Сегізінші турда «Астана» - «Тобыл», «Ақтөбе» - «Елімай» кездесуі күтіп тұр

10-11 мамыр күндері Қазақстан премьер-лигасының сегізінші тур ойындары жалғасады. Ал 9 мамырда 20-турға жоспарланған «Жеңіс» пен «Қайрат» кездесуі алдын ала өтеді.

9 мамыр

«Жеңіс» – «Қайрат» (20-турға жоспарланған матч)
Ойынның басталуы – 19:00
Өтетін орны: «Астана Арена» стадионы (Астана қ.)

Бұл командалар әу баста 8-тур аясында 10 мамырда Алматыда жолығуы тиіс болған. Бірақ «Қайраттың» жаздағы еурокубок ойындарына байланысты қос тарап өзара келісімге келді. Енді 20-турдың ойыны алдын ала 9 мамырда Астанада өтеді. Ал 8-турдың ойыны шілдеде Алматыда болмақ. Сонымен қатар екі команданың матчы Жеңіс күні мерекесіне қойылды. 

Әзірге «Жеңіс» чемпионатта бірде-бір матчта жеңіске жете алған жоқ. Жеті кездесудің бесеуінде тең түсіп, екеуінде есе жіберді. «Қайрат» қазіргі кезде турнир кестесінде көшбасында келеді. Команда биылғы маусымда ешкімнен ұтылған жоқ. Осы серияны «Жеңіс» бұза ала ма? Оған 9 мамырда куә боламыз. 

10 мамыр

«Қызылжар» – «Ұлытау»
Ойынның басталуы – 15:00
Өтетін орны: «Қарасай» стадионы (Петропавл қ.)

Чемпионаттың басында екі команданың турнир кестесіндегі жағдайы ұқсас еді. Бірақ Милич Чурчич келгелі «Қызылжар» қатарынан екі ойында жеңіске жетті. Сөйтіп, жағдайларын біраз жақсартып алды. Ал «Ұлытау» әлі де соңғы орында жүр. «Қызылжар» биыл бірінші рет өз алаңындағы ойынын Петропавлда өткізбекші. Өз жанкүйерлерінің алдында Чурчич шәкірттерінің аянып қалмасы анық. Ал «Ұлытау» оларға қаншалықты қауқар көрсете алады? 

«Тұран» – «Атырау»
Ойынның басталуы – 18:00
Өтетін орны: «Түркістан Арена» стадионы (Түркістан қ.)

«Атырау» алғашқы турда «Елімайдан» үш ұпай алғаннан кейін жолы болар емес. Команда чемпионатта қатарынан жеті, кубокта бір ойында есе жіберді. «Мұнайшылар» осы жолы Түркістанға аттанады. «Тұранның» бас бапкері былтыр «Атырауды» жаттықтырған. Сондықтан қызықты кездесу күтіп тұр деуге болады. Екі команда бұған дейін кубокта кездескен, ол кезде Түркістан ұжымы жеңіске жеткен. 

«Астана» – «Тобыл»
Ойынның басталуы – 19:00
Өтетін орны: «Астана Арена» стадионы (Астана қ.)

Турдың орталық ойыны Астанада өтеді. Қостанайдың «Тобыл» клубы елордаға қонаққа келеді. Нұрбол Жұмасқалиев шәкірттері былтыр «Астанамен» үш кездесу өткізіп, бірде-бір ойында есе жібермеген. Чемпионатта бір рет тең түсіп, екіншісін жеңген. Ал кубокта тіпті жарыстан шығарып тастады. Ол кезде «Астана» Алматыда ойнады. Бұл жолғы матчтың жөні мүлдем басқа. Екі команданың құрамы қарымды. Сол себепті жанкүйерлерді қызықты кездесу күтіп тұрғаны анық.

11 мамыр

«Жетісу» – «Окжетпес»
Ойынның басталуы – 15:00
Өтетін орны: «Жетісу» стадионы (Талдықорған қ.)

Көкшетау командасы жетінші турдың басты сенсациясын жасаған еді. Семейде «Елімай» клубын жанкүйерлерінің алдында жеңіп кетті. Қазір Андрей Ферапонтов шәкірттерінің көңіл күйі керемет. Енді олар Талдықорғанға қонаққа барады. «Жетісу» маусымда әлі бірде-бір ойында жеңіске жетпеген. Бәлкім. осы жолы сол сәтсіз серия тоқтайтын шығар...   

«Ордабасы» – «Қайсар»
Ойын басталуы – 17:00
Өтетін орны: Қажымұқан Мұнайтпасов атындағы стадион (Шымкент қ.)

«Ордабасы» да негізгі алаңына оралмақшы. Шымкент командасы биылғы маусымда алғаш рет Қажымұқан Мұнайтпасов атындағы стадионда ойнайды. Команда Қызылорданың «Қайсар» клубын қабылдайды. Андрей Мартиннің командасы алғашқы турлардағы сәтсіздіктен кейін есін жинай бастады. Команда қатарынан үш ойында жеңіске жетті. Ал Виктор Кумыков жаттықтыратын «Қайсар» әзірге үш ұпай алып көрген жоқ. Бірақ өз алаңында «Қайрат» пен «Астанамен» тең ойнай алды.

«Ақтөбе» – «Елімай»
Ойын басталуы – 19:00
Өтетін орны: Қобыланды батыр атындағы стадион (Ақтөбе қ.)

Осы турдың соңғы ойыны Ақтөбеде өтеді. Қаламен аттас жергілікті команда Семейдің «Елімай» клубын қабылдады. Былтыр екі клуб өзара төрт рет жолыққан болатын. Кубок жолында «Ақтөбе» басымдық танытса, чемпионатта «Елімай» мүмкін алты ұпайдан төртеуін еншілеген. Әсіресе, сырт алаңдағы жеңісті Семей жанкүйерлері көпке дейін ұмытпасы анық.