Әйелдер лигасының жетінші туры: көшбасшылар кезекті жеңістеріне қол жеткізді

22–23 мамыр күндері футболдан әйелдер арасындағы Қазақстан чемпионатының жетінші тур ойындары өтті. Осы турдың қорытындысы бойынша турнир кестесінде үш клуб бірдей ұпаймен көш бастап келеді. Олардың қатарында «БИІК-Шымкент», «Ақтөбе» және «Томирис-Тұран» бар.

Ойын нәтижелері:

«Атырау» – «Томирис-Тұран» – 0:7
«Елімай» – «Ақтөбе» – 0:5
«Жеңіс» – «Қайрат» – 0:1
«Тобыл» – «БИІК-Шымкент» – 0:18
«Жетісу» – «Астана» – 1:0
«Қайсар» – «Қызылжар» – 0:0
«Оқжетпес» – «Ұлытау» – 1:2.

Үш көшбасшы да жетінші турдың алғашқы күнінде ойнап, сырт алаңда ірі есеппен жеңіске жетті. «Томирис-Тұран» «Атырау» қақпасына жауапсыз жеті гол соқса, «БИИК-Шымкент» «Тобылды» 18:0 есебімен ойсырата жеңді. Ал «Ақтөбе» «Елімайдан» 5:0 есебімен басым түсті. Семейдегі ойында тек «Ақтөбенің» үздік сұрмергені, жалпы чемпионатта Гүлнара Габелиядан кейін екінші орында тұрған Алина Литвиненко мергендігімен көзге түсе алмады.

Ал Астанадағы «Жеңіс» пен «Қайрат» арасындағы матч өте тартысты өтті. Екі команда да оңайшылықпен беріспейтінін байқатты. Негізі алаң иелерінің бір ұпай алуға шамасы жеткен. Алайда, соңғы минуттарда алматылық қыздар шешуші гол соғып, үш ұпайға ие болды.

Турдың екінші күнінде топырлаған голдарды көрмедік. Талдықорғанда өткен «Жетісу» мен «Астана» арасындағы матчтың тағдыры да жалғыз голмен шешілді. Қонақтардың жеңілісіне Әмина Рсалдиеваның бір минуттың ішінде екі сары қағаз алып, алаңнан қуылуы әсер еткені жасырын емес.

Сондай-ақ Қызылордада өткен «Қайсар» мен «Қызылжар» арасындағы кездесуде мүлдем гол соғылған жоқ. Бұл әйелдер футболы үшін сирек кездесетін жағдай. Матч 0:0 есебімен тең аяқталды.

Жетінші турдың соңғы матчында «Оқжетпес» чемпионаттағы алғашқы ұпайын алуға өте жақын болды. Көкшетаулық команда «Ұлытаумен» кездесуде есеп ашып, алға шыққанымен, басымдықты ұстап тұра алмады. Жезқазғандық арулар екі жауап гол соғып, ерік-жігер танытып, сырт алаңда жеңіске жетті.