Әлімжан Асқар: «Астана» қазір ҚПЛ-дағы ең тұрақты ойын көрсетіп жатқан команда, «Ақтөбеден» жеңілмейді

21-22 маусым күндері Қазақстан Премьер-лигасының 13-тур ойындары өтеді. Осы матчтар қарсаңында алматылық белгілі спорт комментаторы Әлімжан Асқар KFF League сайтына өз болжамын жасады.

 «Жеңіс» – «Атырау»

Өткен турда алғаш рет жеңіске жеткен «Жеңіс» футбол клубы елордалық жанкүйерлерді тағы да қуантуға ниетті. Ал қарсыласы» «Атыраудың» мәселесі шаш-етектен. «Мұнайшылардың» басшылығы тығырықтан шығар жолды таба алмай әлек. Осы сәтті ұтымды пайдаланып, Андрей Демченконың жігіттері қатарынан екінші матчта 3 ұпай алуға тиіс. Бірақ, әдеттегідей, гол көп болмайды.

 «Қайрат» – «Қызылжар»

 «Қайрат» соңғы бес ойында бір-ақ рет жеңіске жетті. Ақтөбедегі матчта Алматының ұжымы мінез көрсеткенімен, Талдықорғанда тағы ұпай жоғалтты. Бұл жолы чемпиондар «Қызылжармен» ойынды өз алаңында өткізеді. Гол көп соғып, жанкүйерлерін қуантады. Сондықтан матчтағы жалпы голдар саны 3-тен асады.

 «Елімай» – «Тұран»

 «Тұранның» тағдыры бір күнде өзгеріп шықты. Биыл еурокубоктарға жолдама алуы үшін таласар деп ойлаған клубымыз енді Премьер-лигадан ұшып кетпесе игі. Семейде түркістандықтардың «Елімайға» қарсы тұруға ресурсы жетпейді. Тұран жеңіледі.

 «Тобыл» – «Жетісу»
 Екі команда да гол соғады. Самат Смақовтың жұмысы жақсы көрініп жатыр. Талдықорғандықтардың ойыны түзеліп қалды. «Жетісу»  шабуылшылары «Тобыл» қақпасының торын тулатады деп отырмын. 

 «Оқжетпес» – «Ордабасы»

 Көкшетау қаласындағы стадионда жөндеу жұмыстары жүріп жатқандықтан, матч Шымкентте өтеді. Демек, түздегі ойынның өзін «Ордабасы» үйде өткізеді. Бұл қосымша көмек болады. Еурокубокқа дайындығын пысықтайтын «Орданың» футболшылары «Оқжетпестен» жеңілмейді деген болжамым бар. 

 «Қайсар» – «Ұлытау»

 25-турдың матчы 13-турдағы ойындардың арасында өтеді. Ғани Мұратбаев стадионында гол аз соғылады. Бұл ойында «Ұлытау» капитаны Жасұлан Молдақараевтан үміт күтемін. Жалпы матчта екіден гол көрмейтініміз анық.

«Ақтөбе» – «Астана»

Осы турдың орталық ойыны. Қобыланды батыр стадионындағы атмосфера керемет болады. Ақтөбеліктер жанкүйерлерін қуантуы үшін барын салады. Әсіресе, команда сапын Георгий Жуков толықтырғаны сенім көбейтеді. Дегенмен, «Астана» қазір ең мықты ойын көрсетіп жатқан ұжым. Олар сырт алаңда да «Ақтөбеден» жеңілмейді.