Премьер-лига ойындарының сегізінші туры аясында Елорданың «Астана» клубы өз алаңында Қостанайдың «Тобылын» қабылдап, 1:3 есебімен жеңіліп қалды.
Матчтан кейін «сары-жасылдардың» қақпашысы Сұлтан Бұсұрманов KFF League тілшісіне сұхбат беріп, ойыннан алған әсерін ортаға салды.
– Сұлтан, ең алдымен, бүгінгі жеңіспен құттықтаймын! Ойын туралы айтып өтсең?
– Көп рақмет. Ойын оңай болған жоқ. Жалпы, «Астанаға» қарсы кездесу әрқашан қиын өтеді. Өйткені еліміздегі ең үздік ұжымдардың бірі. Оларға Еурокубоктарда сәттілік тілеймін. Бүгін біз бапкердің тапсырмасын толығымен орындап, тәртіпті ойын көрсеттік және өз мүмкіндіктерімізді ұтымды пайдалана алдық. Әрине, болмашы сәтсіздіктен қақпамызға бір гол өткізіп алдық. Дегенмен, матч біз күткендей аяқталды. Ең бастысы – жеңіске жеттік. Барша жанкүйерді тағы да жеңіспен құттықтаймын!
– Қателеспесем, бүгін кезекті жаңа жасыңды тойлап жатсың. Шын жүректен құттықтаймын! Бұл жеңісті өзіңе жасалған сыйлық деп айтуға бола ма?
– Рақмет! Өзіме сыйлық жасадым деп айта алмаймын. Бүгін бүкіл команда жеңіс үшін барын салды. Әр ойыншы жанын беріп ойнады. Әсіресе бірінші таймда барлығы доп үшін соңына дейін күресіп, жанкештілік танытты. Қақпамызға бірде-бір қауіпті соққы жасауға мүмкіндік берген жоқпыз деп ойлаймын. Бұл – бүкіл команданың еңбегі. Барлығы жарады!
– Бүгін биылғы маусымдағы алғашқы ойыныңды өткіздің. Қандай әсер алдың?
– Иә, бұған дейін мен тек Кубок ойындарында ғана алаңға шыққан едім. Ал бүгін Премьер-лигада алғашқы кездесуімді өткіздім. Мен әрдайым алаңға шығуға дайынмын. Бізде әр ойыншы маңызды әрі бағалы. Бапкерлеріміз айтқандай, бізде негізгі немесе қосалқы құрам деген ұғым жоқ – бәріміз бір командамыз. Барлығы бірдей жаттығып, бір-бірін қолдап отырады.