Эльдар Аманбаев: «Тобыл» ойыншылары жеке шеберліктің арқасында үш ұпай алуы тиіс

2-3 маусым тамыз күндері Қазақстан Премьер-лигасының 19-тур ойындары өтеді.  Осы матчтар қарсаңында белгілі спорт комментаторы Эльдар Аманбаев KFF League сайтына өз болжамын жасады.

«Оқжетпес» – «Елімай»

Бұл –19-турдағы ең қызықты матчтардың бірі. Көкшетау клубы өз алаңына оралып отыр. Жергілікті жанкүйерлер футболды сағынды. Сондықтан «Оқжетпес» жанкүйерлері бұл ойынға ерекше атмосфера сыйлайды. 

Айта кетерлігі, бірінші айналымда «Елімай» Семейдегі алғашқы ойынын дәл осы «Оқжетпеспен» өткізген болатын. Ол кездесуде күтпеген жерден алаң иелері ұтылған. Қазір жағдай мүлде басқаша. Семейліктер өткен турда «Жетісу» командасын қабылдап, ірі есеппен жеңіске жетіп, жігерленіп отыр. Командаға Оразов, Бақтияров және Кенжебек сәтті бейімделіп, Карповичтің ұжымына жаңа серпін, эмоция және креатив әкелді. Меніңше, қазіргі таңда «Елімай» жақсы формада және жеңіске жетуге толық мүмкіндігі бар. Матч қызықты әрі голға толы болады деп үміттенемін. Бұл ойында «Елімай» жеңіске жетуге әбден қауқары жетеді.

«Қайрат» – «Ұлытау»

«Қайратта» қазір жеңіс сериясы жүріп жатыр. Қарсыласы керсінше бес матч қатарынан ешкімнен ұпай ала алмай жүр. Алдағы матч бұл жағдайды өзгертеді деу қиын. Алматылықтар өз алаңында ойнайды. Сондықтан олардың қонақтарға бірдеңе ұстатуы қиын. 

Рафаэль Уразбахтиннің шәкірттері осы апта Чемпиондар лигасының үшінші іріктеу кезеңіне жолдама алды. Финляндияның КуПС командасына үш гол сқты. Енді сол қарқынды жалғастырғысы келетіні анық. 

Бұл ойында Әділет Садыбеков пен Рамазан Бағдат секілді резервтегі ойыншыларға да мүмкіндік берілуі мүмкін. Алайда құрам жаңарған күннің өзінде «Қайрат» айқын фаворит.  Алаң иелері Жезқазғаннан келген қонақтарды қиындықсыз жеңуге тиіс.

«Қызылжар» – «Тобыл»

Бұл Солтүстік дербиінде фаворит – сөзсіз Қостанайдың «Тобыл» командасы. Олар өткен турдан кейін қайта қалыпқа келуді көздейді. 

Қостанайлықтар бұл сынақтан абыроймен өте алады. Құрамында сапалы ойыншылар бар, әрі айтарлықтай жарақат алған ешкім байқалмайды. Бұл тұрғыда «Қызылжардың» жағдайы күрделірек.

Иә, солтүстікқазақстандықтар өз алаңында ойнайды, бұл оларға аздап күш беруі мүмкін. Бірақ бұл матч тағдырын шешетін фактор бола қоймас. Егер «Тобыл» тағы да ұпай жоғалтса, чемпиондық бәсекеден толық шығып қалу қаупі бар.

Нұрбол Жұмасқалиев пен оның жаттықтырушылар штабы соңғы ойындағы сәтсіздіктен сабақ алды деп ойлаймын, енді олар бұл матчқа максималды дайындықпен келуі тиіс.

«Ақтөбе» – «Жеңіс»

Еурокубокқа байланысты «Ақтөбенің» күнтізбесі қиындап кетті. Аптасына команда екі ойыннан өткізіп жүр. Чехиядағы жеңілістен кейін енді олар өз алаңында «Жеңісті» қабылдайды. 
 «Қобыланды» стадионында команда жігерсіз, эмоциясыз ойнауға хақысы жоқ – бұл «Ақтөбе» рухына жат, әрі жанкүйерлер мұндай немқұрайлықты кешірмейді. Физикалық тұрғыдан Астананың «Жеңіс» командасы сәл басым болуы мүмкін, бірақ алаң иелерінің жеңіске деген құлшынысы мен жанкүйерлер қолдауы шешуші рөл атқара алады.

«Жеңіс» үшін бұл – маңызды сынақ. Айдын Қожахмет басқаратын ұжым Премьер-лигада қалуын іс жүзінде қамтамасыз етіп үлгерді. Енді фавориттермен кездесулер – украиналық бапкердің тактикалық идеяларын іске асыруға берілген мүмкіндік. 

Дегенмен, бұл жұпта фаворит – «Ақтөбе». Команда жеке шеберлік пен ойыншылар шеберлігінің арқасында бұл кездесуде минималды жеңіске жете алады деп ойлаймын.


«Жетісу» – «Тұран»

Бұл – екі команда үшін де маңызды матч, бірақ әсіресе «Тұран» үшін өте шешуші. Түркістандықтар Премьер-лигада қалу үшін ұпай жинауы қажет, ал бұл ойын тікелей бәсекелеске қарсы өтеді. Сондықтан аталмыш ойында алты ұпайға сарапқа салынады.

Дегенмен, фаворит – «Жетісу». Самат Смақов баптайтын команда өз алаңында сенімді ойнап жүр, ал «Тұран» соңғы ойындарда көп гол жіберіп, қорғаныста осал көріне бастады.

Жақында өткен баспасөз конференциясында «Жетісу» бапкері команда ойынына риза екенін білдірді. Сондықтан Талдықорған ұжымы бұл ойында жеңіске жетеді деген сенім бар.

«Ордабасы» – «Атырау»

Бұл кездесуде тең есеп тіркелуі мүмкін. Жуковскийдің шәкірттері үшін әрбір ұпай маңызды. Команда соңғы ойында жеңіске жетті, алайда өзгертілген күнтізбе мен ерте өткізілген турлар салдарынан біраз уақыт ресми матч ойнай алмай қалды. 

«Ордабасы» әлі де өз ойынын іздеу үстінде, өйткені құрамда бірқатар өзгеріс болған, бұл нәтижелердің тұрақсыздығына әсер етуде. Шымкент команда бұл жұпта фаворит саналғанымен, іс жүзінде матч оңайға соқпасы анық. 

«Атырау» жақсы ынталанған, әрі кез келген қарсыластан ұпай тартып алуға қабілетті ойыншылары бар. Сондықтан бұл матчта тең нәтиже тіркелуі әбден мүмкін.