17.05.2025
Сергей Игнатович: Жартылай финалға дейін жеткен соң, финалға да шыққымыз келеді
14 мамырда Қазақстан кубогының ширек финал ойындары өтті. Сол кездесулердің бірі елордалық дербиге айналып, «Жеңіс» пен «Астана» клубтары өзара бақ сынады. Бұл матчтың жеңімпазы пенальти сериясында анықталып, «Жеңіс» командасы жеңіске жетті.
«Сары-қаралардың» қақпашысы Сергей Игнатович KFF League порталына сұхбат беріп, шиеленісті өткен ойын туралы, «Ордабасыдан» кету себебі және Қазақстан мен Беларусь құрамалары арасындағы жолдастық кездесуден не күтетінін айтты.
– Сергей, жеңіс құтты болсын! Ойын туралы не айта аласыз?
– Рақмет. Ойын өте ауыр өтті, көп күш жұмсадық. Бірақ жігіттер соңына дейін күресіп, шабуылда тоқтаған жоқ. Тіпті 120-минутта да жүгіріп жүрдік. Үш рет гол соғатын нақты мүмкіндігіміз болды. Егер сол сәттерді мүлт жібермесек, ойынды ертерек аяқтайтын едік.
– Ойын соңында екі пенальти қайтарып, қаһарманға айналдыңыз. Сол сәтте не сезіндіңіз?
– Әрине, жағымды эмоциялар болды. Керемет сезім. Пенальти сериясынан шынайы ләззат алып, әр сәттің қадірін сезінуге тырыстым. Ол кезде тек ойынды ойладым, нәтиже туралы ойламауға тырыстым.
– Матч алдында «Астана» төңірегінде түрлі жаңалықтар тарады, әсіресе қаржылық жағдайға қатысты. Бұдан хабарыңыз болды ма?
– Жоқ, естіген жоқпын. Жаңалықтарды көп оқымаймын, әсіресе «Астана» жайында. Менің білуімше, олар мықты команда, құрамында тәжірибелі ойыншылар бар. Қазақстандағы үздік ұжымдардың бірі.
– Беларусь құрамасына шақырту алмай жүргеніңізге біраз болды. Осы ойыныңыздан кейін шақырту күтесіз бе?
– Бір ғана ойынға қарап баға берілмейді деп ойлаймын. Әр матчта жақсы ойнап, өсу, жеңіске жету және өзіңді көрсету қажет. Сонда ғана шақырту келеді деп сенемін.
– Маусым айында Минскіде өтетін Беларусь пен Қазақстан құрамалары арасындағы жолдастық кездесуге тоқталсақ. Бұл матч туралы пікіріңіз қандай?
– Қызықты ойын болады деп ойлаймын. Көп жанкүйер жиналады, стадион да жақсы. Меніңше, екі команданың да мүмкіндігі тең – 50 де 50. Өзім де бұл кездесуді асыға күтіп жүрмін.
– «Ордабасыдағы» кезеңіңізді еске түсірсек. Клубтан не себепті кеттіңіз?
– Маусым соңына дейін келісімшартым болған. Кейін клубта басшылық пен бапкер ауысты, сол себепті келісімді ұзартпауға шешім қабылдадық.
– Кубок бәсекесінің жартылай финалында Қостанайдың «Тобылымен» ойнайсыздар. Бұл жолы екі матч ойналады – бірі үйде, бірі сырт алаңда. Қандай ойдасыз?
– Жартылай финалға дейін жеткен соң, финалға да шыққымыз келеді.
– Маусым соңына дейін «Жеңіс» қандай мақсат қойып отыр?
– Шынымды айтсам, қазір ойыннан ойынға дейін өмір сүріп келеміз. Жағдайды түзетіп, жеңіске жетуге тырысып жүрміз.
– Кубок жеңімпазы Еуропа лигасына жолдама алады. Мұны білген соң, жаңа мақсаттар пайда болды ма?
– Әрине. Жартылай финалға дейін жеткен соң, тоқтап қалуға болмайды. Алға жылжу керек. Талпынамыз. Егер шын жүректен қаласақ, бәріне қол жеткізуге болады.
Қосымша жаңалықтар
