– Неманья, командаға келгеніңізге әлі үш ай да бола қойған жоқ. Бірақ қазір «Тобылдың» орталық қорғанысын сізсіз елестету қиын. Қалайша тез ұжымға бейімделіп, негізгі құрам ойыншысына айналдыңыз?
– Иә, мұнда келгеніме бар-жоғы үш ай ғана болды, бірақ өзімді клубта әлдеқайда ұзақ жүргендей сезінемін. Командаға сіңісу мен үшін қиын болған жоқ. Жігіттер тамаша қарсы алды, сондықтан әріптестеріме және жанкүйерлерге барымды салып ойнау арқылы жауап беруім керек деп ойладым.
– Қазақстан чемпионатындағы (ҚПЛ) барлық дерлік алпауыт клубтарға қарсы ойнап үлгердіңіз. Қайсысы ерекше әсер қалдырды?
– Мен айтар едім, бұл – «Қайрат». Олар өте мықты команда болып көрінді, шабуылда да, қорғаныста да деңгейі жоғары. Мұны кейінірек Чемпиондар лигасына шыққан кездері тағы да дәлелдеді.
– Алда «Ордабасыға» қарсы Қазақстан кубогының финалы күтіп тұр. Кәсіби мансабыңызда трофейге мұншалықты жақын болған кезіңіз алғаш рет пе?
– Бір кездері Черногория чемпионатында жеңіске өте жақын болдым. Бірақ кубок финалына алғаш рет шыққалы тұрмын.
– Қазақстан кубогының шешуші матчы алдындағы қарсылас туралы не айтар едіңіз? Финалға санаулы күндер қалғанда, чемпионаттағы кейінге шегерілген матчта «Ордабасыны» жеңгендеріңіз «Тобылға» қаншалықты тиімді болды?
– «Ордабасы» – өте мықты команда. Соңғы екі ойында олар бізді әбден қинады. Бұл жерде екіұшты жағдай бар: бір жағынан, біз олардың өзімен ойнай алатынымызды көрсеттік, екінші жағынан, егер біз «оларды оңай жеңеміз» деп босаңсып кетсек, біз үшін қиынға соғуы мүмкін.
– «Тобылмен» келісімшарт келесі маусымның соңына дейін жасалған екен. Оны ұзарту жоспарыңыз бар ма? Жалпы «Тобыл» мен қазақстандық футбол қаншалықты ұнады.
– Менің «Тобылмен» келісімшартым 2026 жылдың соңына дейін бар. Қазір клуб пен қаладан ләззат алып жүрмін. Сондықтан уақыт келгенде келісімшартты ұзарту және клубтағы болашағым туралы сөйлесеміз.