28.04.2025
Джеффри Чинеду: Еуропаның танымал клубтарында Қазақстан чемпионатын қарап тұратын футболшылар көп
Футболдан Қазақстан Премьер-лигасының әзірге алты туры ғана өтті. Соған қарамастан көшбасшы орынға талас тартыс әр тур сайын қыза түсуде. «Атырау» клубымен өткен соңғы матчта дубль жасаған «Астана» клубының шабуылшысы Джеффри Чинеду ойыннан кейін KFF League тілшісіне сұхбат беріп, биылғы маусымдағы мақсат, чемпионаттың деңгейі туралы айтып берді.
– Джеффри, жеңіс құтты болсын. Алдымен матч туралы айта кетсеңіз.
– Көп рахмет. Бастысы, үш ұпай алдық. Соған қуаныштымыз. Өте қиын матч болды. Бірінші таймды жақсы өткізген едік. Екінші кезеңде қарсыласқа көп мүмкіндік беріп қойдық.
– Екінші таймда «Астана» гол соғатын мүмкіндіктерін пайдалана алмады...
– Ондай сәттер болғаны жасырын емес. Біз өз мүмкіндігімізді мүлт жібермеуді және басқа да аспектілерді жетілдіру бойынша жұмыс істей беруіміз қажет.
– Былтырғы маусымда команданың үздік сұрмергені атандыңыз. Биылғы маусымда сәл қиындау соғып жатқан тәрізді. Осының себебін түсіндіре аласыз ба?
– Футбол сонысымен де қызық. Әр түрлі сәттер болады. Кейде бабыңда жүресің, кейде ойынын жүрмейді. Әрбір футболшының жұлдызды және құлдырау кезеңі болады. Ең бастысы, нәтижені жақсартуға еңбек ете беру керек.
– Алда «Атыраумен» тағы ойнайтын болдыңыздар. Аз уақыттың ішінде екі рет кездесу қиын емес пе?
– Сондай жағдай. Біз алаңға шығып ойнап, жұмысымызды жалғастыруға міндеттіміз. Әлбетте, Атыраудағы ойынның оңай болмайтынын біліп тұрмыз. Біз әрбір қарсыласты құрметтейміз, әрқайсысына бар күшімізді салып дайындаламыз. «Тұран» және «Атырау» командаларымен өткен ойындарды қарап көріңіздер, ешқайсысы оңайшылықпен берілмейді.
– Былтыр «Байер» шабуылшысы Бонифасе УЕФА Конференция лигасында соққан голыңызды әлеуметтік желіде бөлісті. Тағы қандай танымал футболшылармен араласып тұрасыз?
– Жоғары деңгейлі чемпионаттарда ойнайтын достарым көп. Олардың арасында «Брюгге», «Байер» клубтарындағы футболшылар бар. Бұл клубтардағы достарым Қазақстан чемпионатына зер салып, мені қолдауға тырысады. Біз бір-біріміздің ойынымызды қарап тұрамыз.
– Команда биылғы маусымға қандай мақсат қойып отыр?
– «Астана» клубы алдына үнемі бір ғана мақсат қояды. Ол – чемпион атану. Бізге бұл мақсатқа жету ешқандай кедергі жоқ, қолымыздан келеді деп ойлаймын. Өзім көбірек гол соғуды қалаймын. Әрине, соңғы ойындарда бұл жағы сәл қиындау болып тұр. Бірақ бас бапкер маған сенім артады және қолдайды. Осыған қуаныштымын.
– «Астана» жазда УЕФА Конференция лигасындағы жорығын бастайды. Биыл тағы да топтық кезеңге шығуға мүмкіндік бар ма?
– Бізде барлық мүмкіндік бар. «Астана» команда ретінде мықты. Ұжымдық ойынға сүйенсек, көп нәрсеге қол жеткізе аламыз. Біз мүмкіндігінше біраз жетуге тырысамыз және бұл мүмкін екеніне сенімдімін.
– Әңгімеңізге рахмет! Сәттілік тілейміз!
Қосымша жаңалықтар
