12.05.2025
ҚПЛ: Сегізінші турда «Ордабасы» ірі есеппен жеңіске жетсе, «Астана» алғаш рет жеңілді
9-11 мамыр күндері футболдан Қазақстан Премьер-лигасының сегізінші тур ойындары өтті. Сонымен қатар 20-турдың бір кездесуі де ойналды.
Матч нәтижелері:
«Жеңіс» – «Қайрат» – 1:2
«Қызылжар» – «Ұлытау» – 2:1
«Тұран» – «Атырау» – 1:0
«Астана» – «Тобыл» – 1:3
«Жетісу» – «Оқжетпес» – 1:3
«Ордабасы» – «Қайсар» – 5:0
«Ақтөбе» – «Елімай» – 1:0
9 мамыр
«Жеңіс» – «Қайрат» – 1:2
Бұл 20-турдан шегерілген кездесу болатын. Командалар айналым тәртібіне байланысты орын алмастырғандықтан, ойын Алматыда емес, елордада өтті. Алайда бұл жағдай «сары-қаралар» үшін еш кедергі болған жоқ. Алматылықтар «Астана Аренада» өздерін үйдегідей сезініп, алғашқы таймда Гиорги Зария мен Валерий Громыконың арқасында екі гол соқты. Ал екінші таймның басында «Қайрат» қақпашысы Темірлан Анарбеков (бұрын «Жеңіс» сапында ойнаған) қызыл қағаз алып, алаңнан қуылды. Он ойыншымен қалған «Қайрат» араға біраз уақыт салып қақпасына гол өткізіп алды. Дегенмен, матч соңына дейін қонақтар есептегі басымдығын сақтап, турнир кестесіндегі көшбасшылық орнын қорғап қалды.
10 мамыр
«Қызылжар» – «Ұлытау» – 2:1
«Қызылжар» осы маусымда алғаш рет өз алаңында ойнап, чемпионат дебютанты «Ұлытаудан» басым түсті. Алаң иелері «Қарасай» стадионына жиналған жанкүйерлердің зор қолдауына ие болып, 12-минутта Илья Мартинович есеп ашты. Одан кейін «Ұлытау» ойыншысы Жасұлан Молдақараев 8 минут ішінде екі сары қағаз алып, алғашқы таймда-ақ алаңнан қуылды. Соған қарамастан, қонақтар есепті теңестіре алды. Алайда ойынның соңғы минуттарында Сенин Себайи мергендігімен көзге түсіп, «Қызылжарға» қатарынан үшінші жеңісті сыйлады.
«Тұран» – «Атырау» – 1:0
«Тұран» мен «Атырау» командалары биылғы маусымда осымен екінші мәрте кездесті. Бұған дейін Қазақстан кубогының 1/8 финалында «Тұран» «Атырауды» 2:0 есебімен жеңген болатын. Бұл жолғы матчта да алаң иелерінің мерейі үстем болды. Бірінші таймның соңында Абылайхан Жұмабектің соққан жалғыз голы матч тағдырын шешті. Ал «Атырау» қатарынан тоғызыншы рет жеңіліп отыр.
«Астана» – «Тобыл» – 1:3
Турдың басты сенсациясы елордада тіркелді. Жеті дүркін ел чемпиондары бұл ойынға дейін бірде-бір жеңіліссіз келген еді. Алайда алғашқы тайм аяқталғанша «Тобыл» қарсылас қақпасына үш гол соғып, айқын басымдыққа қол жеткізді. Екінші таймда «Астана» есеп айырмасын қысқартқанымен, жеңілістен құтыла алмады. Осы жеңістен кейін «Тобыл» турнир кестесінде елордалық клубқа жақындай түсті.
11 мамыр
«Жетісу» – «Оқжетпес» – 1:3
Көкшетаулықтар бұл турда да жанкүйерлеріне тосынсый жасады. Бұған дейін сырт алаңда «Елімайды» жеңген «Оқжетпес» бұл жолы да қонақта үш ұпай еншіледі. Талдықорғанда өткен кездесудің алғашқы бөлігінде командалар бір-бір гол соғып, тең дәрежеде ойнады. Алайда екінші таймда «Оқжетпес» футболшылары басымдықты өз қолына алып, матч соңына дейін тағы екі гол соғып, кезекті жеңісіне жетті.
«Ордабасы» – «Қайсар» – 5:0
«Қызылжар» сияқты «Ордабасы» да осы маусымда алғаш рет өз алаңында өнер көрсетті. Қажымұқан Мұңайтпасов атындағы стадионда жанкүйерлердің зор қолдауымен өткен ойында шымкенттік команда «Қайсардың» қақпасына жауапсыз бес гол соғып, ірі жеңіске қол жеткізді. Бұл – «Ордабасының» Премьер-лигадағы қатарынан төртінші жеңісі. Ал «Қайсар» тағы да ұтылды.
«Ақтөбе» – «Елімай» – 1:0
Турдың соңғы матчында «Ақтөбе» мен «Елімай» Ақтөбедегі Қобыланды батыр атындағы стадионда кездесті. Бірінші таймда екі команда да аса қауіпті сәттермен көзге түсе алмады. Тек екінші таймның басында Әлібек Қасым айып добынан тамаша гол соғып, командасына маңызды үш ұпай сыйлады. Бұл жеңістің арқасында «Ақтөбе» турнир кестесінде екінші орынға көтерілді.
Тоғызыншы тур ойындары:
17 мамыр
«Оқжетпес» – «Ақтөбе»
«Атырау» – «Жетісу»
18 мамыр
«Ұлытау» – «Астана»
«Тобыл» – «Ордабасы»
«Қайсар» – «Тұран»
«Елімай» – «Қайрат»
«Жеңіс» – «Қызылжар»
16-турдың кейінге шегерілген ойыны:
14 мамыр
«Ақтөбе» – «Қайсар»
Қосымша жаңалықтар
ӘЙЕЛДЕР ЛИГАСЫ
Айсана Зекен: «Жеңіс» қыздар командасы маусымды алғашқы төрттікте аяқтағымыз келеді
13.05.2025
