Ерсін Ерік: «Ордабасы» жанкүйерлерінің алдында «Елімайдан» үш ұпай алуы тиіс

14-15 маусым күндері Қазақстан Премьер-лигасының 12-тур ойындары өтеді. Осы матчтар қарсаңында белгілі спорт комментаторы Ерсін Ерік KFF League сайтына өз болжамын жасады.

 Ерсін Ерік турнир  командалардың ойын деңгейіне және турнир кестесіндегі жағдайына назар аудара отырып, әр матчқа қатысты өз болжамын ұсынды. Ол әсіресе клубтардың соңғы ойындарындағы нәтижелері мен ойыншылардың жарақаттары сияқты факторларды ескеріп, әр матчтың ықтимал нәтижелерін айтты.  

 «Атырау» – «Ұлытау»

«Атырау» өз алаңында жақсы ойын көрсетіп жүр, кейбір матчтарда жолы болмай жатқаны жасырын емес. Дегенмен «Ұлытау» да оңайшылықпен беріле қоймайды. Әсіресе, соңғы екі матчта жеңіске жетіп, 6 ұпай алғанын ескергеніміз жөн. Меніңше, «Атырау» осы жолы жеңіске жетуі мүмкін. 

«Жетісу»– «Қайрат» 

«Қайратқа» бұл ойында дисквалификация алған бас жаттықтырушысы Рафаэль Уразбахтин көмектесе алмайды. Ол ойынды трибунада отырып ғана тамашалайды. Жетісу» өз алаңында «Қайратпен» аса сәтті ойнай қоймайтын статистикасы бар. Соңғы рет 2019 жылы ғана жеңіпті. Сондықтан бұл жолы да «Қайрат» үш ұпай алуы тиіс. Бірақ матч екі команда үшін де оңай болмайды.

«Қызылжар» – «Ақтөбе»

 «Ақтөбе» – «Қызылжар» үшін өте ыңғайсыз қарсылас. Былтыр екі матч да «Ақтөбе» жеңіске жеткен.  Осы жолы да «Ақтөбе» жеңіске бір қадам жақын деп ойлаймын. Команда соңғы рет өз алаңында «Қайраттан» жеңілді. Сөйтіп бірінші орынды беріп қойды. Енді жанкүйерлердің сенімінен айырылмауы үшін «Ақтөбеге» бұл матчтың маңызы жоғары. Бірақ «Қызылжар» оңайшылықпен үш ұпай ұстата салады деуге келмейді. Милош Чурчичтің жетекшілігімен «Қызылжар» қазір кез келген командаға төтеп беріп жүр.

«Тұран – Жеңіс» 

«Тұран» мен «Жеңіс» арасын 4 ұпай бөліп тұр. Егер «Тұран» осы ойында жеңіске жетер болса, бұл айырмашылық 7 ұпайға дейін көбейеді. Айтпақшы, «Жеңістің» бас бапкері ауысқан. Команда тізгінін украиналық Андрей Демченко ұстады. Жаңа бапкердің келуімен команда қандай нәтиже көрсете алатынын Түркістандағы ойында көреміз. Әзірге елорда клубы Премьер-лигада жеңіске жетпеген жалғыз команда болып тұр. Менің болжамым – бұл ойын «Тұранның» пайдасына шешіледі.

«Астана» – «Оқжетпес»

«Оқжетпес» бейтарап жанкүйерлердің де осы маусымда көзайымына айналып үлгерген команда. Көкшетау клубы бұған дейін сырт алаңда «Елімай» мен «Қайрат» клубын жеңіп кетті. Осы жолы тағы бір фавориттен үш ұпай алу үшін келетіні анық. Екі команда осының алдында Қазақстан кубогында кездескен. Ол кезде «Астана» екінші құрамын шығарды. Соған қарамастан пенальтиден жеңіске жеткен. Бұл жолы бәрі басқаша. Дегенмен, меніңше «Астана» басқа топ-командалардың қателігін қайталамайды. Сондықтан Бабаян шәкірттері үш ұпай алады деп ойлаймын.

«Қайсар» – «Тобыл»

Виктор Кумыков «Тобылға» қарсы қалай ойнау керегін жақсы біледі. Оның үстіне өз алаңында әзірге «Ақтөбеден» басқа ешкімнен жеңілмеді. Бұл жолы екі ұжым тең тарқасуы тиіс. 

«Ордабасы» – «Елімай»

«Ордабасы» мен «Елімай» арасындағы матчта Шымкент командасының бәсі жоғары деп ойлаймын. Андрей Мартин екі апталық үзілісті тиімді пайдаланып, «Елімайға» қарсы жақсы дайындалған болуы керек. Оның үстіне Семей командасынан бірнеше легионер кетіп үлгерді. Сол себпті Шымкент командасының жеңісіне сенемін.