1–2 мамыр күндері футболдан Қазақстан Бірінші лигасының төртінші тур ойындары өтеді. Бұл турдың орталық кездесуінде ҚПЛ жолдамасына үміткер Ertis пен «Шахтер» командалары өзара күш сынасады.
1 мамыр
«Жетісай» – SD Family
Басталуы — 14:00
Өтетін орны: «Орталық» стадион (Жетісай қаласы)
Үшінші турдан кейін қос команда да бірдей ұпай жинап, соғылған және өткізіп алған голдар айырмашылығы бойынша (+1) қатар келеді. Сондықтан бұл кездесуде жеңіске жеткен ұжым көшбасшылар қатарына қосылуға мүмкіндік алады. Айта кетейік, төртінші турда үздік төрттіктегі командалар өзара кездеседі. Былтыр бұл қос команда үш рет кездескен: Қазақстан кубогында елордалық клуб жеңсе, чемпионатта қарсыластар бір-бір ойыннан жеңіске жеткен.
«Шахтер» – Ertis
Басталуы — 14:00
Өтетін орны: «Шахтер» стадионы, қосалқы алаң (Қарағанды қаласы)
Бұл – Бірінші лиганың көктемгі маусымындағы басты ойын болмақ. Қарағандыда тәжірибесі мол, Еурокубокта өнер көрсеткен қос команда кездеседі. Қазіргі таңда екі ұжым да Қазақстан Премьер-лигасына оралу үшін күресіп жатыр. Бұл – аталған клубтардың Бірінші лига деңгейіндегі алғашқы кездесуі. Ойын алдындағы жағдай да қызық: мысалы, павлодарлықтар әлі күнге дейін қақпасына бірде-бір гол өткізбеген болса, «Шахтер» қарсылас қақпасына ең көп — 7 гол соққан.
4-турда қай клубтың мерейі үстем болады? Алаң иелерінің темірдей қорғанысы ма, әлде қонақтардың қуатты шабуылы ма? Қалай болғанда да, жанкүйерлерді қызықты да тартысты ойын күтіп тұрғаны анық.
«Алтай» – «Ақтөбе-Ж»
Басталуы — 14:00
Өтетін орны: «Восток» стадионы (Өскемен қаласы)
Өткен турда ШҚО клубы маусымдағы алғашқы голын өткізіп, сырт алаңда «Тараздан» 0:3 есебімен жеңіліп қалды. Ал «Ақтөбе-Ж» турдың сенсациясын тіркеп, қонақта «Екібастұзбен» 3:3 есебімен тең түсті. Жас «қызыл-ақтар» бұл жолы да өскемендіктерге лайықты қарсылық көрсете ала ма? Айта кетерлігі, өткен маусымда «Алтай» «Ақтөбе» жастар құрамасын екі рет жеңген.
«Қайрат-Жастар» – «Екібастұз»
Басталуы — 16:30
Өтетін орны: Тимур Сегізбаев атындағы академия стадионы (Алматы қаласы)
Бұл ойында өткен турда ұпай жоғалтқан командалар кездеседі. 3-турда «Қайрат» жастары Павлодарда Ertis-тен ұтылса, «Екібастұз» сырт алаңда «Ақтөбе-Ж»-мен тең түсті. Өткен маусымда «Қайраттың» жастар құрамасы «Екібастұзды» екі матчта 7:1 есебімен ойсырата жеңген. Алайда биылғы үш турда алматылықтар «Екібастұздан» да аз гол соғып отыр.
2 мамыр
«Оңтүстік» – «Түркістан»
Басталуы — 14:00
Өтетін орны: БИІК ФО стадионы (Шымкент қаласы)
Үш турдан кейін Бірінші лиганың турнир кестесінің соңында тұрған екі оңтүстік клубы кездеседі. Қазіргі таңда «Оңтүстік» клубы турнир кестесінде соңғы орында тұр. Егер шымкенттіктер оңтүстік дербиде жеңіске жетсе, турнир кестесіндегі жағдайын жақсартып алмақ. Дегенмен бұл ойында үш ұпай «Түркістан» үшін де ауадай қажет. Өйткені әзірге олардың қоржынында бірде-бір ұпай жоқ.
«Тараз» – «Каспий»
Басталуы — 16:30
Өтетін орны: «Орталық» стадион (Тараз қаласы)
Турдың тағы бір маңызды кездесуі — бір кездері Премьер-лигада жиі жолыққан қос клуб арасында өтеді. Ақтаулықтар Ertis және «Шахтермен» бірге турнир кестесінде көш бастап тұр. Ал «Тараз» «Каспийден» үш ұпайға аз жинаған. Егер жамбылдықтар бұл жолы жеңіске жетсе, ұпай саны теңеседі. Өткен маусымда «теңізшілер» Тараздан үш ұпай алып кеткен болатын.
AKAS – «Хан-Тәңірі»
Басталуы — 16:30
Өтетін орны: «Жас Қыран» стадионы (Алматы қаласы)
Төртінші турдың соңғы ойыны алматылық дербимен түйінделеді. Бұл — AKAS пен «Хан-Тәңірінің» тарихтағы алғашқы кездесуі. Екі ұжымның да жағдайы әзірге мәз емес. Жаңадан құрылған AKAS үшін бұл — қалыпты жағдай болса, Алмас Құлшынбаев баптайтын командадан мұндай нәтиже күтпеген жағдай. Дегенмен, бұл кездесуде «Хан-Тәңірі» фаворит саналады.