Екінші лига: «Астана-Ж», «Жас Қыран» және «Жайық» командалары жеңіліссіз келе жатыр

«Астана-Ж» – «Жетісу-Ж» – 8:1

«Алтай-Ж» – «Жеңіс-Ж» – 0:0

«Тобыл-Ж» – «Ұлытау-Ж» – 5:0

«Оқжетпес-Ж» – «Шахтер-Ж» – 0:7

«Елімай-Ж» – «Қызылжар-Ж» – 2:2

 

«Солтүстік-шығыс» конференциясында «Астана» клубының жастар командасы бес тур бойы қарсыластарын қоғадай жапырып келеді. Елорда ұжымы бесінші ойынын да ірі есеппен жеңіп, турнир кестесінде жеке-дара көш бастап тұр. Бұл жолы олар Талдықорғанның «Жетісу-Ж» футболшыларын 8:1 есебімен тас-талқанын шығарды. «Астана-Ж» сапынан Арсен Ахметов хет-трик авторы атанды. 

 

Қостанайдың «Тобыл-Ж» командасы өз алаңында «Ұлытау-Ж» клубын 5:0 есебімен ойсырата жеңді.

 

5-турдағы тағы бір ірі жеңіс Көкшетауда тіркелді. Қарағандының «Шахтер-Ж» сырт алаңда «Оқжетпес-Ж» қақпасына жауапсыз жеті гол соқты. Кездесуде қонақтар сапынан Асхат Мұқұшев хет-трик жасап, командасының ірі жеңісіне сүбелі үлес қосты.

 

Ал Семейде жергілікті «Елімай-Ж» мен «Қызылжар-Ж» арасында өте тартысты матч өтті. Қарсыластар кезек-кезек есепте алға шығып отырғанымен, кездесу 2:2 есебімен тең аяқталды.

 

 

«Каспий-Ж» – «Арыс» – 0:3

«Жас Қыран» – «Тұран-Ж» – 1:0

«Жайық» – «Атырау» – 2:0

Jeyran – «Талас» – 0:1

«Ордабасы-Ж» – «Мақтаарал» – 5:1

 

«Астана-Ж» секілді «Оңтүстік-батыс» конференциясында Алматының «Жас Қыраны» әзірге жеңіліссіз келе жатыр. 5-турда олар өз алаңында Түркістанның «Тұран-Ж» командасын қабылдап, 1:0 есебімен жеңіске жетті. Маңызды үш ұпайын олжалаған Алматы ұжым турнир кестесіндегі көшбасшылығын жалғастыруда.

 

Сондай-ақ «Жайық» командасы да ұпайдан шашау шығырамай келеді. Дегенмен, оралдықтар «Жас Қыранға» қарағанда бір ойын кем өткізген. Бұл турда олар «Атырау» жастар командасын 2:0 есебімен жеңді.

 

«Жас Қыран» мен «Жайықты» өкшелеп келе жатқан «Арыс» 5-турда Ақтауға қонаққа барып, «Каспий-Ж» клубын 3:0 есебімен сенімді түрде жеңді.

 

Ал Түркістан облысының тағы бір өкілі «Мақтаарал» қатарынан екінші ойында жеңілді. Бұл жолы «мақташылар» Шымкентте «Ордабасы-Ж» командасына 5:1 есебімен жол берді. Алаң иелері сапынан Әлібек Халдар мен Жасұлан Әмір дубль авторы атанды.

 

Екінші лиганың алтыншы тур ойындары 13-14 мамыр күндері өтеді.