Екінші лига: «Оңтүстік-батыс» конференциясында үш команда көш бастады

20–21 мамыр күндері Қазақстанның чемпионатының Екінші лигасында жетінші тур ойындары өтті. Бұл турдың қорытындысы бойынша «Оңтүстік-батыс» конференциясында бірден үш команда турнир кестесінде бірдей орынға жайғасты.

Ойын нәтижелері:

«Солтүстік-шығыс» конференциясы

«Алтай-Ж» – «Ұлытау- Ж» – 3:0
«Оқжетпес-Ж» – «Жетісу- Ж» – 1:2
«Қызылжар-Ж» – «Жеңіс- Ж» – 1:0
«Елімай- Ж» – «Шахтер- Ж» – 4:1
«Тобыл-Ж» – SD Family Ж – 3:0.

Конференцияда көш басында тұрған «Астана-Ж» бұл аптада ойнаған жоқ. Осы мүмкіндікті пайдаланып, қарсыластар ұпай айырмасын қысқартуға тырысты.

Өскеменнің «Алтай-Ж» командасы өз алаңында «Ұлытаудың» жастарын бірінші таймда соғылған үш голдың арқасында сенімді түрде жеңді. Көшетауға қонаққа келген «Жетісу-Ж» мінез танытып, камбэк жасады. Есепті алаң иелері ашқанымен, «Жетісу» жастары жеңісті жұлып алды. 

«Қызылжар-Ж» мен «Жеңіс-Ж» арасындағы тартысты ойында жеңіс голы негізгі уақыттың соңында соғылды. Солтүстікқазақстандықтар маңызды үш ұпайға ие болды.

Қарағандының «Шахтер-Ж» командасы сырт алаңда жеңіске жетсе, турнир кестесінде «Астана» жастарын қуып жететін еді. Алайда, «Елімай-Ж» бұған жол бермеді. Семейлік ұжым алғашқы таймда екі гол соғып, ойын тізгінін толық өз қолына алды. Қарағандылықтар тек бір голмен жауап бергенімен, екінші таймда қарсыластың қарқынына төтеп бере алмады. Қорытынды есеп – 4:1.

«Тобыл-Ж» мен SD Family Ж арасындағы кездесуде алғашқы таймда есеп ашылмады. Дегенмен, қонақтар сапынан Әбілмансұр Көкен екі рет ескерту алып, алаңнан қуылды. Сан басымдығын тиімді пайдаланған қостанайлықтар үш гол соғып, турнир кестесіндегі жағдайын жақсартты.

«Оңтүстік-батыс» конференциясы

«Талас» – «Атырау-Ж» – 1:2
«Жас Қыран» – «Мақтаарал» – 2:2
«Каспий-Ж» – «Қайсар-Ж» – 2:1
«Жайық» – «Арыс» – 0:0
Jeyran – «Тұран-Ж» – 1:3.

Маусым басында төрт жеңіс қатарынан алған «Жас Қыран» соңғы екі турда жеңіске жете алмай келеді. Бұл жолы да олар «Мақтааралмен» тең түсті – 2:2. Алматылықтар есепті жылдам ашқанымен, қонақтар ойын барысында алға шығып үлгерді. Дегенмен, соңына қарай алаң иелері таразы басын теңестіріп, бір ұпаймен шектелді.

«Атырау-Ж» сырт алаңда «Таласты» жеңіп, күтпеген нәтиже көрсетті. Бірінші таймда екі гол соққан жас «мұнайшылар» ойын соңына таман бір гол жіберіп алды. Қорытынды есеп – 1:2 қонақтарыдң пайдасына.

«Жайық» пен «Арыс» арасындағы кездесудің нәтижесі көшбасшыны анықтайтын еді. Бірақ ойында гол соғылмай, тең аяқталды. Осылайша, «Жайық», «Арыс» және «Жас Қыран» командалары 13 ұпаймен турнир кестесінде бірдей көш бастады. Доп айырмашылығы бойынша бірінші орында «Арыс» тұр, алайда «Жайықтың» бір ойыны кем, сондықтан олардың жеке-дара алға шығуға мүмкіндігі бар. 

Лиганың дебютанты Jeyran әлі де алғашқы ұпайын еншілей алмай келеді. Бұл турда да алматылық клуб өз алаңында «Тұран» жастарына есе жіберіп, қатарынан алтыншы рет жеңілді.

 Келесі сегізінші тур ойындары 26–27 мамыр күндері өтеді.