24–25 сәуір күндері футболдан Бірінші лиганың үшінші тур ойындары өтті. Ең тартысты кездесу Алматыда өтіп, «Шахтер» аз құраммен ойнаса да, «Хан-Тәңірі» клубынан жеңісті жұлып алды.
Ойын нәтижелері:
«Екібастұз» – «Ақтөбе-Ж» – 3:3
«Түркістан» – «Жетісай» – 0:1
SD Family – AKAS – 1:0
«Каспий» – «Оңтүстік» – 3:1
«Тараз» – «Алтай» – 3:0
«Хан-Тәңірі» – «Шахтер» – 2:3
Ertis – «Қайрат-Жастар» – 1:0
24 сәуір
«Екібастұз» – «Ақтөбе-Ж» – 3:3
Бұл кездесуге дейін екі ұжым да біріншілік аясында әлі бірде-бір гол соқпаған еді. Үшінші турда екі команданың гол соғуға деген тәбеті ашылып, алғашқы үш минут ішінде бір-біріне голмен жауап қайырды. Бірінші таймды «Екібастұз» сенімді түрде 3:1 есебімен өз пайдасына аяқтады. Алайда үзілістен кейін қонақтар басымдықты өз қолдарына алып, матч соңына дейін таразы басын теңестірді – 3:3. Айта кету керек, 63-минутта екі команданың бір-бір ойыншысы алаңнан қуылып, матчты 10 ойыншымен аяқтады.
«Түркістан» – «Жетісай» – 0:1
Екі оңтүстік команданың тартысында қонақтар мерейі үстем болды. Ойын тағдырын Данияр Ерланның 60-минутта соққан жалғыз голы шешті. Ал «Түркістан» үш турдан кейін де ұпай жинай алмай, турнир кестесінің соңына түсіп қалды.
SD Family – AKAS – 1:0
Бұл матчтың да тағдырын бір ғана гол шешіп кетті. Үзіліске дейін алаң иелері нәтижелі соққы жасап, гол соқты. Алматылық қонақтар есепті теңестіруге тырысқанымен, SD Family жеңісін сақтап қалды. Сөйтіп алты ұпай жинаған астаналық ұжым көш басындағы топқа жақындады.
«Каспий» – «Оңтүстік» – 3:1
Ақтаулықтар өз алаңында сенімді жеңіске жетті. Бірақ үш ұпай оңайлықпен келген жоқ. Кездесудің есебі тек екінші таймда ашылды. Гол соққаннан кейін көп ұзамай «Каспий» ойыншысы Ерлік Жұмабай екі сары қағаз алып, алаңнан қуылды. Соған қарамастан, тәжірибелі Бауыржан Байтана мен Еркебұлан Нұрғалиев мергендік танытып, есепті ұлғайтты. Қонақтар бір голмен қарымта қайтарғанымен, «Каспий» таблодағы көрсеткішті ойын соңыңа дейін сақтап қалды.
25 сәуір
«Тараз» – «Алтай» – 3:0
«Алтай» клубы бұл турға дейін өз қақпасына бірде-бір гол өткізбей, жеңіліссіз келе жатқан еді. Алайда «Алтайдың» бұл сериясын үшінші турда жамбылдықтар тоқтатты. Нұркен Мазбаевтың командасы алғашқы таймда – екі, екінші таймда бір гол соғып, қонақтарды ірі есеппен тізе бүктірді. Осылайша, «Алтай» алғашқы жеңілісіне ұшырап, «Тараз» қатарынан екінші жеңісіне қол жеткізді.
«Хан-Тәңірі» – «Шахтер» – 2:3
Бұл кездесу тек үшінші турдың емес, жалпы маусымның ең драмалық ойыны болды деп айтуға болады. Жоғары топқа жолдамадан үміткер «Шахтер» табанды қарсыласқа тап болып, қиын матчта жеңіске жетті. Қарағандылықтар бірінші тайм ортасында жеңіліп жатып, матч соңында тамаша камбэк жасап кетті. Екінші таймда «Шахтер» бір ойыншы кем болып ойнап, ол жетпегендей Игорь Шацкий қателік жасап, өз қақпасына күлкілі гол өткізіп алды. Матчтағы жеңіс голын соңғы минуттарда Қазақстан құрамасының бұрынғы ойыншысы Юрий Перцух соққанын айта кеткен жөн.
Ertis – «Қайрат-Жастар» – 1:0
Павлодарда өткен бұл ойын жергілікті жанкүйерлердің қызығушылығын тудырды. Ertis футболшылары ойын бастала салып есеп ашып, жиналған жанкүйерлерге қуаныш сыйлады. Екінші таймда «Қайрат-Жастардың» ойыншысы Әлихан Исраилов екі сары қағаз алып, алаңнан қуылды. Осылайша, Ertis қатарынан үшінші ойында жеңіске жетіп, әлі де қақпасына гол өткізбей келеді.
4-турда өтетін ойындар:
1 мамыр
«Жетісай» – SD Family
«Шахтер» – Ertis
«Алтай» – «Ақтөбе-Ж»
«Қайрат-Жастар» – «Екібастұз»
2 мамыр
«Тараз» – «Каспий»
«Оңтүстік» – «Түркістан»
AKAS – «Хан-Тәңірі»