Alatau City Bank – Қазақстан футбол федерациясының жаңа бас демеушісі

Қазақстан футбол федерациясы мен Alatau City Bank стратегиялық серіктестік туралы келісімге қол қойды. Биылдан бастап банк ҚФФ-ның бас демеушісі, Қазақстан Премьер-лигасының титулдық серіктесі, сондай-ақ футболдан ұлттық құраманың және футзал құрамаларының ресми демеушісі атанды.

Бұл серіктестік – отандық футболды дамытудағы маңызды кезеңнің басталуы. ҚФФ мен Alatau City Bank арасындағы ынтымақтастық ортақ құндылықтарға, спорт мәдениетін нығайтуға және жастарды салауатты өмір салтына баулуға негізделген.

Alatau City Bank директорлар кеңесінің төрағасы Қуат Қожахметов:

«Футбол – тек ойын емес, ол – миллиондаған қазақстандықтарды біріктіретін энергия көзі. Біз қазақстандық футболдың халықаралық аренадағы орнын нығайтуды ғана емес, бұқаралық спорт пен салауатты өмір салтын насихаттауға үлес қосуды көздейміз. Бұл әріптестік балалар мен жасөспірімдер спортын дамытуға тың серпін бермек. Себебі ұлттық футболдың болашағы дәл осы жас таланттарды қолдаудан басталады. Біз футбол саласындағы осындай ауқымды істің басынан табылғанымызға қуаныштымыз. Ел игілігі үшін ауқымды жобаларды ҚФФ-мен бірге жүзеге асыратынымызға сеніміміз мол».

Ірі қаржы институтымен жасалған бұл келісім ҚФФ басшылығының футболға жеке инвестиция тартудағы стратегиялық бағытын айқындайды.

Қазақстан футбол федерациясының президенті Марат Омаров:

«Alatau City Bank сынды қуатты серіктестің қолдауы – қазақстандық футбол үшін елеулі қадам. Бұл ынтымақтастық бізге батыл шешім қабылдауға, жобалар аясын кеңейтуге, құрамалар жүйесін нығайтып, лигаларды дамытуға мүмкіндік береді. Банк басшылығының ҚФФ-ға сенімі үшін алғыс білдіреміз. Бұл спорт пен бизнестің табысты  ынтымақтастығының жарқын үлгісіне айналады деп  сенеміз».

Аталған серіктестік кәсіби турнирлерді қаржыландыру, ұлттық құрамаларды қолдау, балалар мен жасөспірімдер футболын дамыту, сондай-ақ әлеуметтік және білім беру жобаларына қатысу сынды негізгі бағыттарды қамтиды.

Бұл келісім ҚФФ-ның қаржылық тұрақтылығын күшейтіп қана қоймай, футболды ел өміріндегі маңызды бағыт ретінде дамытуға жаңа мүмкіндіктер ашады.

Alatau City Bank – Қазақстандағы ірі әмбебап банк, активтер көлемі бойынша елдегі банктер арасында алтыншы, ал меншікті капиталы бойынша үшінші орында. Бұрын бұл банк «Jusan Bank» брендімен жұмыс істеген.