Қазақстан премьер-лигасының 7-турында «Ақтөбе» елордада «Жеңіс» командасынан 1:0 есебімен басым түсті. Осы матчтағы жалғыз голды шабуылшы Оралхан Өміртаев соқты. Ойыннан кейін футболшы KFF League тілшісіне сұхбат беріп, Премьер-лигадағы бәсекелестік, жарақаты және былтырғы Беларусь чемпионатындағы карьерасы туралы айтты.
– Оралхан, алдымен жеңіс құтты болсын. Ойын туралы не айтасың?
– Көп рахмет. Матч өте ауыр өтті. Соңғы минуттарға дейін жасыл алаңда жан берісіп ойнадық. Ең бастысы, команда үш ұпайға қол жеткізді. Қарсыласымыз қорғаныста мығым ойнайды. Бірақ біз бұл жеңіске лайықты болдық.
– Гол соққан соң, сені алмастырып тастады. Мұның себебі неде?
– Гол салғаннан кейін тіземнің үстіңгі жағын ауыртып алдым. Басында бұлшық еттерім жай ауырсынып тұрған болар деп ойлағанмын. Ойынды әріқарай жалғастыра аламын деген үміт болды. Алайда бұл маған қалыпты жүгіруге және бар күшімді салуға кедергі келтірді. Сондықтан бас бапкерден ауыстыруды сұрадым.
– Осының алдында кубокта «Жеңіске» есе жіберіп, жарыс жолынан шығып қалдыңдар. Бұл жолы есе қайтару деген мақсат болды ма?
– Ондай бір принципке барғанымыз жоқ. Біз әрбір ойында алаңға тек жеңіс үшін шығамыз. Қазір чемпиондыққа талас жүріп жатыр, ұпай жоғалтуға болмайды. Сол себепті барлық кездесуде соңғы деміміз қалғанша алаңда күш саламыз.
– Бас бапкер Игорь Леонов кеткен соң, оның орнына Левчук міндетін атқарушы болып жұмыс істеп жүр. Қазір Левчук саған көбірек сенім артатын секілді...
– Бұл сенімге байланысты емес деп ойлаймын. Екі маман осыған дейін бірге жұмыс істеді. Мен жаттығуда әрдайым бар күшімді саламын. Ал құрамды таңдау бас бапкердің міндеті. Маған жүктелгені – қолымнан келетінін алаңда көрсету.
– Былтырғы маусымда Беларусь чемпионатында 10 гол салдың. Ал биыл қарсылас қақпасынан саңылау табу қиынға соғып жатқан сияқты...
– Мен бар-жоғы жеті матч өткіздім. Осы аралықта екі гол соғып, бір нәтижелі пас бердім. Барлығы алда деп ойлаймын. Құдай қаласа, әрбір ойында гол соғуға тырысамын. Нәтиже еңбек және шыдамылықпен келеді.
– Беларусь пен Қазақстан чемпионатынан қандай айырмашылық байқадың?
– Бұған дейін талай рет айтқанмын, Беларусь чемпионатының артықшылығы – алаң сапасы және жалпы инфрақұрылым. Ол жақта табиғи алаңдар көп. Ал чемпионаттың деңгейіне келсек, қазір Қазақстан премьер-лигасы мықтырақ.
– «Ақтөбе» биылғы маусымға жалпы қандай мақсат қойып отыр?
– Еліміздің бес дүркін чемпионы атанған клуб. Әрдайым жоғары мақсат қояды. Жанкүйерлер де нәтижені талап етеді. Олар бұған лайықты. Сондықтан бәрі әділетті деп ойлаймын. Біз әр матчта жеңіске жетіп, сол мақсатты жүзеге асыруға күш саламыз.
– Жазда «Ақтөбе» Еуропа лигасының іріктеу кезеңіне қатысады. Команданың мүмкіндігі қандай?
– Әзірге бірдеңе айтуға ерте. Қандай мүмкіндігіміз бар екенін де дәл қазір тап басып айту қиын. Өйткені алда әлі талай матч бар. Бізге оған дейін Қазақстан чемпионатына күш салуымыз керек. Әр жағын бапкерлер штабы талдап, Еуропа лигасына дайындықты бастайды ғой. Ең бастысы, алдыға жылжу.
