Сұлтан Асқаров: Ұлттық құрамада ойнау – басты мақсатым

Талдықорғанның «Жетісу» клубының қорғаушысы Сұлтан Асқаров KFF League.kz сайтына берген сұхбатында бапкерлер штабының сенімі, Самат Смақовпен қарым-қатынас, командадағы атмосфера және маусымның қалған бөлігіне қойған мақсаттары туралы айтып берді.

– Сұлтан, биыл «Жетісу» сапында алаңға тұрақты шығып жүрген футболшылардың бірісің. Осы ретте әңгімені команданың алға қойған мақсаты, маусымдағы жоспарынан бастасақ?

– Ең алдымен, бапкерлер штабына, әсіресе бас бапкер Самат Қабірұлына алғысым шексіз. Жасымды сылтау етпей, сенім артып, мүмкіндік бергені – мен үшін үлкен мәртебе. Қазір тұрақты түрде ойын тәжірибесін жинап жатырмын, сенімім артып, шеберлігімді шыңдап келемін. Әріқара қарай дамып, жұмыс істеуді жалғастыра береміз.

– Қазақ футболы тарихында өз есімін қалдырған Самат Смақовтың қол астында жаттығу қалай екен?

– Иә, ол өте мықты мотивация беретін әрі керемет адам. Кейде жаттығу кезінде бізбен бірге ойнап кететіні де бар. Энергиясы мықты. Оның басшылығымен жаттығу істеу – бір ғанибет әрі үлкен абырой.

– Бас бапкерден жеке кеңестер алып тұрасың ба?

– Иә, жеке сөйлесеіп тұратын сәттеріміз болады. Жиі ақыл-кеңес береді, өзінің бай тәжірибесімен бөліседі. Самат Смақов – қазақ футболының тірі аңызы, отандық ойыншылар арасында деңгейі жоғары болды ғой. Тәжірибе жетіспей жатқан сәттерде бізге дұрыс бағыт-бағдар көрсетіп отырады. Мен одан үйреніп, білмегенімді сұрап отырамын. 

– «Жетісу» құрамында «Қайрат» мектебінен шыққан ойыншылар көп. Бұл қаншалықты көмек береді?

– Әрине, өз артықшылықтары бар. Жалғыз емес екенімді сезіну – үлкен қолдау. Біз бір-бірімізді жақсы түсінеміз, алаңда да өзара байланысымыз күшті. Командадағы атмосфера тамаша – бәрі бір-бірін қолдайды, сыйластық бар. Команда жаңа болғанымен, бүгінде бәріміз бір-бірімізді жақсы түсініп келеміз. Алғашқы ойындар оңай болған жоқ, бірақ қазір жақсы футбол көрсетіп жүрміз. Мысалы, «Ақтөбені» 2:1 есебімен жеңдік, ал соңғы екі ойында да үш ұпайға жақын болған едік. Алда әлі талай жұмыс күтіп тұр.

– «Жетісу» сені «Қайраттан» жалға алды. Келісімшарт аяқталған соң, Алматыға ораласың ба?

– Әрине, мақсатым – әрдайым жоғарыға ұмтылу. «Қайратқа» ойын тәжірибесімен, сенімді күйде, мықты ойыншы болып оралғым келеді. Мақсатым – Мартынович, Егор Сорокин, Лука Гадрани сынды легионерлермен бәсекеге түсе алатындай деңгейге жету. Сонымен қатар, клубта менің достарым Александр Широбоков пен Дамир Қасболат ойнайды. Бапкерлер маған сенім арта алатындай дайын болуым керек.

– Жеке өзіңе қандай мақсаттар қойып отырсың?

– Ең бастысы – ұлттық құрамадан шақырту алу. Қазір жастар құрамасында ойнап жүрмін, әрі бас бапкер маған капитандық сеніп тапсырғанына мақтанамын. Бұл – үлкен мәртебе. Алдағы мақсатым – ұлттық құрама, одан кейін Еуропа. Неге болмасқа? Бәрімізге үлгі – Дастан Сәтпаев бар. Қазір оның жетістігі жайлы бүкіл ел айтып жүр. Ол армандардың орындалатынын дәлелдеді. Біз де сол жолға ұмтылуымыз керек.