Премьер-лиганың 12-туры: «Оқжетпесті» нағыз сынақ күтіп тұр

Екі апталық үзілістен кейін 14 және 15 маусымда Қазақстан Премьер-лигасының 12-тур ойындары өтеді. Бұл турда жанкүйерлер ерекше күтетін орталық матчтардан «Астана» мен «Оқжетпес», сондай-ақ «Ордабасы» мен «Елімай» арасындағы ойын бар.

14 маусым

«Жетісу» (Талдықорған) – «Қайрат» (Алматы)

Матчтың басталуы: 18:00
Өтетін орны: «Жетісу» стадионы (Талдықорған қаласы)

Жеке кездесулер тарихы: 

Ойындар саны – 58
«Жетісудың» жеңісі – 13
«Қайраттың» жеңісі – 35
Тең ойындар – 10

Осы турдың шымылдығын «Жетісу» мен «Қайрат» ашады. Егер Алматы командасы жеңіске жетіп жатса, онлайн-кестеде уақытша болса да, бірінші орынға көтеріле алады. Алайда алматылықтарға жеңіске жету оңайға соқпайды. Себебі, бұл ойында дисквалификация алған бас жаттықтырушысы Рафаэль Уразбахтин командасына көмектесе алмайды.

«Жетісу» жанкүйерлерінің қолдауы да үлкен рөл атқармақ, Бұған дейін көрерменнің қолдауы өз алаңында «Ақтөбені» жеңуге көмектесті. Сонымен қатар, соңғы кездері «Қайрат» көп жағдайда «Жетісудан» ұпай жоғалтып жүр. Бірақ көбінесе Алматыдағы ойында сондай жағдай тіркеледі. Ал Талдықорғанда«Жетісу» соңғы рет «Қайратты» 2019 жылдың 14 сәуірінде жеңген. Содан бері бір ғана тең ойын және төрт жеңіліс тіркелді.

«Қызылжар» (Петропавл) – «Ақтөбе» (Ақтөбе)

Матчтың басталуы: 18:00
Өтетін орны: «Қарасай» стадионы (Петропавл қаласы)
Жеке кездесулер тарихы: 
Ойындар саны – 33
«Қызылжардың» жеңісі– 8
«Ақтөбенің» жеңісі – 18
Тең ойындар – 7

Мүмкіндік болып жатса, «Ақтөбе» де сенбі күні турнирлік кестеде бірінші орынға көтерілуі мүмкін. Бірақ бұл үшін тек «Қызылжарды» жеңу ғана жеткіліксіз,  «Қайраттың» ұпай жоғалтуын күту керек.
Бастысы, актөбеліктер алдымен өз мәселесін шешуі тиіс, ал ол оңай емес. «Қызылжар» бапкері Милош Чурчичтің жетекшілігімен кез келген қарсыласқа төтеп беретін ұжымға айналды. Оның үстіне «Қарасай» стадионына оралған соң, олар бірде-бір матчта жеңілмеді.
Дегенмен, «Ақтөбе» – «Қызылжар» үшін өте қолайсыз қарсылас. Былтыр екі матчты да «Ақтөбе» өз пайдасына шешкен. Петропавлда «Қызылжар» еліміздің бес дүркін чемпиондарын 2018 жылдан бері жеңген жоқ.

«Атырау» (Атырау) – «Ұлытау» (Жезқазған)

Матчтың басталуы: 19:00
Өтетін орны: «Мұнайшы» стадионы (Атырау қаласы)
Жеке кездесулер тарихы: Бұған дейін кездескен жоқ

Бұл – екі команда үшін де өте маңызды кездесу, әрі олардың арасындағы алғашқы ресми ойын. Әсіресе, «Атырауға» енді шегінерге жол жоқ. Себебі тікелей бәсекелесінен жеңілсе, турнирлік кестенің түбінде қалу қаупі күшейе түседі.

«Мұнайшылардың» жағдайы қиын – олар ең көп матч өткізіп, ең аз ұпай жинаған.
Дегенмен, үміт үзілді деуге келмес. Сондықтан Денис Мамонов шәкірттеріне бірінші кезекте «Ұлытаудан» үш ұпай алу аса маңызды болып тұр. Оған Жезқазған клубының келісе салуы қиын. Олар соңғы екі турда алты ұпай жинап, жағдайларын біраз жақсартып алды. 


«Тұран» (Түркістан) – «Жеңіс» (Астана)

Матчтың басталуы: 20:00
Өтетін орны: «Түркістан Арена» (Түркістан қаласы)
Жеке кездесулер тарихы:
Ойындар саны – 4
«Тұранның» жеңісіі – 1
«Жеңістің» жеңісі – 2
Тең ойындар – 1

«Тұран» мен «Жеңіс» арасындағы өзара жеке кездесулер тарихы аса бай емес, бірақ бұл клубтар Бірінші лигада да, Премьер-лигада да жолыққан. Бірінші лигада бір-бірін ірі есеппен жеңген, ал Премьер-лигада тең дәрежеде ойнап жүр. 
Айта кетейік, «Жеңіс» – әлі күнге дейін бірде-бір жеңіске жетпеген жалғыз команда.Премьер-лигадағы екі апталық үзіліс кезінде команда тізгінін украиналық Андрей Демченко қолға алды. Ол бұрын «Аякс» сапында Чемпиондар лигасын жеңген. Бұл тағайындау жеңіс сериясын бастауға көмектесе ме? Ол жағын Түркістандағы матчта көреміз. 

15 маусым

«Астана» (Астана) – «Оқжетпес» (Көкшетау)

Матчтың басталуы: 18:00
Өтетін орны: «Астана Арена» (Астана қаласы)
Жеке кездесулер тарихы:
Ойындар саны – 23
«Астананың» жеңісі – 17
«Оқжетпестің» жеңісі – 2
Тең ойындар – 4

Елордада осы турдың ең басты матчтарының бірі өтеді. «Астана» өз алаңында соңғы кездері фавориттерден ұпай алып жүрген «Оқжетпеспен» кездеседі. Қазіргі таңда Көкшетау командасы турнир кестесінде бесінші орында, «Астанадан» жеті ұпайға қалып тұр. Дегенмен Андрей Ферапонтов шәкірттері қарсыластан бір ойынға аз өткізген. Егер қонақта жеңіске жетсе, көкшетаулықтар арадағы айырмашылықты барынша қысқартуы мүмкін.

Бір ескере кететін жайт, «Оқжетпестің» дәл осы елорда клубымен сырт алаңдағы нашарлау. Тек бір рет жеңіске жеткен, оның өзі 2012 жылы болған.

Биылғы маусымда «Оқжетпес» Қазақстан кубогының 1/8 финалында «Астанамен» кездескен. Сол кезде пенальти сериясының қорытындысы бойынша Григорий Бабаян шәкірттері келесі кезеңге өткен.

«Ордабасы» (Шымкент) – «Елімай» (Семей)

Матчтың басталуы: 20:00
Өтетін орны: Қажымұқан Мұңайтпасов атындағы стадион (Шымкент қаласы)
Жеке кездесулер тарихы:
Ойындар саны – 3
«Ордабасының» жеңісі – 1
«Елімайдың» жеңісі – 0
Тең ойындар – 2

Шымкент пен Семей командалары турнир кестесінде көршілес орналасқан. Бірақ бұл командалардың қазіргі орындарына жанкүйерлері аса риза емес. Сүйікті клубтарын бұдан да жоғары орындардан көргісі келеді. Қайта құрылған «Елімай» «Ордабасымен үш матч ғана өткізген. Соның екеуі тең аяқталып, біреуінде Шымкент клубы басым түскен. Осы жолы «Елімай» алғашқы жеңісін тойлай ала ма?

«Қайсар» (Қызылорда) – «Тобыл» (Қостанай)

Матчтың басталуы: 20:00
Өтетін орны: Ғани Мұратбаев атындағы стадион (Қызылорда қаласы)
Жеке кездесулер тарихы:
Ойындар саны – 58
«Қайсардың» жеңісі – 17
«Тобылдың» жеңісі – 27
Тең ойындар – 16

«Тобыл» көшбасшы командалардан екі ойынға аз өткізген. Егер кездесу санымен теңесіп және ол матчтарды жеңетін болса, бірінші орынға да шыға алады. Бірақ Қызылордадағы матч оңай болмасы анық. Виктор Кумыков командасы соңғы жылдары Қостанай клубына өте ыңғайсыз қарсылас болып жүр. Оның үстіне, «Қайсар» биыл өз алаңында тек «Ақтөбеден» ғана жеңілді. Сондықтан жанкүйерлерді қызықты матч күтіп тұрғаны айқын.