«Астанамен» өткен Қазақстан кубогының ширек финалындағы ойыннан кейін «Жеңіс» клубының қорғаушысы Иван Шараванья KFF League тілшісіне сұхбат берді. Ол әңгіме барысында «Астанамен» өткен матч, «Елімайдан» неге кеткенін және «Тобылға» қарсы алдағы жартылай финалдан не күтетінін айтты.
– Иван, жеңіспен құттықтаймыз. Ойыннан алған әсеріңізбен бөліссеңіз.
– Бұл мен үшін де, бүкіл команда үшін де керемет ойын болды. Матч барысында талай нәрсеге куә болдық. Алдымен жеңіліп жаттық, сосын теңестіріп, ең соңында жеңіске жеттік. Команда ретінде мінез көрсете алдық. Соның арқасында лайықты түрде жартылай финалға шыққанымызға сенімдімін.
– Қосымша уақытта сіздің есепте алға шығуыңызға керемет екі мүмкіндік болды. Неліктен гол соға алмадыңыз деп ойлайсыз?
– Иә, 90 минут және одан да көп ойнағанда концентрацияны сақтау оңай емес. Шынымен, 2–3 жақсы мүмкіндігіміз болды, бірақ оларды пайдалана алмадық. Дегенмен, жоғарыда айтқанымдай, біз мінез көрсеттік – бұл ең бастысы.
– Келесі қарсыласыңыз – «Тобыл». Аталған матчтан не күтуге болады?
– Бұл мен үшін өте қызықты ойын болады. Жоғары деңгейдегі футбол болуы тиіс. «Тобылмен» кездесуді асыға күтемін. Егер бүгінгідей мінез бен құлшыныс танытсақ, өз мүмкіндіктерімізді пайдаланамыз деп ойлаймын.
– Бұған дейін сіз «Елімай» клубында ойнағансыз. Бұл командадан не себепті кеттіңіз?
– Бұл – өмір. Кейде бір нәрсені жоспарлайсың, бірақ бәрі басқаша болады. Футболда мұндай жағдайлар қалыпты. Жаңа ортаға бейімделуге дайын болу керек. Көп нәрсе айта алмаймын, тек «Елімайға» және «Жеңіске» қатарларында болуға мүмкіндік бергені үшін алғысымды білдіремін. Өз ойыным арқылы сенімдерін ақтауға тырысамын.
– «Жеңіске» ауысқаннан кейін бастапқыда көбінесе қосалқы құрамда болдыңыз. Осы трансферлік ауысымыңыз жайлы не айтасыз?
– Әрине, көңілім толады. Бұл – менің мансабымдағы клубсыз қалған алғашқы жағдай. Басында 2-3 ай командасыз жүрдім. Сондықтан бірден көп жүктеме алып, негізгі құрамда ойнап кетуденсаулыққа қауіпті. Жаттықтырушылар штабымен ақылдаса отырып, біртіндеп оралуды жөн көрдік. Қазір күн өткен сайын алаңда көбірек уақыт өткізіп жүрмін. Бүгін, міне, 120 минут ойнадым.
– Бірнеше күн бұрын бас бапкер Акис Вавалис клубтан кетті. Бұл өзгеріс ойын алдында команданың көңіл-күйіне әсер етті ме?
– Бұл – менің емес, клубтың шешімі. Ол отбасылық жағдайларына байланысты кетті. Дегенмен, бұл жеңісте оның да үлесі бар. Акис командаға көп жігер қосты. Қазір жаңа бапкермен жұмыс істеуді жалғастырып, мақсатымызға ұмтылып жатырмыз.
– Команданың мақсаты қандай? Егер сіздер Кубокты жеңсеңіздер, Еуропа лигасына жолдама аласыздар. Бұл мотивацияны арттыра ма?
– Әр футболшы сияқты, біздің де мақсатымыз – әр матчтан барынша нәтиже шығару. Бүгін сәттілік біз жақта болды. Біз әр ойында барымызды салуға тырысамыз. Қалғанын уақыт көрсете жатар.