Көшбасшылар күтпеген жерден ұпай жоғалтып, «Ұлытау» мен «Жетісу» алғашқы жеңістеріне қол жеткізді

24 және 25 мамыр күндері футболдан Қазақстан Премьер-лигасының оныншы турының матчтары өтті. Бұл тур кейбір күтпеген нәтижелермен есте қалды.

Кездесулер нәтижесі:

«Қайрат» – «Оқжетпес» – 1:2
«Ордабасы» – «Ұлытау» – 0:1
«Астана» – «Жеңіс» – 4:2
«Жетісу» – «Ақтөбе» – 2:1
«Қызылжар» – «Елімай» – 1:1
«Атырау» – «Қайсар» – 1:2.
 
24 мамыр

«Қайрат» (Алматы) – «Оқжетпес» (Көкшетау) – 1:2 (0:1).
Голдар: Жұмат, 15-пенальтиден (0:1). Йованович, 52 (0:2). Сәтпаев, 57 (1:2).
Бас төреші: Есмұратов (Астана).

Ел чемпиондары бұл ойында анық фаворит саналған. «Қайратқа» артық мотивацияның да қажеті жоқ болатын. Қатарынан екі ойында жеңілген. Кубок жолынан да шығып қалды. Өз жанкүйерлерінің алдында тек үш ұпай үшін ойнауды көздеді. Бірақ футболда барлығы ойлағанындай бола бермейді. Андрей Ферапонтов бапкер Алматыға жақсы дайындықпен келіпті. Көкшетау командасының қазір Дамир Марат, Дәурен Жұмат есімді футболшылары жарап тұр. «Қайратпен» матчта да екеуі шешуші рөл атқарды.

Есепті қонақтар ашты. «Қайраттың» қорғаушылары мен қақпашысының өзара түсініспеушілігі пенальтиге әкеліп, «Оқжетпес» бұл мүмкіндікті мүлт жіберді. Дәурен Жұмат үзіліске дейін «Оқжетпесті» алға шығарды. Ал екінші таймда Йованович есепті 0:2-ге жеткізді. Бірақ көп ұзамай, Көкшетау командасының қақпашысы қателесіп, Дастан Сәтпаев есеп айырмасын бір допқа қысқартты. Дегенмен алаң иелерінің одан әріге шамасы жетпді. «Оқжетпес» үш ұпайға ие болды. «Қайрат» осылайша қатарынан премьер-лигада екі рет және кубокта бір рет жеңілді. Турнир кестесінде команда үшінші орынға сырғыды. 

«Ордабасы» (Шымкент) – «Ұлытау» (Жезқазған) – 0:1 (0:1)
Гол: Молдақараев, 45+2-пенальтиден (0:1).
Бас төреші: Кучин (Көкшетау).

«Ордабасы» наурыздағы сәтсіздіктен кейін есін жинай бастаған болатын. Премьер-лигада жоғары орындарға көтеріліп, Қазақстан кубогында жартылай финалға шыққан еді. Алайда бес матчқа созылған жеңісті серияны чемпионаттың соңғы орынында келе жатқан клубы тоқтатты. Жезқазғанның «Ұлытау» командасы Шымкенттен үш ұпай еншіледі. Матчтағы жалғыз голды пенальтиден Жасұлан Молдақараев соқты. Ардагер футболшы мүмкіндікті мүлт жібермей, тіпті паненка стилінде тепті.

«Астана» (Астана) – «Жеңіс» (Астана) – 4:2 (1:2)
Голдар: Тевзадзе, 4 (0:1). Калайца, 14 (1:1). Адилио, 31 (1:2). Бейсебеков, 76 (2:2). Кәрімов, 88 (3:2); Астанов, 90 (4:2).
Бас төреші: Құмашев (Астана).

Өзге лидерлердің ұпай жоғалтуын «Астана» сәтті пайдаланды. Олар елордадағы дербиде «Жеңістен» жеңісті жұлып алды. Бұлай айтуымыздың себебі бар. Бабаян шәкірттері 75-минутқа дейін жеңіліп тұрған. Бірақ матчтың соңғы 15-минутында Қазақстан ұлттық құрамасының үш бірдей футболшысы гол соғып, есепті 4:2-ге жеткізді.  

«Жеңіс» әзірге бұл маусымда премьер-лигада жеңіске жете алмай жүр.

25 мамыр

«Жетісу» (Талдықорған) – «Ақтөбе» (Ақтөбе) – 2:1 (0:1)
Голдар: Кики, 40 (0:1).Серікқұл, 49 (1:1). Житнев, 87 (2:1).
Бас төреші: Қарабаев (Астана).

«Ақтөбенің» турнир кестесінде жеке-дара ұзап кетуіне керемет мүмкіндік болған. Бірақ олар Талдықорғанда күтпеген жерден есе жіберді. Бірінші таймда Габи Кикидің голының арқасында «Ақтөбе» алға шыққан. Дегенмен екінші кезеңде бәрі өзгерді. Қарсыластың қорғаушыларының қателігінен кейін Ринат Серікқұл таразы басын теңестірсе, матчтың 87-минутында Максим Житнев жеңіс голына сүйінші сұрады. Бұл «Жетісудың» осы маусымдағы алғашқы үш ұпайы. 

«Қызылжар» (Петропавл) – «Елімай» (Семей) – 1:1 (1:1)
Голдар: Ульшин, 8 (1:0). Корзун, 44 (1:1).
Бас төреші: Абдуллаев (Қаратау)

Бұл екі ұжымда жақында өзара жолыққан. Қазақстан кубогының ширек финалы аясында Петропавлда ойнап, пенальтиден «Қызылжар» басым түскен. Бұл жолы да командалар Қарасай батыр атындағы стадионда ойнады. Есепті 8-минутта алаң иелері ашқан. Андрей Ульшиннің голына қонақтар тайм соңына қарай лайықты жауап қайтарды. Қорытынды есеп – 1:1. Екінші таймда ештеңе өзгермеді. 

«Атырау» (Атырау) – «Қайсар» (Қызылорда) – 1:2 (0:0)
Голдар: Жақсылықов, 75-пенальтиден (0:1). Жұматов, 90+5 (1:1). Әбікен, 90+6 (1:2).
Бас төреші: Суликанов (Ақтөбе)

«Қайсар» осының алдында өз алаңында «Тұранды» жеңген. Бұл жолы сол серияны жалғастырды. Осы маусымда алғаш рет Виктор Кумыков шәкірттері түзде ойнап, ұпайға қол жеткізді. «Атыраумен» матчта Айбар Жақсылықов пен Айбол Әбікеннің голы Қызылорда командасына жеңіс сыйлады. 

«Тұран» (Түркістан) – «Тобыл» (Қостанай) – 1:2 (0:1)
Голдар: Чесноков, 36 (0:1). Зуев, 74 (0:2). Дүйсенбекұлы, 83 (1:2).
Бас төреші: Байымбет (Тараз).

Осы турдағы ешқандай сенсациясыз, жанкүйерлер мен футбол сарапшыларының болжамымен бірдей шыққан ойын болды. Түркістанға қонаққа барған «Тобыл» әрбір таймда бір-бір голдан салып, маңызды жеңіске қол жеткізді.

Қостанай командасы егер кейінге шегерілген ойындарды жеңетін болса, турнир кестесінде бірінші орынға шығуға мүмкіндігі бар.

11-турда кездесетіндер:

30 мамыр:

·        «Жеңіс» – «Ордабасы»

·        «Атырау» – «Тобыл»

·        «Елімай» – «Астана»

·        «Ақтөбе» – «Қайрат»

31 мамыр:

·        «Ұлытау» – «Тұран»

·        «Оқжетпес» – «Қызылжар»

·        «Қайсар» – «Жетісу».