Бірінші лига: Ertis алғаш рет гол жіберіп, «Каспий» қайта көш бастады

15-16 мамыр күндері футболдан Қазақстан Бірінші лигасының алтыншы ойындары өтті. Осы турдан кейін қайтадан көшбасшы ауысты. 

Матч нәтижелері:

 «Каспий» – «Түркістан» – 4:0

«Жетісай» – Ertis – 1:1

AKAS – «Екібастұз» – 2:0

«Алтай» – «Қайрат-Жастар» – 2:0

«Оңтүстік» – «Хан-Тәңірі» – 4:2

«Тараз» – SD Family – 1:1

«Шахтер» – «Актобе-Ж» – 3:1

15 мамыр

«Жетісай» – Ertis – 1:1

Ertis командасы Қайрат Нұрдәулетов жаттықтырған тұста мүлдем гол жібермеген еді. Осы жолы «Жетісайға» қонаққа барып, сол статистика бұзылды. Бұл жолы Никита Калмыков қақпасынан Нұржан Дәндібаев саңылау тапты. Үзіліске дейін командалар бір-бір голдан алмасты. Ал екінші таймда жанкүйерлер басқа голды көре алмады. Алаң иелері тең есепті сақтау үшін барынша жанталасып бақты. «Жетісай» ойыншылары осы матчта бес рет ескерту қағазына ие болды. Қорытынды есеп – 1:1. 

«Каспий» – «Түркістан» – 4:0

Осының алдында «Каспий» күтпеген жерде өз алаңында Өскеменнің «Алтай» клубына есе жіберген. Сөйтіп чемпионаттағы алғашқы ұпайынан айырылған. Ал бұл жолы ондай қателік жіберген жоқ. Ақтау ұжымы «Түркістан» қақпасына жауапсыз төрт гол салды. Қақпаларын құрғақ ұстап, Ertis командасының ұпай жоғалтқанын тиімді пайдаланды. Осылайша, қайтадан турнир кестесінде бірінші орынға көтерілді. 

AKAS – «Екібастұз» – 2:0

Бірінші лигадағы дебютант AKAS Алматыда «Екібастұзды» қабылдады. Қонақтар бұған дейін бесінші турда Қарағандының «Шахтерін» біраз әбігерге салған еді. Лига көшбасшыларының бірімен тең түскен «Екібастұз» бұл жолы ондай қарқын көрсете алмады. AKAS 2:0 есебімен сенімді түрде жеңіске жетті. Матчтағы екі голдың бірін ұлттық құраманың экс-шабуылшысы Сергей Гридин соқты. 

16 мамыр

«Алтай» – «Қайрат-Жастар» – 2:0

Өскемен командасы осының алдында «Каспийден» сырт алаңда үш ұпай алғанын жаздық. Бұл жолы өз жерінде жанкүйерлерін қуантуға тырысты. Турнир кестесінде көршілес орналасқан «Қайрат-Жастар» командасын қабылдап, сенімді түрде жеңіске жетті. «Восток» стадионындағы ойынның басты қаһарманы – 26 жастағы Әділет Өмарбек болды. Ол бұл матчта дубль жасады. Екі голын да екінші таймда соқты. Сондай-ақ «Алтай» қақпашысы Әбілқайыр Алиакбардың да шеберлігін ерекше айта кету керек.

«Оңтүстік» – «Хан-Тәңірі» – 4:2

Соңғы үш матчта «Оңтүстік» командасы жағдайларын әжептәуір жақсартып алды. Команда осы ойындарда мүмкін болған 9 ұпайды еншіледі. Алтыншы турда олар Шымкентте «Хан-Тәңірі» командасын қабылдаған. Алаң иелері есепті ойынның басында-ақ ашты. Сосын үзіліске дейін тағы екі гол соғып үлгерді. Алматы командасы тек екінші таймның ортасында оянып, есеп айырмасын бір допқа қысқартып үлгерді. Бірақ таразы басын теңестіре алмады. Тіптіі, «Оңтүстік» сапынан қорғаушы Әли Тұрғановтың қызыл қағаз алғаны да көмек болмады. Есесіне, Николай Стоякин шәкірттері есепті 4:2-ге жеткізді.

«Тараз» – SD Family – 1:1

«Тараз» қатарынан үш ойында жеңіске жете алмай келеді. Нұркен Мәзбаев шәкірттері бұған дейін екі матчқа қарағанда осы жолы тең түсті. Команда өз алаңында SD Family клубымен ұпай бөлісті. Қарсыластар бірінші таймда бір-бір голдан салып алған. Таблодағы көрсеткіш үзілістен кейін өзгерген жоқ. Есесіне, екінші таймда төрешінің көрсететін қағазы көбейді. Тек сары қағаз емес, алаңнан да ойыншы қуылды. Матчтың 72-минутында елорда командасының ойыншысы Абзал Баймолда ойынды ерте аяқтауға мәжбүр болды. Бірақ «Тараз» ол мүмкіндікті пайдалана алмады. 

«Шахтер» – «Актобе-Ж» – 3:1

«Шахтер» өз алаңында «Ақтөбенің» жастарын жеңіп, екінші орынға көтерілді. Андрей Финонченко шәкірттері өздеріне жүктелген міндетті орындап шықты. Осы матчта «Шахтер» сапынан Диас Қалыбаев дубль жасады. Бір голды Юрий Перцух соқты. Қонақтар тек бір доппен жауап қайтарды. Қорытынды есеп – 3:1. 

Бірінші лиганың жетінші турында кездесетіндер:

22 мамыр

«Қайрат-Жастар» - «Шахтер»
 SD Family – «Каспий»
Ertis – «Оңтүстік»

23 мамыр

«Ақтөбе-Ж» - АҚАС
«Екібастұз» - «Жетісай»
«Хан Тәңірі» - «Тараз»
«Түркістан» - «Алтай».