Сұрмерген
Әзірге Қазақстан Премьер-лигасының ең үздік сұрмергені мәртебесіне ең жас ойыншы «Қайраттың» шабуылшысы Дастан Сатпаев ие болып отыр. Ол 16 жасында талай мықтыларды шаң қаптыра бастады.
Дастан былтыр «Қайраттың» Бірінші лигадағы командасында дебют жасаған. Ал осы жылы Премьер-лига деңгейіне ғана жетіп қоймай, басты жұлдыздардың біірне айналып үлгерді.
Сәтпаев «Қайраттың» Премьер-лигадағы командасында алғашқы голын бірінші турда «Астана» қақпасына соқты. Сол кезде ойынға қосалқы құрамнан араласты. Сол кезде оның голы алматылықтарға тең нәтиже әкелді. Кейіннен вундеркинд жиі негізгі құрамда алаңға шығып, тіпті команданың көшбасшыларының бірі ретінде таныла бастады.
Жас шабуылшы «Қайраттың» чемпионат аясында өткізген 12 ойынының бәріне қатысты. Премьер-лигада 8 гол және 2 нәтижелі пас беріп үлгерді.
Тағы бір қызықты статистика оның қақпаға бағыттаған 11 соққысының 8-і голға айналған.
АССИСТЕНТ
Нәтижелі пас берушілер тізімін де «Қайрат» ойыншысы – Жорже Габриэль да Коста Монтейро, яғни Жоржинью бастап тұр.
27 жастағы португалиялық жартылай қорғаушы команданың ойынына жақсы бейімделіп, 6 нәтижелі пас беріп үлгерді. Әсіресе «Ұлытаумен» болған ойында ассистенттік хет-трик жасап, жанкүйерлерді тәнті етті.
Сонымен қатар, Жоржинью 4 гол соқты. Осылайша, «гол+пас» жүйесі бойынша ол командаласы Дастан Сәтпаевпен бірге екінші орынды бөлісіп тұр.
БОМБАРДИР (ГОЛ+ПАС)
Ал осы «гол+пас» жүйесісінде сөзсіз Марин Томасов алға шықты. Өзі де соғатын, әріптестеріне де жиі пс беретін хорватиялық футболшы биыл «Астана» сапындағы тоғызыншы маусымын өткізуде.
Гол саны бойынша ол Сатпаевтан (Томасовта 6, Сәтпаевта 8), нәтижелі пас бойынша Жоржиньюден (Томасовта 5, Жоржиньюда 6) аз жинаса да, жалпы есепте көшбасында.
Айта кету керек, Томасовтың еншісінде бірден екі хет-трик бар: бірі – гол, екіншісі – пас бойынша («Жетісу» және «Жеңіс» командаларымен ойында).
Қақпасын жиі «құрғақ» алып шығатын қақпашы
Көктемгі кезең қорытындысы бойынша «құрғақ» қақпашы атағын екі ойыншы бөлісіп отыр – Андрей-Даниэль Влад («Ақтөбе») және Максим Коваль («Елімай»).
Әрқайсы Премьер-лигада бес матчта қақпасына гол өткізбеген. Дегенмен, ең аз гол жіберген команда – «Тобыл» (бар-жоғы 6 гол).
Бірақ «Тобылдың» негізгі қақпашысы Данил Устименконың «нөлдік» ойындар саны– төртеу ғана, себебі ол ойын уақытын Сұлтан Бусурмановпен бөліскен.
Сонымен қатар, «Қайсардың» қақпашысы Нұрымжан Салайдинді ерекше атап өту керек. Ол бар болғаны 3 матчты голсыз аяқтағанымен, ең көп сейв жасаған қақпашы болып тұр. Нұрымжан 42 рет қақпасын қауіпті шабуылдан аман алып қалған.
Жыл жаңалығы болып тұрған жаттықтырушы
Көктемгі кезеңнің ең жағымды тосынсыйларының бірі – «Оқжетпестің» сәтті өнер көрсетуі болды. Бірінші лигада ойнап келген көкшетаулықтар Премьер-лигада өздерін сенімді сезінуде.
Команданың табысты өнер көрсетуіне басты себепкер – Андрей Ферапонтов. Қазақстандық бапкер бұрын көмекші және аналитик ретінде танымал еді. Ал жеке жетістіктері негізінен Бірінші лига деңгейінде болған.
Алайда қазір ол «Оқжетпеспен» Премьер-лиганы шулатып жатыр. Аз уақыттың ішінде «Қайрат» пен «Елімайды» сырт алаңда жеңіп үлгерді.