«БИІК-Шымкент» клубының бас бапкері Калоян Петков KFF League тілшісіне сұхбат беріп, әйелдер арасындағы жаңа чемпионаттың басталуына қатысты ойын, бәсекелестік деңгейін және команданың алға қойған мақсаттары туралы айтты.
– Калоян мырза, егер мен қателеспесем, сіз БИІК клубына биыл қайта оралдыңыз ба?
– Иә, былтыр шілде айынан бастап клубта кеңесші ретінде жұмыс істедім. Ал осы маусымның басынан бастап бас бапкер қызметіне кірістім.
– Биылғы чемпионатқа бұрын-соңды болмаған 14 команда қатысып жатыр. Осы маусымды алдыңғы жылдармен салыстыра аласыз ба?
– Әрине, әйелдер арасында 14 команданың қатысуымен чемпионат өткізіліп жатқаны – қуанышты жағдай. Бірақ бұл мәселе бойынша менде екі түрлі көзқарас бар. Командалардың үштен бірі әлі мұндай форматқа дайын емес деп ойлаймын. Мүмкін, аймақтарға бөліп ойнау нұсқасын қарастыру қажет пе еді. Дегенмен, чемпионаттың аты чемпионат.
Сондай-ақ көптеген команда мұндай тығыз ойын кестесіне дайын емес. Өйткені біз чемпионатты тым кеш бастадық. Оның үстіне, ұлттық құраманың матчтарына байланысты үзіліс болды, ал одан кейін бірден үзіліссіз ойындар басталып кетті. Бұл белгілі бір қиындықтарды туғызады. Мысалы, біз Чемпиондар лигасына дайындалуымыз керек, ал басқа командалар маусымды аяқтауы тиіс. Чемпионат алғаш рет ұйымдастырылып жатқан соң, бұл – үлкен тәжірибе. Басқа елдердің үлгісіне қарасақ, алғашқы маусымдар әдетте қиын өтеді, кейбір командалар тіпті маусымды аяқтай алмай жатады.
Дегенмен, бәрі сәтті өтіп, 14 клуб маусымды толық аяқтайды деп үміттенемін. Тіпті келесі жылы да олар біріншілікке қатысса екен деймін. Мұны сын емес, менің жеке пікірім деп қабылдаңыздар. Меніңше, 14 командалық форматты сақтап қалу қажет. Әйелдер футболын дамытудың жалғыз әрі тиімді жолы – осы. Турнир айналмалы форматта өтсе де, аймақтарға бөлінсе де – маңыздысы, командалар жеткілікті болып, толыққанды чемпионат өткізілуі тиіс.
– Көптеген клуб легионерсіз ойнап жүр. Осыған байланысты чемпионатта БИІК-ке лайықты қарсылас жоқ деп айтуға бола ма?
– Иә, бұл туралы бұрыннан бері айтылып келеді. Жаздың басынан бастап легионерлерді мемлекеттік қаржы есебінен қаржыландыруға тыйым салатын заң күшіне енді. Бізде ондай мәселе жоқ, өйткені клуб бюджетінің 90 пайызы жекеменшік қаражатпен қамтамасыз етіледі. Бізге меценат Бауыржан Абдубаитов қолдау көрсетіп отыр. Соның арқасында шетелдік ойыншыларды шақырып, олардың жалақысын тек жекеменшік қаржы есебінен төлейміз.
Басқа клубтар да легионер тарту үшін демеушілер табады деп үміттенемін. Қазірдің өзінде «Ақтөбе», «Елімай» секілді клубтар шетелдік футболшы қыздарды шақырып жатыр. Бұл – өте дұрыс шешім. Легионерлерсіз чемпионат дамымайды. Күшті қарсыластармен, әсіресе шетелдік ойыншылары бар командалармен болатын матчтар жергілікті футболшылардың өсуіне ықпал етеді. Қазіргі әлемдік футболда «жергілікті» және «легионер» деген ұғымдар әлдеқашан жойылған. Футбол – әлемдік спорт. Сондықтан легионерлерді тарту – әйелдер футболын дамыту үшін өте пайдалы болары сөзсіз.
– Жазда БИІК клубы Чемпиондар лигасына қатысады. Былтыр команда іріктеу кезеңінен өте алмай қалған еді. Биылғы мақсат қандай?
– Әзірге жеребе тартылған жоқ, сондықтан кіммен ойнайтынымыз белгісіз. Былтыр іріктеу кезеңінен өте алмадық, бірақ биыл қосымша мүмкіндік бар – Чемпиондар лигасының іріктеу кезеңінде топта екінші орын алған командалар Еуропа лигасындағы жорығын жалғастырады. Бұл дегеніміз, бізде кем дегенде өз алаңымызда бір матч өткізу мүмкіндігі болады. Ал бұл – өте маңызды. Әрине, біз Чемпиондар лигасында мүмкіндігінше алысқа баруға бар күшімізді саламыз.