Екінші лига: «Астана» жеңісті сериясын жалғастырса, «Жайық» алғаш рет жеңілді

 

«Солтүстік-шығыс» конференциясы

SD Family-Ж – «Оқжетпес-Ж» – 0:3

«Жетісу-Ж» – «Алтай-Ж» – 1:0

«Астана-Ж» – «Тобыл-Ж» – 4:1

«Шахтер-Ж» – «Қызылжар-Ж» – 1:2

«Ұлытау-Ж» – «Елімай-Ж» – 0:7

 

«Солтүстік-шығыс» конференциясында «Астана-Ж» командасын әзірге ешкім тоқтата алар емес. Елордалық жастар маусым басынан бері қатарынан жеті матчта жеңіске жетті. Соның алтауында қарсыластарынан ірі есеппен басым түсті. Бұл жолы елордалықтар Қостанайдың «Тобыл-Ж» ұжымын тізе бүктірді. Алаң иелері алғашқы таймда – үш, екінші таймда бір гол соғып, 4:1 есебімен жеңіске жетті. Қарсыластар тек бір ғана жұбыныш голын соға алады. Қазіргі таңда «Астана-Ж» 44:5 гол айырмашылығымен өз конференциясында сенімді түрде көш бастап тұр.

 

Тур қорытындысы бойынша көшбасшы мен екінші орындағы команда арасындағы алшақтығы тіпті ұлғайды. Қарағандылық «Шахтер-Ж» өз алаңында «Қызылжар-Ж» клубынан 1:2 есебімен жол беріп, «Астана-Ж»-дан алты ұпайға қалып қойды. Айта кетерлігі, «Шахтер-Ж» бір ойын көп өткізген.

 

Өзге ойындарға тоқталар болсақ, «Жетісу-Ж» өз алаңында «Алтай-Ж» клубын 1:0 есебімен жеңіп, турнир кестесінде талдықорғандықтар Өскемен командасын басып озды.

 

Семейлік «Елімай-Ж» Жезқазғанда «Ұлытау-Ж» клубын 7:0 есебімен жеңіп, үш ұпай олжалап қайтты. Қонақтар сапынан Нұрәлі Нұрәділов хет-трик авторы атанды.

 

«Ордабасы-Ж» – «Каспий-Ж» – 2:2

«Мақтаарал» – «Жайық» – 2:1

«Қайсар-М» – «Жас Қыран» – 0:0

«Арыс» – Jeyran – 5:0

«Тұран-М» – «Талас» – 0:1

 

«Оңтүстік-батыс» аймағында қатарынан бес матчта жеңіске жеткен «Жайықтың» жеңісті сериясы үзілді. Жаңа құрылған оралдық команда өз тарихында алғаш рет жеңілді. Дегенмен, бұл нәтижені сенсация деуге келмес. Өйткені «Жайық» Премьер-лигада ойнаған тәжірибелі «Мақтааралға» сырт алаңда есе жіберді. Жеңіс голын мақтааралдықтар қосымша уақытта соғып, турнир кестесінде Батыс Қазақстан командасын қуып жетті. Айта кетейік, оралдықтар «Мақтааралдан» бір матч кем өткізген.

 

Қос команданы бір ұпай артық жинаған «Жас Қыран» басып озды. Бұл команда сегізінші турда сырт алаңда «Қайсар-Ж» клубымен 0:0 есебімен тең ойнады.

 

Ал конференцияда «Арыс» командасы жеке-дара көш бастап келеді. Түркістандықтар өз алаңында Jeyran командасын қабылдап, 5:0 есебімен ойсырата жеңді. Бірінші таймда-ақ алаң иелері қонақтар қақпасына төрт доп соқты. Оның үшеуін Тимур Қуантаев небәрі 15 минут ішінде соғып, хет-трик авторы атанды. Jeyran Екінші лигадағы бірде-бір ұпайы жоқ жалғыз команда болып тұр.

 

Тағы бір кездесуде «Талас» Түркістанда жергілікті «Тұран-Ж» клубын бір гол айырмасымен жеңіп, көшбасшылар тобына жақындай түсті.

 

Екінші лиганың тоғызыншы тур ойындары 17-18 маусым күндері өтеді.