Ertis биыл Премьер-лигаға шығуды мақсат етіп отыр - Қайрат Нұрдәулетов

– Қайрат Жұмабекұлы, алдымен жаңа маусымның басталуымен құттықтаймыз! Павлодардың Ertis командасы алғашқы екі матчта 6 ұпай жинады. Жалпы, бастапқы екі ойындағы команданың өнеріне көңіліңіз толды ма?

– Рахмет. Барлықтарыңызды жаңа маусымның басталуымен құттықтаймын. Алғашқы екі ойынға тоқталар болсақ, тек нәтижеге ғана көңілім толды. Әрине, ең маңыздысы үш ұпай ғой. Бірақ ойынның сапасын әлі де жақсарту керек. Бұл бағытта жұмыс істеп жатырмыз. Әлі де шыңдала түсуіміз қажет. Кез келген бапкер командасының ойынына ешқашан 100 пайызы көңілі толмайды. Сондықтан әлі көп жұмыс істеп, деңгейімізді көтеруіміз керек.   

– Жанкүйерлер жақсы біледі, бұған дейін бір жарым жылдай премьер-лига клубтарын жаттықтырдыңыз? Бірінші лигадағы Ertis клубына шақырғанда келісім беруіңіздің себебін айта кетсеңіз? Сізді қызықтырған қандай ұсыныс болды?

 – Біріншіден, Ertis-тің тарихы мол, еліміздің 5 дүркін чемпионы. Сондықтан мұндай ұсынысты ой елегінен өткізу қажет болды. Біраз ойландым. Себебі үлкен жауапкершілік. Екіншіден, Ertis маған бөтен команда емес. Клуб қатарында 3 жыл өнер көрсеттім, соның екі маусымында Қазақстан чемпионы атандық. Сондықтан жылы естеліктерім бар, бұл да, таңдау жасауға өз септігін тигізді. Үшіншіден, өңір басшылығы, клуб жетекшілері Ertis клубын жандандыру, қайтадан Премьер-лигаға шығару сияқты толыққанды жобаларымен ұсыныс жасады. Осының барлығы менің Павлодар командасына келуіме әсерін тигізді.



– Командаға Павлодар футболының түлегі Максим Федин оралды. Болашақта өзге де осы өңірдің тумаларын шақыру жоспарда бар ма?

– Әрине, жергілікті футбол тәрбиеленушілерінің шақырылуы мүмкін. Егер қарқынды жұмыс істесек, Ertis-ті әрі қарай көтеретін болсақ, команданың бұрынғы ойыншыларын, жаңа жастарды бір шаңырақ астында жинауға тырысамыз. Бірақ футбол тек бапкерлер мен ойыншылардан тұрмайды, осыны ұмытпаңыздар. Сондықтан ұйымдастыру жағы да ескерілуі тиіс. Барлығын бір жүйеге келтіріп, жанкүйерлер, ойышылар, басшылық та бір бағытта жұмыс істеуді жалғастырсақ, клубты жоғары орындарға шығарып, еурокубоктарға қатысатындай деңгейге жете аламыз. Павлодар футболы – таланттарға бай. Қазір өңірдің жаңа толқыны, дарынды жастарына сенім артып отырмыз. Оларды көбірек ойнатқызып, тәжірибелерін арттырып, шеберліктерін шыңдасақ, елімізге тағы бір жұлдызды аяқдопшыларды ұсынарымыз анық. Бапкерлер ретінде, біздің мақсатымыз да сол, жаңа дарындарды анықтау, өнерлі жас ойыншыларды елге көрсету. Бұл бағытта барлығы дұрыс болады деп ойлаймын.



– Бірінші лигада биыл бәсекелестік жоғары. «Каспий», «Шахтер» басқа да тәжірибелі қарсыластар бар. Сіздердің осы маусымдағы басты мақсаттарыңыз қандай?

 – Әрине, чемпионаттағы мықты деген қарсыластарымыз ретінде «Каспий» мен «Шахтер» клубтарын атауға болады. Дегенмен, біріншіліктегі әрбір клуб өте жоғары дайындалған. Жай жүгіріп, ойнайтын ешкім жоқ. Барлық командаларда бапкерлері үлкен жұмыс жүргізеді. Қарсыластардың ойыншылары да сапалы. Сондықтан жалғыз  «Каспий» мен «Шахтерді» мықты деп айтуға келмейді. AKAS, «Қайрат-Жастар», «Оңтүстік», «Жетісай» деген ұжымдар да жоғары деңгейде. «Ақтөбе» жастар құрамасының ойыны да өте мықты екендігін байқадыңыздар. Сондықтан осал қарсылас жоқ. Жігіттерге де бұны әрқашан айтып отырамыз. Әрбір кездесуге 100% дайындықпен шығып, үш ұпай үшін күш салу керек. Жеңіл матчтар болмайды. Барлық команда Ertis-ке қарсы ерекше жігермен ойнауға шығады. Соны ойдан шығармауымыз қажет. Өзіміз де әрбір қарсыласты құрметтеп, жақсы дайындықпен шығуға тырысамыз. Біреуді мықты, біреуді әлсіз деп бөлмеймін. Алға қойған мақсатымыз Премьер-лигаға шығу. Құдай қаласа, дегенімізге жетеміз деп сенеміз. Қазір көп жұмыс істелініп жатыр. 

– Әңгімеңізге рахмет! Жұмысыңызға сәттілік тілейміз!