Адина Бейбіт: «Астана» келесі ойында жеңіске жетуі тиіс

Әйелдер арасындағы Қазақстан чемпионатының алтыншы турында «Астана» мен «Тобыл» тең түсті. Матчтан соң, «Астана» командасының жартылай қорғаушысы Адина Бейбіт тілшісіне сұхбат беріп, жоспарларымен бөлісті.

 – Адина, матч туралы не айтасыз?

 – Соңына дейін жеңіс үшін ойнадық. Біз допқа көбірек иелік етіп, қарсыластың айып алаңында жүрддік. Бірақ шешуші соққыға бірдеңе жетіспеді. Барлығы тырысты, мінез көрсетті. Тек үш ұпай алмай, бір ұпайды қанағат тұтқанымыз болмаса, барлығы жақсы болды.Қарсыласқа да рахмет айтамын. 

 – Ойынның тең аяқталғанын айтып жатырмыз ғой. Шабуылда не жетіспеді?

 – Екінші таймда ойыншылардың көбі «жанып кетті». Аздап концентрация жоғалтып алды. 

 – «Астананың» әзірге жалғыз жеңісі бар. Келесі ойыннан не күтесіз?

– Барлығы да болады. Келесі матчта жеңіске жететінімізге сенемін. Сол үшін барымызды салып ойнаймыз. Қазір ойыншылардың барлығының көзінде от бар, жеңіске жету жолында ешқайсысы аянып қалмасы анық. Көңіл күй керемет. Өзімізді дәлелдегіміз келеді. Жеңіске жету үшін күш саламыз. 

 – Биылғы маусым көңілден шығып жатыр ма? Алғаш рет 14 команда қатысуда...

 – Әрине, бәрі керемет. Бұл қазақ әйелдер футболының дамуының алғышарты. Алғаш рет осындай ауқымды форматта өтіп жатыр. Барлығы тәжірибемен келеді. Еуропадағы әйелдер футболы елімізде дамитына сенемін. 

 – «Астана» осы маусымға қандай мақсат қойып отыр?

 – Кемі алғашқы бестікте болғымыз келеді. Мүмкіндік болса, топ-3 қатарына қосылуға да күш саламыз. 

 – Әңгімеңізге рахмет! Сәттілік тілейміз!