Бірінші лига: «Шахтер» мен Ertis тең түсіп, «Каспий» көш басына шықты

Футболдан Қазақстан Бірінші лигасының төртінші тур ойындары мәреге жетті. Бұл жолы Ақтаудың «Каспий» клубы «Шахтер» мен Ertis командасының ұпай жоғалтқанын тиімді пайдаланып, көш басына шықты.

Матч нәтижелері:

«Жетісай» – SD Family – 1:2

«Шахтер» – Ertis – 0:0

«Алтай» – «Ақтөбе-Ж» ­– 0:0

«Қайрат-Жастар» – «Екібастұз» – 7:0

«Оңтүстік» – «Түркістан» – 3:0

«Тараз» – «Каспий» – 1:2

AKAS – «Хан-Тәңірі» – 1:1

 
1 мамыр

«Жетісай» – SD Family – 1:2

Бұл турдың алғашқы матчы «Жетісай» мен SD Family арасындағы кездесумен басталды. Қонақтар жылдам есеп ашып, үзіліске жеңімпаз болып шыққан. Дегенмен екінші таймда алаң иелері таразы басын теңестіріп үлгерді. Бірақ «Жетісайға» бір ұпай да бұйырмады. SD Family бәрібір де екінші голын соғып, үш ұпайға қол жеткізді.  Бұл олардың Бірінші лигадағы үшінші жеңістері. Команда көшбасшыларға жақындай түсті.

 «Шахтер» – Ertis – 0:0

Жанкүйерлер асыға күткен ойын. Бірінші лиганың алғашқы айналымындағы орталық кездесу. Бірақ Қарағандыдағы матчта есеп ашылмады. Екі команда өте сақ ойнап, тең тарқасты. Сөйтіп, қос көшбасшы чемпионатта ұпай жоғалтты. Әзірге Ertis өз қақпасына гол жіберген жоқ. Ал «Шахтер» болса, бірінші рет биылғы маусымда голдан аман қалды. 

 «Алтай» – «Ақтөбе-Ж» ­– 0:0

Тағы бір есеп ашылмаған ойынға куә болдық. «Алтай» мен «Ақтөбе-Ж» арасындағы кездесу де 0:0 есебімен аяқталды. Негізі «Алтай» бұл ойынның сөзсіз фавориті болған. Алайда «Ақтөбенің» жастары Сергей Хижниченко бастаған командаға қарсы тұра алды. 

 «Қайрат-Жастар» – «Екібастұз» – 7:0

Есесіне Алматыдағы ойында голға қарық болдық. «Қайрат-Жастар» командасы Тимур Сегізбаев атындаға академияның алаңында «Екібастұзды» қабылдап, жеті жауапсыз гол соқты. Үш футболшы дубль жасады. Атап айтсақ, Исмаил Бекболат, Рамазан Бағдат және Данияр Ташпулатов, 

2 мамыр

«Оңтүстік» – «Түркістан» – 2:0

Осы турдың алдында екі команда Бірінші лиганың соңғы орынында болған. Өйткені қос ұжым да ұпайға қол жеткізбеген. Доп айырмашылығы бойынша Шымкент клубы соңғы тұрған еді. Осы кездесуден кейін «Оңтүстік» қарсыласын ғана емес, тағы бірнеше команданы басып озды. Николай Стоякин шәкірттері маусымдағы алғашқы жеңістерін тойлады. «Түркістан» болса, Бірінші лигада ұпай алмаған жалғыз клуб болып тұр. 

 «Тараз» – «Каспий» – 1:2

Ақтаудың «Каспий» клубы егер осы ойында жеңіске жетсе, турнир кестесінде жеке-дара көш бастайтындарын жақсы түсінді. Алайда алаң иелерінің де өз жоспары болды. Есепті де 9-минутта «Тараз» футболшылары ашқан. Дегенмен үзіліске шығатын тұста қазір «Каспийде» ойнап жүрген Жамбыл футболының түлегі Берік Айтбаев таразы басын теңестірді. Ал 79-минутта Нұрмұхамед Ислам қонақтарға жеңіс сыйлады.

Осылайша «Каспий» лигадағы жеңістерінің санын төртеуге дейін жеткізіп, турнир кестесінде бірінші орынға көтерілді.

AKAS – «Хан Тәңірі» – 1:1

Алматыдағы дербиге ауа-райының қолайсыздығы да кедергі келтірген жоқ. Екі команда да жеңісті оңайшылықпен бере салмады. Есепті AKAS футболшылары ашқан. Оған «Хан Тәңірінің» де жауабы бар болып шықты. Артем Литоштың алыстан тепкен добы қақпа торынан табылып, таразы басын теңестірді. Бұл осы турдағы ең әдемі голдардың бірі болары сөзсіз. 

Бесінші турда кездесетіндер:

8 мамыр

«Ақтөбе-Ж» – «Қайрат-Жастар»

«Түркістан» – «Тараз»

Ertis – AKAS

SD Family – «Оңтүстік»

9 мамыр

«Екібастұз» – «Шахтер»

«Хан-Тәңірі» – «Жетісай»

«Каспий» – «Алтай».