– Мика, алдымен жеңіс құтты болсын! Бүгінгі ойын туралы не айтасыз?
– Құттықтауыңызға рахмет. «Жеңістің» жеңіске жеткеніне қуаныштымын. Бұл біз үшін маңызды камбэк. Маған соңғы минуттарда гол соғу бақыты бұйырды. Экстра-таймда есепте алға шығатын мүмкіндік болған еді. Бірақ өз мүмкіндіктерімізді мүлт жібердік. Пенальти – өздеріңіз білетіндей лотерия ғой. Осы жолы біздің жолымыз болып, келесі кезеңге өттік.
– Есепті теңестіріп, ойынды қосымша уақытқа жалғастырғанда қандай сезімде болдыңыз? Сол сәттегі эмоцияңызды білгіміз келіп тұр.
– Әрине, қуаныштымын. Әрдайым гол соққан бақыт сыйлайды. Әсіресе, осындай маңызды жеңістердің жөні бөлек қой. Шынымен де бақыттымын.
– Бірнеше күн бұрын командадан бас бапкер Акис Вавалис кетті. Бұл жағдай командаға ойын алдында әсер етпеді ме?
– Біз кәсіпқой футболшымыз бәрін түсінеміз. Мұндай жағдайлар болып тұрады. Әрине, бапкердің кеткені көңіл күйді түсіретін жағдай. Алайда бізге жұмысты жалғастыру маңызды. Енді жаңа бапкерге демеу болып, әрі қарай әрекет ете береміз.
– Енді, өзіңізге тоқталсақ, «Жеңіске» кім шақырды? Бұл ұсынысқа қан уақыт ойландыңыз?
– Бәрі де өте жылдам болды. Мен ұсынысты агентімнен алдым. Барлығы 1-2 күнде шешілді. Қателеспесем, сенбі күні жазды, ал дүйсенбі ресми ұсынысқа қол жеткіздім. Сейсенбі күні Астанаға келіп, құжаттарды реттедік. Трансфер жабылып, бәрі асығыс болып жатқан кез.
– Бұрын Азия чемпионатында доп тептіңіз. Сондай-ақ Финляндия мен Испанияда ойнағаныңыздан хабарымыз бар. Осыдан кейін Қазақстаннан түскен ұсынысқа қалай қарадыңыз?
–Малайзиядан кейін менің карьерамда аздаған сәтсіздік болды. Келісімшартты үздім, ұзақ уақыт үйде отырып қалдым. Маған түскен өзге ұсыныстарға көңілім толған жоқ. «Жеңістің» қызығушылығы дер кезінде болды. Сондықтан бірден қабылдадым. Астанадан тұрудың өз вайбы бар. Стадион керемет, клуб та жақсы жағынан әсер қалдырды. Бәрі сәтімен бола қалды. Жоғары да айтқанымдай, ұсынысты екі күнде қабылдап үлгердім.
– Команданың биылғы маусымдағы мақсаты туралы айтып өтсеңіз. «Астананы» жеңіп, жартылай финалға өттіңіздер. Егер кубок бұйырып жатса, Еуропа лигасында ойнауға болады...
– Әрине, олай алысқа қол сілтеп жатсақ керемет қой. Бізге енді чемпионатқа көңіл бөлу қажет. Матч демалыс күні өтеді. Сосын кубоктың жартылай финалы да болып қалады. Барлығына кезең-кезеңімен жетеміз.
– Келесі қарсылас – Қостанайдың «Тобыл» командасы. Қазақстандағы үздік клубтардың бірі. Мүмкіндіктеріңіз қалай болмақ...
– Бүгін ең мықты ұжымдардың бірін жеңдік. Бұл бізге сенімділік сыйлайды. Біз ешкімнен қорықпаймыз. Бұл футбол, екі команданың мүмкіндігі 50-де 50. Алаңға шығып, бар білгенімізді көрсету керек. Әріқарай, финалға шығамыз деп үміттенеміз.
– Әңгімеңізге рахмет! Сәттілік тілейміз!