Шуақты көктемнің алғашқы күнінде Қазақстанда футбол маусымының шымылдығы түрілді. Күздің соңғы айына дейін жалғасатын ел біріншілігінің алғашқы турында командалар жанкүйерлерге тартысты ойындар сыйлады. Назарларыңызға 1-турдың қорытындысын ұсынамыз.
«Атырау» (Атырау) – «Елімай» (Семей) – 2:1
Голдар: Оралбай, 12 (1:0). Мулич, 15 (1:1). Барбоса, 54 (2:1).
Футболдан Қазақстан Премьер-лигасының шымылдығын 1 наурыз күні «Атырау» мен «Елімай» клубы арасындағы ойын ашты. Атырауда өткен матчта «мұнайшылар» өз алаңында барын салып, қонақтарды қапы қалдырды – 2:1.
Кездесудің және биылғы чемпионаттың алғашқы голын «Атыраудың» шабуылшысы Едіге Оралбай соқты. Футбол жанкүйерлері ішкі біріншіліктегі алғашқы голды небәрі 12 минут күтті. Қонақтар жылдам гол өткізіп алса да, салы суға кеткен жоқ. Араға үш минут салып Фейсал Мулич өз атын таблоға жаздыртып, таразы басын теңестірді. Бірінші тайм 1:1 есебімен аяқталды. Екінші тайм бастала сала шабуылды күшейткен алаң иелері 54-минутта өз дегендеріне жетті. Бұл жолы Матеус Барбоса мергендік танытып, жергілікті жанкүйерлерді қуантты – 2:1. Осылайша, «Атырау» ҚПЛ-2025-тегі алғашқы үш ұпайын олжалады.
«Ордабасы» (Шымкент) – «Ақтөбе» (Ақтөбе) – 0:0
Шымкенттегі Қажымұқан Мұңайтпасов атындағы Орталық стадионында жөндеу жұмыстарына байланысты «Ордабасы» өз алаңындағы бірнеше тур ойындарын Түркістанда өткізеді. Чемпионаттың алғашқы турында шымкенттік ұжым «Ақтөбе» клубын қабылдады. Былтырғы ел біріншілігін үздік төрттіктің қатарында аяқтаған қос ұжымның жолдары алғашқы турда-ақ түйісті.
Алғашқы таймда алаң иелері ширақ қимылдап, шабуылға басымдық бергенімен, есеп ашылған жоқ. Екінші таймда қонақтардың белсенділігі артты. Гол соғатын да бірнеше мүмкіндігі болған, алайда олар да мұны пайдалана алмады. Екі клуб та үш ұпай үшін барын салғанымен, чемпиондыққа таласатын үміткерлердің кездесуі тең есеппен аяқталды – 0:0.
«Тобыл» (Қостанай) – «Ұлытау» (Ұлытау) – 2:0
Голдар: Сигневич, 43 (1:0). Чесноков, 74 (2:0).
Қостанайдың «Тобылы» алғашқы турда Премьер-лига дебютанттары «Ұлытау» футболшыларымен кездесіп, қарсыластарына аяушылық танытқан жоқ. Алаң иелері екі таймда да «Ұлытау» қақпасына бір-бір голдан соғып, қонақтардың жігерін құм қылды.
Дегенмен, «Ұлытау» футболшылары алғашқы турда 2021 жылғы ел чемпиондарынан жеңіліп қалса да, жігерлі ойынымен жанкүйерлерге жақсы әсер қалдырды. 40 минут бойы «Тобылға» лайықты қарсылық көрсеткен «Ұлытау» клубының қорғанысы 43-минутта бұзылды. Кезекті өткір шабуыл кезінде Николай Сигневич оңтайлы сәттен мүлт кетпей, жергілікті жанкүйерлерді бір желпіндірді. Ал екінші таймда былтырғы чемпионаттың үздік сұрмергенінің бірі болған Ислам Чесноков 74-минутта есепті еселеп, ойынның нүктесін қойды.
«Қайсар» (Қызылорда) – «Жеңіс» (Астана) – 0:0
Алғашқы турдың екінші күнінде Қызылорданың «Қайсар» клубы алаңға 11 қазақ футболшысын шығарып ерекшеленді. Дегенмен елорданың «Жеңіс» клубымен өткен кездесуде жанкүйерлер гол көрген жоқ. Ойын алдында жауған қар да футболшыларға кедергі келтірген тәрізді – 0:0.
«Тұран» (Түркістан) – «Оқжетпес» (Көкшетау) – 2:0
Голдар: Умаров, 31 (1:0). Згурский, 70 (2:0).
Биыл құрамын Бауыржан Исламхан, Шохбоз Умаров секілді Премьер-лиганың бірнеше тәжірибелі ойыншылармен толықтырған «Тұран» алғашқы турда бір жылдық үзілістен соң жоғары топқа оралған «Оқжетпесті» қабылдап, сенімді жеңіске жетті. Алғашқы минуттардан-ақ белсенді болған алаң иелері сапынан бірінші таймда өзбекстандық Шохбоз Умаров есепті ашса, екінші таймда украиналық Лука Згурский есепті еселеді – 2:0. Осылайша, түркістандық ұжым чемпионаттағы алғашқы үш ұпайын олжалап үлгерді.
«Қызылжар» (Петропавл) – «Жетісу» (Талдықорған) – 1:1
Голдар: Жарынбетов, 23 (1:0). Шмидт, 77 (1:1).
Петропавлдың «Қызылжар» клубы алғашқы турда өз алаңында Талдықорғанның «Жетісу» клубын қабылдады. Былтырғы маусымның алғашқы бөлігін белсенді өткізіп, соңына қарай қарқынын бәсеңдетіп алған «Жетісу» ұжымы биылғы біріншіліктің бірінші ойында жеңіске жете алмады. Клуб тізгінін отандық даңқты футболшы Самат Смақов ұстанған талдықорғандықтар сырт алаңда «Қызылжармен» тең ойнады. Бірінші таймда алаң иелері сапынан Самат Жарынбетов мергендік танытса, екінші таймның бел ортасынан асқанда Дмитрий Шмидт таразы басын теңестірді. Қорытынды есеп – 1:1.
«Астана» (Астана) – «Қайрат» (Алматы) – 1:1
Голдар: Томасов, 41 (1:0). Сәтпаев, 67 (1:1).
Бірінші турдың орталық ойыны, жанкүйерлердің асыға күткен матчы елорда төрінде өтті. «Астана» араға бір жыл салып «өз үйіне» оралып, «Астана Аренадағы» алғашқы ойынын «Қайратқа» қарсы өткізді.
Отандық футбол жанкүйерлері «Ел-класико» деп айдар таққан екі ұжым арасындағы 9 жылдағы барлық матч голсыз аяқталмаған. Тек 2016 жылғы Суперкубок аясындағы ойында қос ұжым бір-бірінің қақпасына саңлау таба алмай, жеңімпазды ойын соңындағы пеналти сериясында анықтаған болатын.
Тартысқа толы кездесуде алаң иелері бірінші болып есеп ашты. Марин Томасовтың алыстан шірене тепкен добы алматылық ұжымның қақпасынан дәл табылды. Дегенмен елордалық ұжым ойындағы басымдығын матч соңына дейін сақтап қала алған жоқ. 67-минутта «Қайраттың» жас таланты Дастан Сәтпаев таразы басын теңестіріп, командасына маңызды бір ұпай сыйлады – 1:1.