Бақытжан Пазылхайыр: Семей — футболдың тұрақты даму моделінің үлгісі болуы мүмкін

Қазақстан футбол федерациясының кәсіби клубтар арасында жарыстар өткізу дирекциясының басшысы Бақытжан Пазылхайыр арнайы Абай облысына іс-сапармен барды. Дирекция жетекшісі сапар барысында жергілікті футбол федерациясының өкілдерімен, «Елімай» клубы және академияның жас тәрбиеленушілерімен бірнеше кездесу өткізді.

Бақытжан Пазылхайыр «Елімай» футбол клубының даму бағыттарына арналған жиынға қатысты. Семейдің намысын қорғап жүрген футбол клубы енді қайта ұйымдастырылып, коммерциялық емес акционерлік қоғам (КЕАҚ) ретінде жұмысын жалғастырады. Қайта ұйымдастыру процесі клубтың өміріне кең ауқымды адамдардың қатысуына мүмкіндік береді. Яғни бұл дегеніміз, алдағы уақытта кез келген азамат – қарапайым тұрғыннан бастап ірі бизнес өкілдеріне дейін – клубтың акционері болып, оның болашағына жеке үлес қоса алады деген сөз. Бұл Қазақстан футболында алғаш рет енгізілетін модель.

Елімай» клубының жобасы бюджеттен қаржыландыруды кезең-кезеңімен тоқтатып, акциялар шығару арқылы өзін-өзі қаржыландыруға көшуге негізделген. Акцияларды азаматтар, бизнес пен инвесторлар сатып ала алады. Жобаның маңызды бөлігі – клубты ашық басқару жүйесін енгізу және менеджментті спорттық әрі қаржылық басқарудың заманауи қағидаларымен оқыту.

 «Біз бұл модельді жергілікті әріптестерімізбен жан-жақты талқыладық. Орталық мемлекеттік органдардан алдын ала оң пікір алдық. КЕАК форматы қаржылық тұрақтылыққа, инвестицияларға және футболдың ұзақ мерзімді дамуына жол ашады», – деді Бахытжан Пазылхайыр.

Сапар барысында спортқа инвестиция салатын бизнеске салықтық жеңілдіктерді беру ұсыныстары талқыланды. Заңгерлер мен қоғам өкілдерімен бірлесе отырып, футболдың коммерциялануын дамытуға және балалар мен жасөспірімдер бағыттарын қолдауға бағытталған нормативтік-құқықтық актілерге өзгерістер енгізу бастамалары пысықталды. Сонымен қатар, дирекция басшысы стадион мен клубтың балалар футбол орталығына барып, жас тәрбиеленушілер мен олардың жаттықтырушыларымен кездесті.

«Семейде футбол дамып келеді. «Елімай» сияқты бастамалар арқасында біз Қазақстанның футбол экожүйесінің жаңа моделін құрып жатырмыз – ашық, кәсіби және тұрақты», – деп қорытындылады Бақытжан Пазылхайыр.