынан шығарған болатын. Енді қарсыластар Премьер-лига аясында кездеспек. Бұл жолы «Жеңіс» сол жолғы жеңісінің кездейсоқ еместігін дәлелдей ала ма, әлде «Ақтөбе» есе қайтара ма? Бұл сұрақтың жауабын сенбі күні білеміз.
«Тұран» – «Жетісу»
Басталуы: 19:00
Өтетін орны: «Түркістан Арена» (Түркістан қаласы)
Түркістандық команда алтыншы турдан кейін турнир кестесінің бел ортасында келеді. Ал «Жетісудың» жағдайы ауыр. Маусым басталғалы жеңіске жете алмай келе жатқан талдықорғандықтар небәрі 3 ұпай жинап, 6 ойында тек 1 гол соққан. Бас бапкер Самат Смақовтың ойындардан шеттетілуі де жағдайды жақсарта қоймады. Бұл ойында «Тұран» фаворит саналады. Алайда, «Жетісу» бұл болжамдарды теріске шығара ала ма?
4 мамыр
«Елімай» – «Оқжетпес»
Басталуы: 16:00
Өтетін орны: «Спартак» стадионы (Семей қаласы)
Жетінші тур «Елімай» үшін ерекше болмақ. Себебі команда биылғы маусымда алғаш рет өз алаңында ойнайды. Мұндай жағдайда «Оқжетпеске» оңай соқпасы анық. Қалай дегенде де, «Елімайдың» жеңіске жету мүмкіндігі жоғары. Абай облысының өкілдері бұл кездесуге 5 матчтық жеңіліссіз сериямен және қарсыласынан 5 ұпай артық көрсеткішпен келеді.
«Қайсар» – «Астана»
Басталуы: 17:00
Өтетін орны: Ғани Мұратбаев атындағы стадион (Қызылорда қаласы)
Елорданың «Астана» клубы бұл турда Қызылордаға қонаққа барады. Жергілікті «Қайсар» әзірге бірде-бір ойында жеңіске жетпегенімен, турнир кестесінде көш бастап тұрған «Қайраттан» ұпай алғанын айта кеткен жөн. Сондықтан, «Астанаға» бұл матч жеңіл болмауы мүмкін. Қос команда арасындағы кейінгі 3 кездесудің тек бірінде ғана «Астана» жеңіске жеткен, қалған екеуі тең аяқталған болатын.
«Тобыл» – «Қызылжар»
Басталуы: 19:00
Өтетін орны: «Тобыл Арена» (Қостанай қаласы)
Жетінші турдың соңғы ойыны Қостанайда өтеді. Қызығы сол – бұл матчта екі команда да өзін үйдегідей сезінуі мүмкін. Себебі маусым басталғалы «Қызылжар» өз алаңындағы ойындарын дәл осы стадионда өткізіп жүр. Сондықтан, петропавлдықтар үшін бұл алаң таңсық емес. Бұдан бөлек, бас бапкер Милан Чурчич тізгінді ұстағалы бері команда екі матчта қатарынан жеңіске жетіп, кестеде көтерілді. Өткен турда «Қайраттан» жеңілген «Тобыл» бұл жолы өз жанкүйерлері алдында жеңіске жетуге тырысары анық.