15.05.2025
Қазақстан кубогы: «Ордабасы», «Қызылжар», «Жеңіс» және «Тобыл» клубтары жартылай финалға шықты
14 мамырда Қазақстан кубогының ширек финал ойындары өтіп, жартылай финалға жолдама алған барлық команда белгілі болды. ½ финалға өткен клубтар қатарында «Қайрат» пен «Астана» жоқ.
«Ордабасы» – «Қайрат» – 1:0
Бұл екі команда бұған дейін Премьер-лиганың екінші турында кездесіп, Алматыда өткен ойында «Қайрат» «Ордабасыны» 4:0 есебімен ойсырата жеңген болатын. Алайда бұл жолы жағдай басқаша өрбіді. Кейінгі турларда қарқынын күшейткен жергілікті команда тәуір ойын көрсетіп, турнирдің басты фавориттерінің бірі саналатын «Қайратты» жарыс жолынан шығарды. Жеңіс голын алғашқы таймда Жоао Паолиньо соқты. «Қайрат» есепті теңестіруге тырысқанымен, шымкенттіктер қорғанысын бұза алмады. Осылайша, «Ордабасы» жартылай финалға жолдама алды.
«Қызылжар» – «Елімай» – 0:0 (пенальти – 3:1)
Петропавлдағы «Қарасай» стадионында өткен ойында негізгі және қосымша уақытта есеп ашылмады. Дегенмен пенальти сериясында алаң иелері сенімдірек ойнап, 3:1 есебімен жеңіске жетті. Бұл нәтижемен «Қызылжар» жартылай финалға өтіп, «Ордабасыға» қарсы ойнайды. Ал турнирден шығып қалған «Елімай» мен «Қайрат» ел чемпионатының келесі турында өзара кездеседі.
«Жеңіс» – «Астана» – 1:1 (пенальти – 4:3)
Астаналық дербиде бірінші таймда есеп ашылмады. 57-минутта Александр Марочкин бұрыштамадан кейін баспен дәл соққы жасап, «Астананы» алға шығарды. Матч соңында «Жеңіс» есепті теңестіріп, ойынды овертаймға жеткізді. Қосымша уақытта гол соғылмағандықтан, бәрі пенальти сериясында шешілді. Бұл серияда «Жеңістің» қақпашысы Сергей Игнатович екі бірдей соққыны қайтарып, командасын келесі кезеңге алып шықты.
«Тұран» – «Тобыл» – 0:2
Ширек финалдағы ең сенімді жеңіс Түркістанда тіркелді. Бірінші таймда ойын тең дәрежеде өрбігенімен, үзілістен кейін «Тобыл» шабуылын үдете түсті. Нәтижесінже Дэвид Энен мен Иван Миладиновичтің голдары қостанайлықтарға айқын жеңіс сыйлады. Енді жартылай финалда «Тобыл» «Жеңіспен» кездеседі.
Жартылай финал матчтары екі ойыннан тұрады – үйде және түзде өтеді.
Алғашқы матчтар – 29 мамыр:
«Қызылжар» – «Ордабасы»
«Жеңіс» – «Тобыл»
Қайтар матчтар – 19 маусым:
«Ордабасы» – «Қызылжар»
«Тобыл» – «Жеңіс»
Қосымша жаңалықтар
